Няръяна Ӈэрм
Пиԓи хаʼта мянаԓма
Чуки похона Ягельхана пиԓи хаʼта мянаԓма — «Таежный герой». Чикехена нэхэмтуӈ, нюӈк ӈаймямтуӈ конуԓпёш четʼдюˮ няхаԓ команда мянаԓяшˮ. Матапётатуӈ ӈутоӈ кунта 1,5 километраӈ дёԓьшаш. Ӈопшеԓ няхаԓдяӈкня этапʼ мянаԓьтаˮ конуԓяшˮ. Ӈуп командахана четʼ мянаԓташˮ — шича ни, шича каса. Маняˮ неша ненаˮ командаˮ — «Харвэй», «Романтик», «Росинка», «Северяне» ӈупчики чикидю поӈкна хомана мянаԓяшˮ.
Чуки похона няхаԓдяӈкня этаптоӈ чупей неньшаԓмана матананаˮ нишʼӈаˮ. Таежный геройхана мянаԓма понхата ӈаԓкамана хаʼӈаш. Таӈок нешадиˮ поӈкна мянаԓма неньшаԓ нишʼӈа, чикехена ӈотнаӈ маняˮ неша ненаˮ таньше нюӈкмана шуԓвиԓьш, куԓкаԓиˮ пиԓьшаˮ ӈамэхэˮ тантоԓьш, вичиˮ подюмана дятэԓьш пиԓӈатоньш. Шаӈкмян ӈамыдётоӈ ӈуп вин камоԓьш шеԓташтутоньш, таԓям ӈуп нэхэм мэш дёԓьше хомана мянаԓяшˮ.
Таежный геройхана ӈайвахай местам «Темп» канаӈата, нимимты местан «Неудержимые» каамдят, няхамты местаʼ «Профсоюзные моржи» нимита командаӈ ӈутахана кадя. Маняˮ ненаˮ команда «Северяне» таӈок мянаԓчиˮ поӈкна четʼты местам канаӈа. Мянаԓмыˮ поӈкна ӈыдиˮ неша ненаˮ командаˮ — Каԓясамэхэт мэнаˮ «Романтик», Каԓпюԓкана ӈайта садикхат мэна команда «Росинка», Каԓпюԓ чеԓˮ нешадиˮ «Харвэй» чупей «Топ-10» каамдятˮ. Мянаԓма дяԓя хитай. Пуӈчена ӈай «Таежный герой» мэмятаˮ, пиԓи хаʼтаˮ, нюӈк нешадеˮ ӈопт ӈомтанайта.
Андрей Пяк патмы
Авторы
Няръяна Нгэрм
Темы