Няръяна Ӈэрм
Ӈобкана илевандоʼ няюʼ
Хэвы сиˮив яляхана Москвахана ӈэрмʼ терˮ маˮлыць. Хэвханандоʼ газмʼ тарпрамбада ӈаниʼ мэць. Пыдоʼ «Государственно-частное партнерство в сфере устойчивого развития коренных народов» нюбета нябимдей Международной форумамдоʼ мэˮӈаць. Таняʼ ӈани пареӈода яхат ненэцяˮ товыць.
Тасалковадоʼ сидя ялянʼ таславыць. Нерденаӈэ тодо яхана иленаˮӈэрмʼ терӈэ Ассоциациянаˮпрезидент Григорий Ледков вадамда мэˮӈась:
— Тедаʼ тасалкованаˮ пуд тарця ӈэбата тара, сяхариʼ яхананаˮманзара ёльцеˮмяхадандаˮ халэта тонаˮ тамна халясавэй ӈэбатоʼ сероˮӈаˮ, нядэйхана тынаˮ таӈга хадырӈаяˮ, невхы недарминаˮ таминдоʼ вэӈгалёяˮ. Яʼ тебтмʼ нэкалпадаˮ няʼ таремʼ манзарабнаˮ тара.
Хусувэйˮ лаханавыˮ хареˮ яханандоʼ газмʼ тарпрамбадаˮ няʼ ӈобкана манзаравамдоʼ вадеˮӈаць. Яʼ тебтмʼ нэкалпадаˮ ӈэрмʼ терˮ нядабавамдоʼ тэри вэроладонзь. Пыдоʼ лахарёхонандоʼ серодоʼ ӈулиˮ саваˮ. Тикыʼ нямна тодо яхана иленаˮ ӈэрмʼ терӈэ ӈарка Ассоциациянаˮ ервʼ марцьхэӈэ тарана Нина Вейсалова таремʼ мась:
— Сидя яля няндаˮ инзеледмʼ, тэри пысаӈгадмʼ. Газмʼ тарпрамбадаˮ лахарёдоʼ сян мерета «буранмʼ» мимамдоʼ, сян едэй поʼ нерцюбтˮ мядонзэй мимамдоʼ, сян керосинмʼ миˮмамдоʼ вадеˮӈаˮ. Маняˮ помнанаˮ таремʼ манзарабˮнаˮ ни серосˮ. Тарця вадець ни тараˮ. Тэри яханандоʼ илени ӈэрмʼ тер хареˮ харвобцохонандоʼ нядабидоʼ. Тикыʼ хавна этнологической экспертиза тэри харвобцондоʼ таняварихина сертабидоʼ. Тедаʼ тарця экспертиза ненэйвана тарабцонда танявамʼ таслабˮ сава. Тидпойʼ тараванда няюʼ тарця серо минреӈгудоʼ. Та ёльцяӈгана пыдоʼ ӈэрмʼ тер пюӈгудоʼ, тедаʼ маняˮ сидтоʼ пюваˮ. Ӈэрмʼ терхаˮ есь мипбатаˮ, тикахана нидаˮ тэмдаˮ. Таремʼ помнанаˮ манзарабнаˮ ни серосˮ. Россияхананаˮ газмʼ тарпрамбаваʼ нямна поёнаˮ хуркариˮ. Ӈамгэв сертабадинаˮ ӈани пареӈода яхана иленаˮ ненэцяӈгана сава ӈэӈгусь. Сиднаˮ хабиˮ округанʼ хаӈаць, маняˮ теневаваˮ танянаˮ поёдоʼ саваˮ. Манзаядоʼ миӈа. Маняˮ вэвавна манзараниˮ янʼ хэбˮнаˮ сава ӈэӈгусь. Масиʼ маняˮ тованаˮ серʼ едэйвана манзаямдоʼ пяӈгудоʼ. Ханяӈыˮ газмʼ тарпрамбадаˮ компанийˮ соглашенийˮ ирмня ханманʼ харваˮ. Тад нерняʼ государство, ӈэрмʼ терˮ, газмʼ тарпрамбада предприятийˮ ӈобкана манзарабтоʼ сава ӈэӈгусь. Нянаˮ сыраць илебей ненэциенаˮ нернякуʼ ӈэӈгуцьˮ.
Якутияхад товы Любовь Христофорова, вадада тарцясь:
— Ӈавнанда ӈэрмʼ ёˮ нимня нувʼ сармик тирмы. Тиӈгутаванда нерня ӈэда хадюлавы, вэида явнанаˮ яʼ тебтаӈэ, тамна ӈани тарана ӈамгэӈэ хомбидоʼ. Якутияхана «Алроса» манзара. Акциядоʼ компанияндоʼ хавна Якутиянаˮ правительствохана, манзара яндоʼ районʼ терхаˮна таняˮ. Ненэйвана нюдяко компанияˮ хамболо хаебиˮ. Тикыдˮ нянанаˮ манзаравандоʼ няюʼ соглашений ниˮ падыбюˮ. Хэˮмяхадандоʼ пундоʼ хаюртадоʼ ӈока. Пыдоʼ ямʼ вомдабавандоʼ няюʼ саць тянё есямʼ салдамбиˮ. Ихинани таремʼ серта сава. Ӈэрмʼ терˮ сянда халямʼ хадабˮнандоʼ, ӈопой ехэнаʼ няюʼ юрмянʼ ёнарˮ есямʼ салдамбиˮ, газмʼ тарпрамбадаˮ еˮэмня юˮ самляӈг ёнарˮ ӈэӈгу. Тад нерня яваˮ вомдабавандоʼ няюʼ няднаˮ ӈока есямʼ салдамбабатоʼ сероˮӈа. Ӈани похона поӈгананаˮ ˮРоснедраʼ манзарани маниеванʼ харвадмʼ. Тикахана тарця тоенана серо тасламбаӈгунаˮ.
Пареӈодаˮ яхад товыˮ ханзерˮ яханандоʼ манзаравамдоʼ вадеˮӈаць. Африкаʼ няд Угандахад Локол Паул ӈобтикы яхананда газмʼ тарпрамбади манзаравамʼ хэтась. Непалʼ няд товыˮ нинаˮ серодоʼ вэвари ӈэвыˮ. Ненэйвана яханандоʼ политикандоʼ нямна, тянё тэнзатоʼ нямна вэнзерˮ манзараˮ. Пыдоʼ яндоʼ ервˮ ёдоʼ тэри марпидоʼ. Таремʼ хибяхартмʼ ниˮ хонрамбюˮ. Ядоʼ тянё. Тедаʼ Россияхана поёдоʼ тасламбавандоʼ нямна ӈока ехэрана ӈамгэмʼ намдаˮ. Тикыдоʼ масиˮ яханандоʼ ӈаниʼ ӈадимдаˮ.
Ямалхаднаˮ ядэрмыˮ ервонаˮ ӈобтикы ханзерˮ яхананаˮ яʼ тебтмʼ нэкалпадаˮ няʼ ӈобкана манзаравамʼ вадеˮӈаць.
Таремʼ Москваʼ маркана ӈэрмʼ терˮ яʼ тебтмʼ нэкалпади няʼ нерняӈы ялямдоʼ тасламбиць.
М.Ярʼ падвы
Сидяӈгˮ: raipon.info.info ханавыˮ
Авторы
Няръяна Нгэрм
Темы