Ӈопт каймяч дяԓяч

Чет’ дю’’ пуӈ чиԓьниймана, хома шоньшахана неч’ няш диԓиӈахаӈ. Алексей Григорьевич Киприӈ пушанта Наталья Алебувна няӈ ӈопт каймямч дяԓямч мэӈаханьш. Пычи диланч’ дямпан ты’’ падеԓьш «Верхне-Пуровский» совхозхана мансԓаӈаханьш. Хомана мансԓаманьч де’эмня куԓкаԓи’’ патԓоч, веԓву’’ мимы, тадя’’. Ӈопт каймяч дяԓяхананьч Алексей и Наталья Киприна сертификат’ мячисэӈаханьш.

Алексей Григорьевич Киприн Таркосалинский’ выӈкна ваԓныӈ диԓиӈ кашемдючимты дяԓяхана 1964 похона дяԓяманымы. Мята чеԓ’’ тэхэна’’ мансԓамай’’. Тамна нючаӈэ выӈкай диԓивсон, ты’’ падеԓьш тохомай. Нешамта нятапёш ӈука ӈайватам шеԓташтомай. Тыньшам паӈкаԓмам, кан мемам чедимямай. Выӈкай дилант таԓана шаӈкмян ӈамым шеԓтапата дёԓьше меԓь ӈаймай. Ӈаԓка няханата ты’’ падеԓьш вештомай. Таԓям чет’дяӈкня похонанта Алексей Киприн «Верхне-Пуровский» совхозан мансԓаш чепьмай. Неԓьчеэй нешанта няампёта ӈисын ты’’ падиԓчи’’ нятапёта ученикӈэ мэмытуӈ.

Ӈаԓмахатата, ԓэмта дёԓьшимы нешаӈӈэ каймяхатта 1981 похона ты’’ падеԓьш мансԓаш чепьмай. Дют пуӈ каймяхат совхоз хампԓяӈкты ӈисын бригадирӈэ няаммайтуӈ. Чикиӈ пут шан пуӈ каймяхат нимимты ӈисын бригадирӈэ мансԓаш чепьмай. Ватамта няампёта, вивӈутута бригадир’ ӈаймай. Таньдёԓьшкана ты’’ падиԓма дёԓьше шеэмна мансдя ӈаймай. Тэхэна мансԓанна’’ пон мюшаԓьштомай. Тытоӈ писамэй веԓаштомытуӈ.

Чикиӈ камна пдицы ԓуши’’ ӈычимахат, веша шехеԓы’’ шеԓтапёнԓмахат, тытуӈ шехэ’’ вомай’’. Тэхэна’’ мансԓаманта дямпан Алексей Киприн ӈутахананта ӈайта тэта’’ ӈисы пон хома патаԓт камаштомай. Куԓкаԓи’’ патԓота’’, хомана мансԓаманта де’эмня няаммайта, тадя’’. Ӈоптоӈ — почётная грамота Министерства сельского хозяйства РФ.

Мансԓаманта дямпан кявхананта шита нятапёш пушадюм Наталья Алебувна мэӈаш. Пычи чет’дю’’ пуӈ чена 1983 похона ӈопт кадяханьш. Няматаԓакуԓма дяԓяхана неч’ койчаньш. Таӈок пу’’ ӈокна, ӈуп вив мэш диԓиӈахаӈ. Наталья Алебувна дёԓьше чиԓьний ни. Хайтуԓапта меԓь, ӈайвапата ха’ӈа. Шаӈкмян выӈкай дилант таԓана мансдям шеԓтамам чедимяӈа. Алексей Григорьевич, Наталья Алебувна хампԓяӈк ни нюч’’. Чупей тохоԓкомы, таԓям четаӈ чиԓьниймана дилмтуӈ минԓеш диԓиӈа’’. Шича ни нюч’ выӈкна диԓиӈахаӈ, ӈупчики тэхэна’’ мансԓаӈахаӈ. Ӈыдитоӈ каԓтыхина диԓиӈа’’, тотуӈ хомана мансԓаӈа’’. Вcкохоӈ пушахаӈ нич’’ хомана ватамахатач, четаӈ нич’’ нюувдехе’’ майпёштухуӈ. Нич’’ нюувди’’ ӈопшеԓ — (18) шитчет’дяӈкня. Пон выӈкай мяканьч тошту’’. Вcкохоӈ пушахаӈ нюувдечи’’ куԓкаԓи’’ ӈамыдю’’, выӈкай дилант таԓана’’, шеԓтапёш тохоԓаштуч. Ӈайвамантуӈ камна мякнантоӈ нешаӈ ватамана мунушту’’, шутпяԓсу’’ мэшту’’.

Алексей Григорьевич, Наталья Алебувна манԓе пеншихина мэӈахаӈ. Мансԓаш тохомэхэӈ нешаӈк ӈучеч’ шема’’ ӈамчуман ниш’тухуӈ хас, таԓям четаӈ тыувдеч’ падеԓьш выӈкна диԓиӈахаӈ.

Лариса Айваседо патмы

Татма: Л. Айваседо таттамыта

Авторы

Няръяна Нгэрм

04:45, 08 сентября 2024

Темы