Няръяна Ӈэрм
Пэдаваˮ ӈацекыˮ
Саляӈгардахана пэдаваˮ нинаˮ «Арктической олимпиада»хана варемдоʼ мэˮӈаць. Хибямдоʼ сямянхат иӈудотаӈэ тэравамдоʼ мале намдаваць. Тикы пирдырма тохолкодаˮ ӈацекыˮ еˮэмня сертавы. Ӈарка классахаˮна мэнаˮ тодоˮ тэнз ӈэрмʼ терˮ теневабцудоʼ ӈадимдембиць.
Нюдя пэвдей ирыʼ сидя юˮ матдомдей яляхана нюртей маˮлёвадоʼ тохолковаʼ серо минрена департаментʼ ӈарка лохоʼ мюня ӈась. Ямалʼ тиӈгэвна иленаˮ тодоˮ тэнзˮ ненэциеˮ илаʼ саирмʼ, невхыˮ похоˮна ӈэвыˮ серо теневавамдоʼ тасламбиць. Округнаˮ школахат сиддоʼ тохоламбадаˮ ӈарка нидоʼ няць товыць. Ӈокханда сидя яляʼ ненэй, хабиˮ, тасуʼ хабиˮ, ӈысмиˮ вадавна теневабцудо хорпа паднаць. Тюку поʼ Пякуˮ яхад, Сиˮив харв хардахад ӈэдаˮ интернетувна паднаць. Ямальской, Приуральской районхад, Тасуˮ, Ӈысмиˮ яхад товыˮ ӈацекыˮ варемдоʼ мэˮӈаць.
Пуна няхаромдэй яляхана ӈаниʼ маˮлыць. Ханяӈэндоʼ нита нерняʼ хаˮамвамʼ намдаванзь тоць. Маниебˮ хусувэндоʼ инда ӈылʼ сейда няркнанаˮ тоˮолхась. Сертабавы манзаидоʼ етя манэсармыˮ поӈгадандоʼ няхататоʼ ваˮлёйдоʼ вадеˮӈаць. Нитоʼ пуд нюбедоʼ хэтыбиць. Сидя номинациядоʼ ӈэвысь. «Арктическое краеведение»хана Вера Ӈокдэттамʼ тэравыць. Пыда Приуральской районхы Белоярск хардахад товысь. «Родные языки Севера» номинацияхана Новый Портхад ӈэда Виолетта Вануйто нерняʼ хаˮамвыць. Тикы нянда пуд Ӈэдяʼ хардахад товы Анфиса Яр сававна паднавысь. Панаевскʼ тер Евгений Сядай няхаромдэйӈэ тэравэдонзь. Хусувэхэндоʼ ненадумдаˮмаʼ падарм миˮӈаць. Тикыʼ хавна малʼ ӈокхандоʼ пирдырмыˮ ӈудитоʼ терад няˮмаць. Няндоʼ сейхад ӈэда сава вади мэˮӈаць.
Тарпавандоʼ нерцюʼ тохолкоди хонрамбинась. Евгений таремʼ лаханась:
— Мань юдимдей классахана тохолкудмʼ. Ненэй вада уроками ӈулиˮ сававна теневавась. Тедахавʼ ваданаˮ урок юӈгу. Пирдырманʼ хамекудамзь. Ӈахат тохолавыˮ теневабцуниˮ мэˮӈадамзь. Сиднаˮ тохоламбадаваˮ Надежда Сэромовна олимпиадахана мэванзь сиˮми тэравысь. Экспонатмʼ сертабидамзь. Пуна сертавэми вадеˮӈавась, манэˮлабтамбивась.
Анфиса тарця вади хэтась:
— Людмила Иавновнами сиˮми тохоламбись. Тарця олимпиадахана нюртей мэваʼ пыхыдами хорпидамзь. Школахана районнаˮ тиӈгывна ӈэвы пирдырмахана мэдамзь. Ненэй вадавна няби Ямалнаˮ невхы илеˮми тохоламбавахана сиˮми тэравыць. Салехарданʼ товани нерцюна вареми мэць хамекудамзь. Сян яӈорэйʼ теневабцуниˮ ихинани тензебтембинась. Ниниˮ поӈгад нябимдейӈэ сиˮми тэравадоʼ ӈулиˮ сава. Вареми мэˮӈадамзь. Ӈани похона тутнакэдмʼ. Тедахавʼ теневадама.
Ненэй вадамˮ пэртя Зоя Хосевна тарем' лаханась:
— Тохоламбадаˮ ӈацекыниˮ ханзерˮ вадёдавамдоʼ, тохолковамдоʼ, ӈамгэмʼ пэрмамдоʼ ӈобˮ маниесетыв. Тетимдей классанʼ тэввандоʼ ёльцяӈгана мале теневасетыдмʼ: ханяӈэдоʼ ненэй вадамда сававна тохоламбаӈгу, вадиˮ хари сававна хамэдамбаӈгу, иланда саирмʼ, выӈгы иламда теневаӈгува. Вадамда мэта невхыˮ ирината-хаданата иландʼ сейда тосаӈгу. Тикымʼ тасламба етриʼ нерняриʼ яднарха ӈэӈгу. Хусувэй классахана мале сян тарця ӈацекэми ӈэсеты. Тедаʼ юкад вата ӈопой классмʼ пэртя не ӈацекэхэюниʼ таняӈахаʼ. Ёльце пирˮӈадиʼ. Вадамдиʼ теневадиʼ. «Всероссийской олимпиада»нʼ хэвандахаʼ. Ӈани похона тюконʼ товандаˮ ӈацекыниˮ таняˮ. Тось ялэнаˮ тедариʼ пунсиˮ. Тохолкодини луца вадахад падвы ненэй ваданʼ тэвола тохоламбасетын. Таддикахад ненэй вадахад луца ваданʼ тэволасетынаˮ. Стихотворенияˮ саваˮ ӈэсетыˮ. Тикыʼ серʼ вадиˮ хари хамэдамбадаˮ таминдоʼ ӈадьсетыˮ. Ненэй вадавна лаханакуркава мал теневасетыˮ. Тюку похоˮна ӈацекыˮ вадитоʼ поӈгана луца вади нядʼмяць лаханакурць пэрӈаˮ. Тандаяʼ школанʼ товэкоциниˮ сидя вадахана лаханасетыˮ. Едэйˮ мутрыˮ серʼ телефонхаˮна ӈаводикы маниеˮма. Хуркариˮ сянако мэтакыˮ. Ханяӈыдоʼ тидхалемба тарасетыˮ.
Ненэсянда ӈацекыˮ иландоʼ саирмʼ, вадамдоʼ теневабтоʼ тара. Тарцяˮ пирдырми сертабавадоʼ сава. Хусувэй харвана теневабцуда манэта. Сиддоʼ тохоламбадидоʼ ӈахакуд ятналтамбасетыдоʼ.
Автор: Руфина Окотэттоʼ падвы
Авторы
Няръяна Нгэрм
Темы