Падта’’мида ненэцие майбтамби’’

Ныланава’ яляхана хардана’’ тер’’ «Сакральный мир кочевника» выставкан’ ядэрӈаць. Саляӈгарад’ тодо’’ тэнз’’ ненэцие’’ культура’ мякана ӈопой лохо’ мюня падтаӈгода’, мел’’ ненэця’ манзаи манэ’’лабтамбиць. Тованда похона Игорь Лемевич Худи си’’ив ю’’ поданда хандась.

Ма’’лёвана’’ нерцю’’ падта’’ми манэсарманзь хаядамзь. Юкад вата манзая’’ пир’’ тикахана ӈаць. Сертавэхэта сырпани вы’ яхани тэвнархадамзь. Неновна пыда ненэй ненэцие’’ хэхэ’’, хэбидя я’’, хэхэ’’ хан’’ нямна падтаӈго харвабтавэдась. Пыда Тасу’ я’ няна Тибей-Сале хардахана 1955 похона соявы. Пудана’’ похо’’ната Саляӈгардахана илевы. Манзаяданда мирмам’, ӈацекы падтаӈго тохоламбавам’ тэравы. Падта’’мида яна’’ ханяримна ядэлавыда: Москван’, Бернан’, Берлинан’.

Мел’’ ненэцие’’ мякана манзарана Ирина Окотэтто’ ня’ падта’’ми манэсаръянинзь. Лаханако нята нями тарця вади мэ’’ӈась:

‒Тюку по’ «Ямал-ню’’на’’ я!» ассоциация няхар’’ ю’’ самляӈг поданда ханда. Тикы’ няю’ выставкам’ серта таславаць. Падта’’ми И.С. Шемановский’ нюмам’ мэта музейхад ханэйнаць. Игорь Лемевич манзаяха’’ната хэхэ’’ нямна лахана. Падта’’мита поӈгана сямянхат мэненами — «Священные нарты». Ӈудада ӈули’’ сибицяко ӈэвы. Теда’ сита тотрев’ падтаӈго пыхыдадо’ тохоламбада’’ илебей’’ ненэця’’ ӈани’ таня’’.

Товы’’ поӈгана’’ Игорь Лемевич’ я’ тер’’, теневана’’ нида, не нюда, ассоциация’ тер’’ мэць. Пыдо’ мал’ падта’’ми манэ’’манзь, нямдо’ тензибтеванзь товыць.

‒ Хусувэй мэва ӈамгэхэв ненадо яляна’’ ӈэб’’, ӈобт’ ма’’люрпана’’ маня’’ яхана’’ таром’ ха’’авравы, илана’’ саирм’ сахарамбавы нина’’ тензибтембасетыва’’. Выставкан’ тованда’’ ед’ сава вади мэ’’ӈадм’, — «Ямал-ню’’на’’ я!» ассоциация’ ӈэвахана мэна Эдуард Яунгад мась.

Московский монетный двор нюбетахана манзарана Эдуард Тользин сита тохоламбавэмда тензибтембись:

‒Игорь Лемевич сехэрэми табедась, няни ӈарка таром’ ха’’аврась. Тедалахана’ пыда табекуда етри’ нёдэйн’, няданда тохолавэми ӈока. Сита тотрев’ Сергей Строганов’ нюмам’ мэта Москвахана ӈэда художественно-промышленной университетхана тохолко пэйваць. Таня’ тохолко хэвани е’’эмня си’’ми етри’ табедамбасеты. Ханяӈы’’ манзаида ханзер’’ падтамбаса сававна тенеян.

‒ Игорь Лемевичм’ сававна теневавась, пухуцяда мань яхадани, Овгортхад ӈась. Илаӈгана хуркари’’ сер’’ танясеты’’. Тарем’ ханяӈэхэ’’на ир вомда, минрена серт тябихобцоӈэ ханда, таранарха ни ӈэӈгу’’. Ханяӈы’’ падта’’мида мирдапа пяйдась. Тикахад мань няданда тэмдабинась, тэри мяканани ӈобт’ ма’’ламбинась. Тамна’ тяха’ танявандо’ е’’эмня, ӈацекы’’ манэсармандо’ е’’эмня тикы падта’’ми «Ямал — ню’’на’’ я» ассоциациян’ миць таслэйнась. Хусувэй падтаӈгодам’ тене серо’’ӈа — ӈопой сита теневавы няда тарця вади мэ’’ӈась.

Теда’ сертавы’’ манзаида И.С. Шемановской’ нюмам’ мэта музейхана, «Окружной дом ремёсел» нюбетахана, Тюмень хардахана ӈэда падтаӈгоди’’ музейхана, «Манеж»‘ мюня ӈа’’.

Анна Яптик’ падвы

Сидяӈг’’: А. Яптик’ тадтавы’’

Авторы

Няръяна Нгэрм

05:45, 11 октября 2024

Темы