обновлено: 06:50, 19 ноября 2024
Няръяна Ӈэрм
Санэро’’ я’ няна пирдырмы’’
Тодо’’ ӈэрм’ ё’’ сёбар’’ Россия яна’’ ненадумда’’мам’ мато’’паванзь Сыктывкархана ма’’лёвы’’. Ямал’ тер’’ таняна ныхыдо’ ӈани’ манэ’’лабтавы’’. Пыдо’ сямянхат ва’’лёй ӈэвы’’.
Юр’’ мян ӈэрм’ тер’’ помнандо’ пирдырмы’’, ӈэрм’ ёто’ сянакубц мэ’’мы’’. Хибя’’ тубкамда няхатата ӈаха’’ моӈгуда, ӈока хан’ тяха’ санаӈгу, няхар’’ яӈорэй’ санар’’махана нита нерня’ ха’’маӈгу, тынзяӈгананда тюрм’ яркаӈгу, сюрберць нида нертеӈгу. Тарця’’ теневабцудо’ хорпавы’’.
Нюртей яля’ Алексей Ворошилов Ӈэрм’ тер’’ сянакубц’’ федерация’ ӈэвахана мэна пирдырмито’ нямна тарем’ лаханась:
— Тарця’’ сёбар’’ сянакубц’’ невхы илаӈгадандо’ пере’’. Иринато’ ила’ паӈгӈэ таравы’’. Ӈэрм’ ё’’ няна илена’’ пэдарахана, выӈгана харто’ ныхыхыто’ ена’’. Тев’ ёльцянд’ ты пэрмахана, ханевандо’ мальӈгана невхы теневабцудо’ мэ’’эйдо’. Ӈадьбято’ ёльце мэбе’’ӈа’’. Пирӈадо’.
Хусувэй пирдырма’ нерцюна сёбар’’ ненэця’’ пыхыдадо’ высылабтамби’’, масидо’, ӈэсоӈодо’ вэнпи’’. Ӈамгэ’ е’’эмня тарем’ сертабавамдо’ Якутия’ няд товы Георгий Сафронов юне тэволанаха’’ ваде’’ӈадась:
— Ненадовна махами, пулыни манзабтана то’’олхадм’ ӈэсетыдм’. Тарем’ ханяцей мэйрёдадм’. Ханяхартана нидм’ тапхалт’’. Ӈэни’’, ӈудини’’ сенз’’ ӈэӈгу’’.
Андрей Кайнинан Чукотка’ сёбар’’ ӈэвахана мэна пирдырмидо’ тоенанаӈэ ваде’’мыда:
— Хано санарпава — саӈговота сер’’. Пыхыдадо’ ёльце мэйрамбабато’, таслахая’’ санарпато’, тикырихина ӈока ханм’ пирдалеӈгу’’.
Мале нябимдей яля’ пирдырмахадандо’ Санэро’’ я’ няд сава юнм’ намдаваць. Ямал’ тер нява’’ Сергей Лаптандер 345 мэва’ тюрм’ яркавы. Юкад вата ӈопой ӈэрм’ ё’’ терхат сидта пир’’ яӈговы. Матвей Лаптандер тюрмда 78 мэва’ ярквэда, нябимдей ям’ ханавы. Юрий Лаптандер 77 мэва’ тынзямда явнанда мовэда, няхаромдейӈэ хэвы. Тарем’ яна’’ тер’’ хибяхартм’ нерня’ нивы’’ ӈэдара’’. Тубци моёпадахат Григорий Окотэтто са’’мы.
Пирибти’’ поӈгана’’ пям’ ня’’амба сюрберць Эдита Ламдо мере’’мы. Пуданда Юлия Молодых товы. Маргарита Лаптандер няхаюта няд хаця хаёвы, няхаромдэйӈэ хэвы.
Ӈоб’’ сер’ пирдырмаханандо’ Ямалхад ӈэдалёрмы’’ сёбар’’ нюртей ям’ ханавы’’. Ӈани’’ ё’’ тер’’ нидо’ мал’’ пирдалевыдо’.
Г. Окотэтто’ падвы
Сидяӈг: yamal.sport.official няд ханавы
