Няръяна Ӈэрм
Яӈгамдавы’’ пардон’’ лабтэй ня’’марпи’’
Небо’ лимбя’ ирыхына округханана’’ ты пэрти’’ ед’ ӈули’’ тарана серм’ ӈадимдець. Е’’эмняндо’ тыто’ пардон’’ лабтэй мипа пяць. Тамальӈгана тарана проектан’ 42 миллион есям’ округва’’ ӈадимдевысь. Ханя’ сяӈок есям’ сад’’мам’ округна’’ ветеринария’ центр тасламбида. Мюсерта’’ ненэцяӈг’’ мирципой’’ ӈопой яӈорэй’ мипидо’. Аптечка’ мюня ты лекарабтамба мэта’’, хуркари’’ тарана’’ ӈавэ хомби’’. Пардон’’, мерё масарпа, палӈыба мэта’’ ӈавэ’’ таня’’. Тарем’ ненэця’’ тыдо’ хабцяӈгад лэтра пиртыдо’.
Та’ ямбан’ округна’’ ерв’’ ты пэрти’’ помна ӈэдалёрӈаць. Тамальӈгана тэхэ’’на мэна’’ ненэциена’’ аптечка яӈгамдава’ нямна лаханавыць, мюнянда ханяӈы’’ ӈамгэ’’ тэхэ’’на саць нивы’’ тара’’. Палӈыба мэта’’ саць ӈока’’, тикы’ е’’эмня несэй ӈавэ мэбато’ сава ӈэӈгусь. Сидто’ намдавы’’, теда’ мале вы’ тер’’ нердена яӈгамдавы’’ аптечка ня’’марпа пяць. Ӈока хибя’’ саву’’ядо’.
Хибя’’ тарця няд’’мам’ ня’’ма пирта’’:
ты пэртя’’ мяд’ тер’’, ӈобӈэ илена’’ хибяри’’.
Тарцям’ ня’’амва’ няю’ няхар’’ ватом’ нёдабато’ серо’’ӈа:
•ненэць’ яна’’ тер ӈэбата тара;
•харе’’ тыда хусувэй тарана прививкасавэй’’, биркасавэй’’ ӈэбто’;
•пыда тэхэ’’на мюсерманда хавна, невхы ирината ила’ саирм’ нёдаванда нямна округна’’ системахана падбата серо’’ӈа.
Пардон’’ аптечкам’ ня’’амва’ няю’ падарм’ пада тараӈгу. Тикым’ харе’’ падбата ӈод’’, харвобта хибяхав е’’эйданда падамда, пад’’махаданда яхананда, районхананда ӈэда ветеринария’ центран’ мипата тара.
Тамна ӈамгэ тара?
•падвы падарта (ханзер’’ падыбада ӈэвамда нянда манэ’’лабтаӈгудо’);
•паспортада, илесь янда ненадумда’’ма, е’’эйданда хибяхав паднабата, ӈани’ паспортанда сидяӈг тараӈгу;
•паспортхананда илесь янда ненадумда’’ма яӈгоб’’, та’ ёльцяӈгана тэри округна’’ тер’’ ӈэванда нямна ненадумдавы падарта тараӈгу;
•е’’эйданда ӈани ненэця’ аптечкамд ня’’амбата, тикахана падвы падарта нотариусхана ненадумдавы ӈэбата тара.
Падрода мал’ сава’’ ӈэбато’ ненадумда’’масавэй падраком’ ня’’маӈгу. Ӈамгэхэванда яӈгоб’’, ӈани’ пырдари’ падрода тяхасовна ма’’лаванзь митыдо’. Юкад вата самляӈг яля’ ямбан’ аптечкам’ мимамдо’, нивамдо’ тасламбаӈгудо’. Сидта ханзер’’ хонрава’ нямна ты пэртя харта тасламбаӈгуда.
Ты пардон’’ аптечкам’ нибато’ та’’, несэйвана падрода яӈгамда пиртыда. Сававна ма’’ла’’махаданда ӈани’ яӈорэй’ падрода тэвра пиртыда.
Тюку по’ ты’’ пардон’’ аптечкам’ ёнаркад вата мяд’ тер’’ ня’’маӈгу’’.
Автор: Марина Яр’ падвы
Авторы
Няръяна Нгэрм
Темы