обновлено: 14:32, 19 ноября 2024
Няръяна Ӈэрм
Ӈопой паӈгва’’
Тюмень маркана носиндалава’ иры’ еркана ӈэрм’ тэнзм’ мэта’’ нина’’ ӈобт’ тэвормы’’. Тарем’’ вадито’, невхы иландо’ саирм’ лэтрамбава’ няю’ сава серм’ минре’’.
Ямалхад таня’ Нядаӈгарад’ тер’’ ӈэдалёрмы’’. Тандая’ нянандо’ лаханакурӈаваць. Тамальӈгана тамна ӈарка маркана мэвыць. «Ямал-нюна’’ я!» Ассоциация’ тер’’ нидо’ нядабавы’’. Вера Павловна Окотэтто маркана мядо’’мамда тарем’ ваде’’ӈадась:
— Маня’’ мале ӈармы ненэцяма’’. Невхы иринана’’ илам’ теневава’’. Нюна’’, нюна’’ ню’’ — ӈарка харад’ тер’’. Едэй иланд’ торомбэй’’. Тикы ёльце сава. Ӈопойри ими вомдабада сер’’ таня. Харто’ тэнзандо’ нямна ехэра’’. Илаӈганандо’ луца вадарим’ намдорӈа’’. Ӈадьбято’ харто’ вадамдо’ нидо’ мэс’’. Маньхартана’’ тарцява’’. Теда’ Россия яна’’ тиӈгэвна илена’’ ненэця’’ ненадо манзаям’ тидхалемби’’. 2022 поход вадина’’ лэтрава’ няю’ ю’’ пом’ мэ’’ӈава’’. Культура’ серо ня’’амбада’’ нина’’ сидна’’ хаця нерняку табедамбасеты’’. Ӈацекына’’ хыноць, тара тохоламбидо’. Маня’’ ӈани’ нядаӈгосетыва’’, хуркари’’ ненадо серк’’ ханласетына’’. Тюкон’ мале нябимдей по’ турӈава’’. Тюменской индустриальной университетхана сидна’’ ядабтамбиць.
— Торомдавы’’ нита’’ тэнзадо’ хурка’’ ӈэса’’? Ӈобкана ӈавэ сертабасада’’?
— Ехэрана ненэцяӈгат удмурт’’, манси’’, мариец’’ манэ’’ӈаваць. Ӈобт’ толаб’’, самляӈг тэнзваць. Ханяӈы’’ нина’’ небой поход теневына’’. Тюку по’ сидна’’ манэць ӈули’’ маймбиць. Сидя яля’ ямбан’ ӈобкана мэваць. Нюртей яля’ сэдъина’’ ӈадимдемба выставкам’ сертава’’. Концертхана сёётэй’’ нина’’ намдава’’. Нябимдей яля’ Андреевской то’ няю’ музеян’ ядэрӈаваць. Тикы’ хавна сэдораван харвана’’ тохолкурӈаць. Сидя няхаюни’ — Галина Граблевская няби Антонина Салиндер сёётэй’’ ӈэванди’ хавна мел’’ нехэ’. Няхарӈэ хэвханана’’ сэдораван’ харвана’’ ма’’лыць. Хусувэйдо’ мастер-класс’ пуд ӈудаханата ӈухуком’ ня’’амбись. Ненадовна университетхана тохолкода’’ студент’’ варемдо’ мэ’’ӈаць. Поӈганандо’ яна’’ тер’’ таняць. Сидто’ лахана ня’’ӈаваць. Ханзер’’ илевамдо’, тохолковамдо’ хонрамбиваць.
— Нянанда’’ турмы’’ ӈацекы’’ тэри ӈэдалёрца’’?
— Нянана’’ «Бисеринка» группа’ тер’’ турӈаць. Ихинандо’ яӈганя ненэцие торомдавадо’ ёльце илека ӈэвы ӈэӈгу. Няхар’’ не ӈацекэцява’’. Сидто’ тохоламбада — Любовь Бирюкова. Тамна нянана’’ ядэрмы’’ — Тусида’ мяд’ тер’’. Пыдо’ ӈобтикы хыно’’ӈаць. Не ӈаекы’’ ӈопой тарабцохонандо’ ӈэрм’ яна’’ ӈоди ӈадимдембиць. Нёлёкоця’’ мараӈгаӈэ тараць. Концертм’ маниевы’’ ненэця’’ ӈули’’ саву’’ядонзь.
Ӈани похона тев’ ёльцяӈгана нидо’ манэ’’манзь ӈани’ ӈобт’ ма’’лёда’’. Ӈацекы’’ едэй сёдамдо’, тарабцодамдо’ тохолаӈгу’’, ӈарка нидо’ мел’’ манзаидо’ хамедамбаӈгу’’. Маси’’ сито’ тотрев’ Ямална’’ тиӈгэвна илена’’ ненэця’’ ӈобтикы Тюмень март’ мядоманзь ӈэдалёрта’’.
Г. Окотэтто’ падвы
Сидяӈг’’: В. Окотэтто’, Г. Граблевская’ ӈэдабтавы’’
