Няръяна Ӈэрм
Ныхыдырць пирдырмы
Якутия’ няна тохолкода нява’’ Меретя Яптик «Золотая палка»м’ нюбета чемпионатхана мэсь. Харта тохолкулва янда ед’ сянакусь. Ӈокханда 160 пир’’ ненэця’’ ма’’лыць. Пыдо’ мал’ таняӈы я’ тераць. Хуркари’’ я’’авлада’’ понд’ еремясь. Саӈговодо’ 90 килограмм’ ӈэсонд’ тэворта’’ поӈгана нябимдей ӈэвысь.
Меретя’ вадада тарцясь: «Техэюм’ си’’ив яляхана Хатассы нюбета хардан’ хан’’ӈадамзь. Таняна ныхыдырць пирдырӈаваць. Тикы турнир Якутия’ тер мал’ ӈобт’ ма’’лась. Ямалхад сидяӈэ пирдырӈанинзь. Тасу’ я’ тер нями Кирилл Няч саӈгомдо’ 65 килограмм’ пирт’ тэворта’’ поӈгана мэсь. Турнир ӈули’’ сава. Сямбирувна хамэдёвами хор’’ӈадм’. Едэй ненэцие’’ тохоладм’. Пыдо’ ханярина пирдырмы’’, ханяӈыдо’ чемпион’ мира, чемпион’ России нювм’ мэ’’ӈа’’. Ханзер’’ ныхыдырмамдо’, хурка мутрыто’ танявам’ манэ’’ӈадм’».
Меретя’ няданда нюдярка няда таня. Илья неканда тотрев’ ӈани’ ныхыдырӈа. Хой’ няна илебта ӈод’’ хардан’ пирдырманзь тарем’ ӈод’’ турӈа. Хэвы ныланава яляхана ӈобтикы пирдырӈась. Ямальской район’ няна чемпионатан’ ма’’лыць. Округна’’ ханярид ӈэда’’ сёбар’’ ныхыдо’ хорпиць. 75 килограмм’ мэта’’ поӈгана няхатата са’’ӈась.
Ныхыдырма’ серм’ харвабтана’’ нина’’ сенз’’ ӈэя’’, тамна тяха’ варемдо’ мэць нерня’ миӈая’’. Тарця сянакубц’ тэнз’ юн яханана’’, яна’’ хэвняна етри’ соя.
Автор: Анна Яптик’ падвы
Авторы
Няръяна Нгэрм
Темы