Няръяна Ӈэрм
Пэхэрэй тэволаˮ
Округхананаˮ ханяӈы яхана ӈобкарт нероˮ ясʼ яӈгу. Мюсерта ненэцяӈгаˮна тикада саць ӈарка маяʼ. Пясипойˮ тецьда яхана иленаˮ мятоʼ ядемда, ӈаврадамдоʼ пире нидоʼ пиратˮ. Таремʼ ӈодˮ сяхаӈгартʼ пуняʼ ниˮ ӈаˮ. Пыдоʼ тоенана илаӈгандоʼ торомбэйˮ, невхы иринатоʼ илаʼ саирмʼ тамнаʼ тяхаʼ нёдадоʼ.
Таремʼ пясьда ёˮ няʼ ӈыхы похот пядамдоʼ тэврамбиˮ. Тарця сермʼ округнаˮ тиӈгэвна минредоʼ. Пямʼ ханаваʼ няюʼ есямʼ салдамба ни тараˮ.
Хэвы сиˮив яляхана Сёяхаʼ харданʼ пэхэрэй терта ту ӈано нултадась. Ӈокханда 1400 кубмʼ тэвравыць, тикахат 250 кубмʼ яхаʼ лаӈгхана хаеӈгудоʼ. Мюсерта ненэциеˮ мэлвахаˮ сыраʼ тэволаӈгудоʼ.
Яханандоʼ Нёйˮ тоʼ няюʼ ӈонабидоʼ, невхы пэндъяˮ мэлванʼ хаеӈгудоʼ, ханяӈыдоʼ Вэнуево яхаʼ няюна ӈонабидоʼ. Тикыʼ хавна тамна Юн яхаʼ, Паруй яхаʼ ёльцяндʼ тэврамбидоʼ. Сямянхат ӈыхы яхана ӈэда яӈэ Марра саля толы.
Таремʼ тэвравы пэхэрэйхат мюсертаˮ ненэцяˮ таӈга пядамдоʼ ханлаӈгуˮ. Сяӈокмʼ ханавамдоʼ хибяхарт нида толабаӈгуˮ.
Марина Ярʼ падвы
Сидяӈг: Марина Ярʼ тадтавы
Авторы
Няръяна Нгэрм
Темы