Няръяна Ӈэрм
По’ ямбан’ ӈатена’’махадандо’
По’ ямбан’ ӈатена’’махадана’’ ты пэртя’’ Сянакова’ яля’’ пэяд’’. Хэбидя’’ ялэна’’ ты’’ ниць иры’ това’ нерцю’ малеӈгуд’’. Ӈокханда округна’’ тиӈгывна сидя ю’’ мат’’ хардахана тарем’ ма’’люрта’’. Хэвы сидя ныланавахана ӈарка ненадо хэбидя ялям’ Нядаӈгарад’ няна мэ’’ӈаваць. Хусувэй по’ пыдо’ яндо’ няна нерня мэцетыва’’.
Тюку по’ ты пэртя’’ няхар’’ юдимдей мэва’ пирдырӈаць. Яна’’ ӈэвахана мэна ервана’’ ненадо ӈуда’ терм’ матопиць. Округна’’ ханярид юкад вата хасую’’ сёбар’’ мандал’’ товыць. Тёняӈы хахаяда Хаби’’ яхад ӈэда’’ ӈани’ таняць. Ӈокханда пирдырмы 190 ненэцясь. Сямянхат ӈокавна Ямальской район’ няд товыць, сидндет мандалтонзь. Ӈани’’ нидо’ нядандо’ тянёркаць. Тасу’ я’ няд тетрись. Нядэй яхад няхар’’. Пэ’’ няд, Пяку’’ яхад, Шурышкарской районхад ӈопой’’мана ма’’лавыць.
Ненадо Сянакова’ ялям’ нермбэртява’’ нэмбидась. Хэтуванда вадида маня’’ нунаӈэ ёльце ӈатейнаць. Ты пэртяха’’, хардахана иленаха’’, хэвняд ядэртаха’’ ма’’нисяв: «Няхар’’ юдимдей мэва’ тюку ян’ ма’’люрӈава’’. Пэдарата яхана сяхаринда сидна’’ сававна ядабтасеты’’. Ӈобт’ тэвавана’’ сер’ тецьдахартада яӈгода то’’олха. Ненэця’’ няхато’ тэри маймби’’. Яна’’ ӈарка ерв’ табековна Тодо’’ тэнз’’ ненэцие’’ ӈоб’ няю’ нятва’ пом’ мэ’’ӈава’’. Ненэсянда ӈод’’ ӈэрм’ тер’’ ила’ саирм’ тамна ханяхартана тарем’ нир манэт’’. Тарця хэбидя ялярихина манэтар. Ӈадьбята ты пэртя’’ Сянакова’ ялэ хуркари’’ марка’’на, нюдяко’’ хардаха’’на сертабина’’. Хой’ няӈы илм’ ехэранахана тикэр неновна нюрцям’».
Яля’ ер’ нерцюна подермы хан’ ты манэ’’лабтамбиць. Тыто’ ё’’ иня’’, сёя’’мя’’, ямдётана’’ пелей’’ иня’’ ӈули’’ сомбояць. Ӈобкарт ӈобтолас халцо’’лы, пясик, сян яӈгусь. Хусувэй хибя ханяӈы хан сава ӈэвам’ харта тасла, тэра пирӈадась: падроко ӈэся’ мю’ моёпиць. Пуна сырахад ӈонавы ӈарка пирмда’’ма’ хэвувна ханодо’ валкая ядаць. Сэй’’махадандо’ таранаха’’, сё мэтаха’’ сырць пэйнаць. Сёбар’’ ненэця’’ ӈоб’’ пуд ӈадимяць. Ӈамгэ яхад ӈэвамдо’ хамэдава’ пирась. Си’’ив яхад товы’’ мальцито’ таӈга’’, махато’ няна пададыдо’ мал’ яӈгаць.
Сянакова’ ялям’ нэ’’махадандо’ хубтыхы пявы’’ пирдырма’’ ӈани’ пэйдаць. Нюртей яляхана яркулава, хано санарпава, тэхэ’’на няваталаӈго ӈэдалёва, таро’’ма, этнобиатлон ӈаць. Нябимдей яляхана — ламбита сюрамбава, не’’ няби хасев’’ ныхыдырма, сюрамбахая няхар’’ мэва санарма, хулейма. Тикы’ ирмня сидя яля’ сер’ «Кочевая семья» конкурс, лекар’’ сертабада’’ «Медицина — всем и каждому», «Ты пэртя, сензан ӈа’’», «Чтобы сберечь традиции — сохрани здоровье» акция’’ ӈаць. Сё мэти’’ «Открытый микрофон», «Магия тундры» няби «Три солнца» концертха’ ӈаханзь.
Автор: Анна Яптик
Авторы
Няръяна Нгэрм
Темы