Няръяна Ӈэрм
Ныхыдырмамʼ етя тохоламбиˮ
Тюку поʼ матˮ илебей ненэцяваˮ Якутиянʼ тохолкованзь хэвыˮ. Тедаʼ пыдоʼ наӈэдя ирымʼ мадаˮ. Таняна ёльце сава ӈэдараха, маймбиˮ, едэй ехэрана яхана мэˮ. Тохолко нятаˮ нидоʼ, сиддоʼ тохоламбадидоʼ торомдавыˮ. Илелава яханандоʼ ӈаниʼ сямян ӈамгэсавэйˮ, индоʼ ватовна илеˮ.
Няхартоʼ ялэй тохолковамʼ мэˮӈаˮ, няхартоʼ мякадандоʼ тохолкуˮ. Мятоʼ хэвняна тохолкодахаʼ сидяхаʼ, Тасуʼ яʼ терхаʼ — Фёдор Ӈокадэта няби Кирилл Няч. Пыдиʼ Чурапчинской государственной институтхана сёбарˮ тохоламбихиʼ. Ӈопойдоʼ Яр-Саляхад ӈа — Меретя Яптик, пыда М.К. Аммосовʼ нюмамʼ мэта Северо-Восточной федеральной университетхана сёбарˮ манзаямʼ тикахад яӈга ӈэрмʼ терˮ сянакубц тохоламби. Таняна ӈодˮ мякаданда Артём Ного Яр-Саляʼ тер тохолку. Тамна сидя няхаюнаˮ Тасуʼ яʼ терхаʼ Геннадий Ӈокадэта няби Дементий Салиндер ӈобтикы Чурапчинский институтхана тохолкухуʼ.
Меретя Тюменьʼ няна ӈэда техникумамʼ малеˮмянда пуд хэвы. Фёдор юкад вата ӈопой классмʼ малевы. Кирилл армияхана мэˮманда пуд хэсь таславэда. Артём, Геннадий, Дементий — манзаранаˮ ненэцяˮ, хартоʼ хардахаˮнатоʼ ӈарка ненэцие, ӈацекы ныхыдырць тохоламбиˮ.
Якутиянʼ хэвыˮ нинаˮ малʼ сёбарˮ, ныхыдырмаʼ сермʼ нерняʼ минренаˮ, сянʼ мэва пирдырмахаˮна ваць нитоʼ нерняʼ еребермыˮ. Ехэрана яʼ няна тохоламбададоʼ пирхата ӈока. Тохолко малеˮмяхадандоʼ спортивной комплексхаˮна, школахаˮна ӈацекы тохоламбадаӈэ, тренерӈэ тараӈгуˮ. Ӈулиˮ мэбта сёбарˮ серо минрена департамент харданʼ хандаˮ. Тикыʼ хавна районхыˮ, маркыˮ сёбарˮ серо тасламбадаˮ управленияˮ таняˮ.
Ӈамгэ таняʼ хэсь таславамдоʼ округнаˮ ныхыдыртиˮ федерацияʼ вице-президент Николай Иванович Ӈокадэта вадеˮӈадась:
— Ямалхананаˮ ныхыдырмамʼ нерняʼ пэрӈаваˮ, нянанаˮ несэй тохолковаʼ серо теневанаˮ тараˮ. Ӈацекы тохоламбаӈгуˮ, тренерӈэ тараӈгуˮ. Ӈавна сянаковаʼ ялярихина ныхыдырӈаваць, тедаʼ ханярина пирдырӈаваˮ. Нябимдей поʼ тикымʼ тоенарка нерняʼ пэрӈаваˮ. Округхананаˮ етя ныхыдырманʼ ненэцие табедамбада юӈгуˮ нисявˮ. Тюку яляʼ пирувна мале сян тренерваˮ, пыдоʼ Ямальской, Тазовской районхаʼ няна, Уренгойхана, Аксаркахана манзараˮ. Тарко-Саляхана тарця сермʼ ӈобтикы тасламбиˮ. Тохолкодинаˮ дипломдоʼ няˮамˮмахадандоʼ ныхыдырмаʼ нямна ӈэда серо малʼ теневаӈгудоʼ, тидхалемба пиртыдоʼ. Ныхыдырмаʼ серˮ Ямалхана нерняриʼ минда. Поˮ хандаˮ, хуркариˮ ваˮлёйˮ сёбарнаˮ, ӈаниˮ таремʼ тохолкованʼ харванинаˮ ӈадимдаˮ. Федерацияваˮ нюдякоˮ хардахаˮна, маркаˮна хуркари пирдырма сертаба, хуркари секция школахаˮна нэмба ена.
