Няръяна Ӈэрм
Сайнортаˮ нидоʼ нядабиˮ
Ямалʼ терˮ тедаʼ сайнортаˮ нинаˮ нядаба варемдоʼ мэˮӈаˮ. Тецьдаˮ нумгана мэˮмандаˮ ембдяро, хасуй ӈаврадамдоʼ, тамна ӈаниˮ таранаˮ ӈаворидамдоʼ маˮламбиˮ.
Тандаяʼ тарця сава юнмʼ Нядаӈгарадʼ няд намдаваць. Таняна тодоˮ харадʼ терˮ нядаӈговыˮ. Нареʼ терˮ тянё ӈэбтоʼ ӈодˮ маˮлавыˮ нядˮмидоʼ ӈокаˮ. Школахана, толаӈговаʼ мякана, нюдяко ӈацекыˮ садикхана манзаранаˮ хартоʼ есяханатоʼ СВОʼ няна мэнаˮ нитоʼ еˮэмня тарана ӈавори тэмдавыˮ. Тикыдоʼ таславы янʼ ханавыдоʼ. Таняд сайнортахаˮ ӈэдабтаӈгудоʼ. Тадриʼ едэй поʼ товаʼ нерцюна тохолкодаˮ ӈацекыˮ юнˮ падро падыбаӈгуˮ. Ӈаниʼ сайнортаˮ нитоʼ толавандаӈэ ӈэдабтаӈгудоʼ. Сиддоʼ тохоламбада нидоʼ няць мядонзэйкоци сертаӈгуˮ.
Нядаӈгардахана иленаˮ неˮ ӈобтикы тэри ниˮ ӈамдюˮ. Хусувэдоʼ ныхында пирувна ӈамгэхэби сертаби. Тандаяʼ «Ямал-нюˮнаˮ я!» ассоциацияʼ терˮ ӈобтʼ маˮлюрмыˮ. Ханяӈыдоʼ лыӈгӈэ мэтаˮ поӈга паӈгалпиˮ. Тикыдоʼ тюˮуд нивандоʼ ӈадьвандоʼ еˮэмня тасехэяркаˮ, падярахаˮ хэбицякована матормыˮ тохоцяˮ пелякоцяхаˮна сяропидоʼ. Тамна шлемʼ ниʼ серыбадаˮ саварахаˮ поӈга паӈгалпиˮ. Ӈобтикы тодоˮ тэнзˮ тохоцякохоˮна сярыбидоʼ. Тарцямʼ мэта ненэцьʼ тюˮуд ни ӈадяӈгуˮ, яʼ тоˮолха ӈэӈгу. Саюхат таремʼ лыӈгарёда.
«Ӈобкана ёльце ӈарка таромʼ минреваˮ. Сайнорта хасава нюнаˮ нядабиваˮ. Ныхынаˮ пирувна сенз ӈэвамдоʼ лэтрамбиваˮ. Ӈобтикы нядаӈгованʼ харвабатаˮ нянаˮ тодаˮ. Тедаʼ мэць малевыˮ тохоцядваˮ пюрӈаваˮ. Тикынаˮ маторˮмахаданаˮ поӈга паӈгалпа мэтынаˮ. Ӈармыˮ нинаˮ тамна насак паӈгалпиˮ. Любовь Филиппова яблокхат ӈамнялада ӈаврадамдоʼ сертаби, луца вадавна пастилаӈэ нюбеˮянаˮ. Луиза Поронгуй нюнда нюмʼ няць яблокˮ ютекэци тырабтамбихиʼ.
Галина Окотэттоʼ падвы
Авторы
Няръяна Нгэрм
Темы