обновлено: 09:04, 20 февраля 2023
Няръяна Ӈэрм
Ӈылека Тецьдаʼ музей
❄Ӈавна халядаваʼ манзая саць тоенавы. Хадабада халэдоʼ ёртяʼʼ яʼ мятʼ пэрмыдоʼ. Ӈотаӈоʼʼ таняна халя ни вомдʼʼ.Паднана нява» Няръяна Нгэрм — старейшая газета Ямала юнмʼ ӈэдарась.
Тарця яʼ мядʼʼ Яʼ мал янаʼʼ тиӈгэвна мале ӈока хардахана танявыʼʼ. Ила несэймаʼ серʼ едэй ӈамгэриʼʼ ӈадимяʼʼ. Луцаʼ холодильникʼʼ, ханибцеӈгода камераʼʼ халямʼ, ӈамзамʼ ӈобʼʼ сярʼ мэвахана сянзибтембидоʼ.
Тасуʼʼ явʼ няна ӈэда Хальмерʼʼ Седе хардахана яʼ мядмʼ музейӈэ сертавэдоʼ. «Музей вечной мерзлоты» нюбеʼʼӈа. Тикы Тазовской районной краеведческой музейʼ пеляӈэ тара.
Ӈылека Тецьдаʼ музейхана экспонатдоʼ салабахад сертавыʼʼ. Хусувэй тарця ӈамгэриʼʼ сэвхана ёльце маниебцёʼʼ. Ненэйвана хамзакабтадаʼʼ: тетитана хан, мядʼ хэвхана нунахаʼ Сихиртя пирибця няби Сэрʼʼ Тадебя, салаба аквариум, поӈгамʼ нэкалпада ёртя. Тикыʼ хавна салабахат сертавы ханедиʼʼ сидяӈгʼʼ таняʼʼ.
Сяхариʼ Хальмерʼʼ Седенʼ тэвʼʼбананда Ӈылека Тецьдаʼ музеймʼ манэʼʼпата тара. Ихинда поя хаʼʼмаӈгу! 💨❄☃☃