Нита нямна ӈобˮ няркана
Николай Иванович няхатата ӈахаˮна илебта ӈодˮ, тохолкованзь хэвыˮ няхаˮната ӈобӈгэвʼ лаханаку. Пыда маˮнисяв:
— Таремгавʼ мань хэвханандоʼ нидмʼ мыˮ. Нись ӈадюˮ вадахана нерняʼ пэрцетын. Ӈодьˮ Якутиянʼ тэвавандоʼ серʼ Кирилл Нячхад хонаркудамзь: «Хурков? Ханзерˮ тохолкун? Ӈавна Санкт-Петербурганʼ, Тюменянʼ, ӈаниˮ хардахаˮ ханцетыˮ. Тедаʼ минанаˮ ниʼ несэй харад еремя. Тохолковаʼ серодиʼ ӈобтикы ханэйвана миӈаˮ, маˮнихимʼ сиддоʼ тохоламбадидоʼ, нянандиʼ тоходананаˮ ёльце саваˮ. Сидя-няхарˮ часʼ ӈэсондʼ тохолкуˮ, пуна самляӈгхад пэвсюмаʼ ӈэсондʼ тренировкахаˮна мэˮ. Сёбарˮ ненэцяӈгана тарана сямян ӈамгэнʼ тохоламбидоʼ. Тэри яда ӈодˮ нянандиʼ ӈаниʼ сава, хартиʼ мяканандиʼ мэна тоˮолхахаʼ. Тамнаʼ тяхаʼ Кириллхавмʼ армия иландʼ хамэдавэда, нянанда ӈадьбята нензелˮ. Няданда нюдярка нямда Федормʼ нядаби. Мань ими ӈулиˮ таӈга. Тикахад сямян намдаван харванамʼ сиддоʼ тохоламбадидоʼ вадеˮӈаˮ, ӈобӈгэвʼ сидяӈг, вадамʼ мятоʼ терхаˮ ӈэдарамбиˮ. Тедахавʼ сава, маняˮ ханярина минрена сернаˮ нямна лаханаваˮ. Ӈадьбята ӈацекыˮ ханяна манзаянʼ тохолко пирˮмамдоʼ таӈга тасламбидоʼ. Ӈавна сиднаˮ тидхалембадаˮ нинаˮ ӈамгэ яӈгувакыˮ? Тамальӈгана хибяхав мандась: «Инзелехэрˮ, пыдар етя тохолкованзь хэван нин? Пирмаʼ серʼ ӈарˮ!»
Меретя Яптик серода ӈаниʼ саваˮ. Пыда мале нюртей пирдырмада ӈэвысь, сямян таняна ныхымда манэˮлабтавысь. Якутскʼ харданʼ тэваванда мальӈгана сита ӈэрмʼ терˮ ненэциеˮ сянакубцˮ кафедрамʼ няˮамбада Егор Петрович Кудрин нядавысь, аэропортхад хосаявысь. Сита ӈавлавысь, пунари общежитиянʼ хэвысь. Илелавахананда Свердловской областьʼ няд товы танявы. Луца ӈацекы ненэцие Якутияʼ няна ныхыдырманʼ тохоламбавамʼ намдавы, етя таняʼ хэсь таславэда. Няхаромдэй поʼ тохолковаханда несэй вадамʼ тохолавы. Маняˮ нинаˮ ӈаниʼ етя хаяˮ. Пыдоʼ маˮнимˮ, харвабта ӈаниʼ якутˮ вадамʼ тохоламба пяӈгоданакэваˮ, хэреˮ ненэй вадаʼ хавна ӈани ӈамгэхэв вадамʼ теневава сава. Ехэрана вадамʼ теневава сиддоʼ мэёмламбаӈгу, сахамламбаӈгу. Пуна манзара пэˮмахадандоʼ хартоʼ ярихинандоʼ вуниˮ мэӈгуˮ, ханякухув пирдырманзь хантаˮ.
Ваˮлёйˮ нинаˮ тидˮ тохолкояˮ, нёяˮ хаӈгурˮ, иландоʼ сехэры харвабцовнандоʼ хаˮмымдˮ, нидоʼ сиддоʼ нядабаяˮ. Таддикахад малʼ маняˮ саць ненадо сермʼ пянаˮ нинаˮ едʼ маймбиваˮ. Сяхаринда яляʼ няʼ ӈэдинаˮ савуˮянаˮ.
Анна Яптикʼ падвы
Сидяӈг: Николай Окотэттоʼ тавы
Авторы
Няръяна Нгэрм
Темы