Ныхыдырӈаць

Си’’ив Харв маркана ӈэрм’ тер’’ сёбар’’ ӈацекы’’ ӈани’ таня’’. Пыдо’ тохолковандо’ ирманя ханяӈэхэна помнандо’ невхы’’ сянакубцха’’на пирдырцеты’’. Сиддо’ тикы ненадо серкана «Ямал-нюна’’ я!» Ассоциация’ тер’’ нерня’ тидхалембасеты’’.

Тандая’ сидна’’, «Няръяна Ӈэрм»хана манзаранаӈэ, таняд Сотруева Анна мядоманзь хаӈась. Пыда сёбар’’ серо нерня’ минрена не. Ямал’ тиӈгэвна юнда пили’’ сосеты. Манзаита нямна тарем’ лаханась:

— Мале сян по’’ ямбан’ Центр технического творчества’ тохолкось’ яхана сёбар’’ ӈацекы тохоламбадаӈэ тарадм’. Теда’ Ассоциация’ няд минрена манзаями пэрӈадм’. Илебей ненэцие’’ е’’эмня Ӈэрм’ тер’’ сянакубц’’ пирдырмам’ сертабидм’. Ныхыдырць сямянхат мэбетидо’ таслаӈгува’’. Пыдо’ ӈахакуд тикы’ е’’эмня ниць хамекур’’. Сиддо’ сирё хибяхарт нись табедамбю’’, ӈадьбята ханяӈыдо’ нид минзь нидо’ тохоламбаӈгу’’. Пирдыртина’’ поӈгана луца’’, хадян’’ хасава ӈацекы ӈани’ таня’’. Ӈэрм тэнз мэта’’ нидо’ нядабидо’, тидхалембидо’.

Фото: Галина Кинчина / Няръяна Нгэрм

Колледжхана физкультура’ урокадо’ минрена Минхаиров Рустам Галимджанович сиддо’ ёльце саву’’ӈась:

— Я’ ханярина ӈэрм тер’’ илебей’’ ненэця’’ сяхари’ сёбар’’ ӈэсеты’’. Тюку тохолкось’ яханандо’ ӈани’ ненадо’’. Хуркари’’ тоенана серкана няндо’ енасетыдм’. Ханярина пирдырць тарабата хонрабасетын — сяхаӈгарт’ пуня’ нисеты’’ ӈа’’. Тохолкода’’ илебей’’ ненэциена’’ пирдырман’, сёбар’’ илам’ нёдаван’ харва’’. Ӈопой, маня’’ колледжханана’’ Ӈэрм’ тер’’ пирдырми минрева’ няю’ ӈанэдярма’’ яӈгу. Теда’ ныхыдырць тархалмадава’’ «Авангард»хад ханаваць. Нянана’’ тамна хан’’, ныхыдырць мэта’’ лата’’, тынзя’’, тубка’’ тара’’.

Нерня’ ха’’амвы’’ хасава ӈацекы’’ «Ямал-нюна’’ я!» Ассоциация’ нермбэртя Эдуард Яунгад’ ӈудахат мядонзэйдамдо’ ня’’маць. Тарем’ саӈгомто’ сер’ сидя явна ныхыдырӈаць. 65 кг-хад вата’’ поӈгад сямянхат мэбета Ядне Юлиан ӈэвы. Пыда Тасу’ явхы Паюте’’э хардахад ӈа. Таняна тарця мэбета’’ ӈока’’ ӈэрха’’. Нябимдей ян’ ха’’амвы — Витязев Николай. Пыда Крышмарь Семёнм’ нэкал’’ӈась. Саӈгоманато’ няхатато’ 65 кг-хад сибёрка’’ ӈани’ мэбетидо’ таслаць. Тикы’’ Сегой Альберт, Хороля Николай, Сэротэтто Вячеслав ӈэвы’’. Ти, тарця’’ сёбар’’ яна’’ тер’’ Саля яв’ тяханяна Си’’ив Харв маркана ӈэда колледжхана тохолку’’.

Сянхав’ иры’ хэ’’мяхад Анна Сотруева тамна ӈани ӈоб’’ пирдырмам’ сертаӈгу. Тедари’ тикамда нидась вадес’’. Ма’’нисяв, товани ёльцянд’ ӈацекы’’ ныхыдамдо’ ма’’ламбая’’.

Автор: Галина Окотэтто’ падвы

Авторы

Няръяна Нгэрм

04:00, 26 февраля 2026

Темы