обновлено: 09:39, 25 сентября 2023
Няръяна Ӈэрм
Падыбадидоʼ пилибтʼʼ таняӈгуʼʼ
Пэ саляʼ тер Виктор Окотэтто Санкт-Петербургхана няхаромдей поʼ тохолку. Сидя поʼ хэʼʼмяхад Ӈэрмʼ терʼʼ институтмʼ малеӈгу. Тикэмда ёльцеʼʼмахаданда ӈацекы ненэй ваданʼ тохоламба тасламби. Пяванда манзаянда харамʼ мале ӈахакуд торомдамбида.
Вэбаʼ ирыʼ 13 яляʼ пиркана нянаʼʼ юнмʼ вадеʼʼӈась:
— Тороваʼʼ. Мань тедаʼ Тазовский харданʼ тэвываць. Нянани Таймырхад ӈэда нями Евдокия Яптуӈэ ядэрӈа. Сидниʼ тюконʼ ненэй вадамʼ минрена Виктория Васильевна Валенкова (Вануйто) тэврась. Маняʼʼ юкад вата тет яляʼ Тасуʼ яхана мэӈгуваʼʼ, экспедициямʼ мэтаваʼʼ. Тохолкулава яхананаʼʼ виртуальной музеймʼ сертабиваʼʼ. Едэй «Трёхмерное моделирование» мутрамʼ нядʼʼмяць ӈэрмʼ терʼʼ илаʼ саирмʼ пилибтʼʼ лэтраванʼ харваваʼʼ. Ненэй ненэцяӈгʼʼ мядоманзь хантаваʼʼ, хонаркодаваʼʼ, тадтаӈгодаваʼʼ. Хуркари невхы лаханако, ярабц, ненэй вабц падыбаӈгуваʼʼ.
Пуна сян яляʼ пуд Виктория Васильевна лаханась:
— Таминда нюртеʼʼэʼ Ямаланʼ тось идейнаць. Тамна Якутиянʼ хэсь ятнаваʼʼ. Тедаʼ маняʼʼ Тасуʼ яхана тохолковаʼ серо минрена департаментанʼ тюӈгаваць, школа-интернатанʼ ханʼʼӈаваць. Ӈацекыʼʼ, ӈацекы тохоламбадаʼʼ нянаʼʼ маймбиць, минрена сермаʼʼ савуʼʼӈадонзь. Краеведческой музейʼ мюня ӈэда ӈамгэри тадтамбиваць. Тецьда музеймʼ манэʼʼӈаваць, музейхана манзарана Надежда Худи сиднаʼʼ таняʼ ядэлась.
Мэванда манзаядоʼ тамна ӈока. Тедаʼ Самбурганʼ ӈэдалэядʼʼ. Нинаʼʼ сероʼʼ ханзерʼʼ мимамʼ газетахананаʼʼ етриʼ вадетаваʼʼ.
Анна Яптикʼ падвы
Сидяӈг: В.Валенковаʼ тавы
