Няръяна Ӈэрм
Паднана не
Тандая’ ханя’ сава юнм’ намдаваць. Ӈопой яна’’ тер пирибтя ненэцие’’ е’’эмня толаӈгобцям’ падвысь. Ямална’’ толаӈгулава’ яха’’на хось пиртара’’.
Саляӈгардахана вадёданвы, тоходанвы Анфиса Сэротэтто «Мамако» нюбета книгам’ падвысь. Луца вадавна падвы иле’’мяда нюртейда. Тикында нерцю’’ харе’’ хэтвы хайнана вади падыбасеты. Пыхыдамда «Ругинский клуб»‘ тер’’ понд’ мэдась. Тедалахана тикы’’ няхатата ӈарка няд’’мам’ хомби. Ӈобӈгэв’ сита нерня’ пэраць нядаӈгу’’.
Ӈокханда ненэцие’’ е’’эмня ӈадимдеванда толаӈгобцяда няхар’’ юр’’ ӈэӈгу. Мал’ округна’’ паднани’’ падвы ялян’ ӈадимдембади’’ серо теневани’’ мандал’’ таром’ няд’’мяць ӈадимдеӈгуда.
Анфиса сертавы манзаянда ед’ тарем’ лаханась: «Тюку падвэми мале сян по’ манзая’’ӈавась. Ихинани ёльце ваде’’ман, манэ’’лабтаван харвавась. Толаӈгода’’ ненэцяӈг’’ илебей не’, Едэйне’ иле’’мям’ намдрамбаӈгудм’. Падвэхэнани хар’’н яни тер мэневами, ями сямами, ненэй не, небя саву’’мами ваде’’ӈадм’».
Ӈавна паднана няна’’ иринада, хаданада вымна мюсерӈаць. Едэйненда паӈг’’ ӈод’’ ӈани’ хой’ няд перенарха’’. Несэй иланд’ тэвавахана сита невхы’’ табеко’’ нядаби’’, нерня’ иланд’ табедамби’’.
Автор: Анна Яптик’ падвы
Авторы
Няръяна Нгэрм
Темы