Няръяна Ӈэрм
Сава ненадумдаˮмамʼ няˮмавэхэʼ
Россиянаˮ ӈэвахана мэна ерванаˮ табековна «Родительская слава» орденмʼ Ямальской районхад ӈэда мядʼ терхаʼ няˮмавэхэнзь. Елё Янкович няби Галина Амсосивна Худи тет юˮ самляӈг поʼ ямбанʼ хынёсиˮ илеˮӈахаʼ.
Пыдиʼ ты пэрма иламдиʼ тамна минредиʼ. Ненэй ненэцяˮ илаʼ саирмʼ лэтрамбихиʼ, нюхутиʼ, нютиʼ нюхуˮ ӈадимдембидиʼ. Ӈобанзерʼ сиˮив нюмʼ вадавэхэʼ. Галина Амсосивна ханзерˮ ӈобтʼ тэвˮмандиʼ нямна таремʼ лаханась:
— Небяхаюниʼ-нисяхаюниʼ няхарˮ нюмʼ вадаӈаханзь. Мань няхатаниˮ нюдядмʼ. Сиднаˮ хусувэй ӈамгэнʼ тохоламбасетыхыʼ. Небями нюдяко ӈэдаханиʼ сэдора, ӈаниˮ ӈаводикы сертаба табедамбасеты, тохоламбасеты. Ӈадьбяниʼ хусувэй ӈамгэмʼ пирӈадмʼ. Вэсакониʼ няʼ ӈавнаниʼ ниниʼ ехэрынинзь. Елёмʼ тэрихив манэпасетыв. Лаханако няць ехэравась. Сидниʼ нисянаниˮ-небянаниˮ нелець. Вэсакони мяд терˮ мякнаˮ тоць. Таминʼ небяхаюниʼ-нисяхаюниʼ хаюпа сиˮми миˮӈаханзь. Тедахавʼ нюˮниˮ ню вадаба нядаӈгуниʼ.
Галина Амсосивна няхарˮ юˮ поʼ ямбанʼ вэсакомда выӈгана нядабись. Мята мюймʼ минресь. Сэдъида хуркариˮ меладˮ ненэцяˮ пирдырмахаˮ ӈэдабтамбавыда. Ханяӈэхэˮна нита поӈгад нерняʼ хаˮморцетвы.
Елё Янкович сидя юˮ поˮ ямбанʼ «Яр-Салинский» совхозхана ты пэрӈась. 2021 похона «Почетный оленевод Ямальского района» ненадумдаˮмамʼ мэтаӈэ тэравэдонзь. Тикыʼ хавна хано, со сертабасетавы. Пыда тарць вади хэтась:
— Мань ӈокханда самляӈг юˮ сиˮив поʼ манзарадамзь. Армияхад тоˮмахаданиʼ сидя поʼ ямбанʼ ты пэрӈадамзь. Пуна бригадирӈэ сиˮми тэраць. Комсомольско-молодежной бригадамʼ Новой портхана маˮлаваць. Пенсиянʼ хэˮмяхаданиʼ самляӈг поʼ малкодаӈэ тарадамзь.
Сиˮив нюмʼ ӈэтоʼ ниʼ санабтавэхэʼ. Нисянда минревы манзаямʼ тамнаʼ тяхаʼ ӈарка хасава нюдиʼ — Василий Худи тидхалембида. Александр — тыˮ лекар, Сергей няби Павел хойʼ няна илеӈахаʼ, Геннадий Худи яʼ тебтмʼ нэкалпавахана операторӈэ тара. Хусувэдоʼ харта мядʼ терсавэй. Не нюхуюдиʼ — Юлия Худи лабкаʼ митняӈэ тара. Татьяна Худи Яр-Саляхана ӈацекыˮ лекарˮ мякана манзара. Небяхаюта-нисяхаюта едʼ сейхад ӈэда сава вади мэˮӈась:
— Небями не няниʼ няʼ сэдора, надорць, мядʼ мюй сероˮ пэраць сидниʼ тохолась. Нисями хасава ниниˮ хой илаӈгана таранаˮ ӈамгэхэˮ табедамбасетыда. Тедаʼ ханяӈынаˮ хардахана илеˮ. Таремӈодˮ тыˮ мякана иле пиртаваˮ.
Елё няби Галина Худихиʼ нютиʼ нюˮ мякандиʼ тэворӈаˮ. Пыдиʼ пенсияхана мэӈахаʼ. Сензӈэ илеяхаʼ. Илеваʼ минреня тудиʼ ӈобʼ туˮӈая.
Руфина Окотэттоʼ падвы
Фото: Сидяӈг: yanao.ru няд ханавы
Авторы
Няръяна Нгэрм
Темы