Няръяна Ӈэрм
Пэдариˮ илени нядабиˮ
Пэʼ терˮ няӈы пэдаравна ханелаваʼ ё лэтамбадаˮ ядэрмыˮ. Танянандоʼ пэдарахана илениˮ сармикˮ хадылавахаˮна самнелавыˮ сэроˮ ютеро хаевыˮ.
Ненэцяˮ яʼ ханярина пэдарахана иленаˮ сармик, нувʼ сармик лэтрамбидоʼ. Тарця манзаямʼ ханелаваˮ ё лэтамбадаˮ минредоʼ. Манзаранаˮ ненэцяˮ хуркариˮ поʼ ёльцьӈгана пэдариˮ илениˮ илмʼ манэсарць пэрӈаˮ. Сыраʼ няна, тецьдаˮ нуво мадабабнандоʼ ханяӈыˮ сармикˮ ныхысялворӈаˮ. Ёря сыраʼ ӈылад ӈаврадамдоʼ тэва сабе ниˮ пирасˮ. Нараʼ, пэдараʼ илениˮ ханитоʼ ӈадиворпˮ, нянандоʼ ӈаниʼ мэйрама тара. Таʼ ядембадахат, неняӈгахат, пилюхот, ниберёхот тасехалпатоʼ сармикэцяˮ ӈаниʼ ныхысялворӈаˮ. Тиканда яʼ илени лэтрамбава яхана самнелавыˮ сэроˮ ютеро хаеба пэрӈаˮ. Тарцяˮ ютеркаˮна сармикахаˮна ханзотаˮ хуркариˮ ӈаварʼ нядмаˮ таняˮ. Тиканʼ яӈэ няелкая лы, ӈуво, комбикорм пэрӈаˮ.
Пэʼ няӈы яʼ пэдаравна манзаятоʼ серʼ ядэрмыˮ нинаˮ неноховна хабартиˮ сарпиˮ минʼ серʼ ӈэдаˮ явна ханˮмыˮ. Тикыˮ яхаˮна ӈаволаваӈэ таславыˮ ӈэсяӈо сулормыдоʼ, ханеӈэхэˮна ӈаниʼ несэйˮ мимбвыˮ. Самнелавыˮ сэроˮ ютеро тикахана хаевыˮ. Тарцяˮ ӈаволавахаˮ ӈаниˮ хуркариˮ тэвасиˮ, тёняˮ, таряхаˮ, нохоˮ хадырць турӈаˮ. Тиканʼ туртаˮ сармикэцяˮ нись тоса хадырмандоʼ еˮэмня ӈаволавадандоʼ мэта ӈэсяӈодоʼ сававна тидхалея мимбидоʼ. Тарцяˮ хадырць мэтаˮ ӈаво есиˮ хэвхана сертабидоʼ. Тиканда пэдараʼ иленяˮ хадыромахадандоʼ идʼ някуʼ идарманзь хантаˮ.
Таремʼ хадылаваˮ яхана хаевыˮ самнелавыˮ сэрˮ пэдариˮ илениˮ няюʼ ӈарка нядˮмаӈэ тараˮ. Ямалʼ янаˮ пэдарахаˮна иленаˮ сармикˮ пилибтˮ таняяˮ.
Автор: Нюдяне Махакуйʼ падвы
Сидяӈг: Марина Ярʼ тадтавы
Авторы
Няръяна Нгэрм
Темы