Няръяна Ӈэрм
Ныптаку’’, дечтуӈ маныӈа’’
Пюԓ дяхана ӈайта Толькахана диԓина’’, каԓитана’’ капи’’ ӈупчики мансдянтуӈ дет тонԓюта дяԓям мэ’ӈаш’’.
Чики дяԓяхана чуувна петаԓахана диԓина’’ капи’’ чупей’ каԓтан тоӈаш’’. Пы’тоӈ ӈупчики нэхэмтуӈ, нюӈк ӈаймямтуӈ конуԓпёш поӈкнатуӈ мянаԓяш’’. Ӈанохана ԓапяташ матапёмытуӈ дяхантуӈ пен ӈуп километраӈ кун ӈаймай. Ӈаԓка не’’туӈ мянаԓтан ӈашкиуди’’ ӈупчики поӈкнатуӈ шана’куш’’, Пюԓ дяханана ӈайта Ассоциацихит «Ямал-потомкам!» мячисы’’ ня’амӈаш’’. Поӈкнатуӈ шана’ко мянаԓмантуӈ камна Толькахана диԓина’’ капи’’ дечтуӈ лекаԓки’’ ӈычимчеӈаш’’. Толька куптана ӈайта нюча каԓват, таԓям лекаԓ’’ таньнямна ӈопкат ниш’ту’’ дятэԓ’’.
Чуки дилхана куԓкаԓи’’ кавша’’ ӈычимшту’’. Ненымана тавсуԓта’’ деча’’ вайма’’. Таԓям каԓитани’’ дет тонԓюта дяԓян томы’’ капи’’ чупей пы’татуӈ лекаԓт ӈычимчеӈаш’’. Чикиӈ камна кыпудятуӈ таттаӈаш’’, УЗИхана дечтуӈ маныӈаш’’, дена’’ чимутуӈ чим’’ лекаԓт ӈычимчеӈаш’’.
Чуки пома’’ — дечашама пуӈc тунԓы, Ямална ӈаԓка веԓв таньше тасԓамы. Дечашама — ненэй ӈаԓкамана таԓана шеԓ. Таԓям таӈичохона дёԓеԓьш чепьмантуӈ неԓьня каԓитана’’ капиди’’ мятчеԓ’’ хомана ныптаку’’, дечтуӈ лекаԓки’’ ӈычимчеӈа’’. Татнеԓьняӈ «Пуровская» общинахана мансԓанна’’ шан’ таньше мэма ӈудютуӈ дякуты, таӈичохона дяԓи’’ тахана каԓиташтоны’’.
Автор: Лариса Айваседо патмы
Авторы
Няръяна Нгэрм
Темы