Няръяна Ӈэрм
Сава ӈудаʼ терˮ
Ямалʼ ӈэвахы ервʼ табековна округхананаˮ Ӈацекыˮ помʼ мэˮӈаваˮ. Тикыʼ няюʼ хорˮ ирыхына Ямалʼ тиӈгэвна школахана нюртей поʼ тохолкодаˮ мядонзэйдамдоʼ няˮамвыˮ. Ненадо лабтэйкудоʼ «Мой Ямал. Край, в котором я живу» нюбеˮӈаˮ.
Мюняндоʼ хуркариˮ тохолковаʼ мальӈгана мэˮмандаˮ ӈамгэрикодоʼ ӈаˮ. «Ямал — территория детства» программаʼ серʼ Ӈэрмʼ янаˮ невхы иламʼ тохоламбаӈгуˮ. Тикыʼ хавна тамна ӈани теневабцудоʼ ӈокамдамбаӈгуˮ.
Толаӈго книгадоʼ ёльце паской, таняна Ямалʼ нямна мэкад илеˮми хоӈгуˮ. Ӈэрмʼ янаˮ ӈардавна иленаˮ яʼ сармик, нувʼ сармик манэтаˮ. Яʼ сярʼ ний нероˮ, пяˮ, малˮ ӈулиˮ сомбовна падтавыˮ. Выӈгана иленаˮ ӈацекыˮ илека ӈавэ толаӈгуˮ: ханзерˮ яʼ индадмʼ, яʼ тебтамʼ нэкалпиˮ, ханяна сэрˮ явэˮ илеˮ, хуркаˮ нувʼ сармикˮ сыраʼ яхананаˮ хаюрӈаˮ.
Сидтоʼ тохоламбада ӈарка нядоʼ Сэротэтто Луиза Павловна таремʼ ида ядэрӈа:
— Невхы иринатоʼ илаʼ саирмʼ ехэранаˮ ӈацекэхэˮна лаханакурпанаˮ нядˮмаӈэ мэтынаˮ. Харадʼ терˮ ӈацекыˮ выӈгы илмаˮ ехэрадоʼ, книгамʼ нядˮмяць ты пэртиˮ, ёртиˮ, ханениˮ манзаи манэтаˮ. Тикыʼ хавна яӈганя тэнзмʼ мэтаˮ ӈобтикы илнаˮ саирмʼ тохолаӈгуˮ. Тамна хартоʼ сянакодамдоʼ серта пиртаˮ. Ямалʼ янаˮ ненадумдаˮми теневаӈгуˮ, сянда яʼ сармикˮ нямна табеко хоӈгуˮ.
Лабтэйкондоʼ терˮ хавна тюку поʼ вэбаʼ ирыхына Арктической азбука нюбета книгадамдоʼ няˮмаць. Падтаˮмида ӈулиˮ сомбойˮ. Неноховавна лаханакосавэй. Толаӈгобтоʼ, ненэй ненэциеˮ хавна хабиˮ, тасуˮ хабиˮ илаʼ саирмʼ торомдаӈгуˮ.
Г. Окотэттоʼ падвы
Сидяӈг: Л. Сэротэттоʼ ӈэдабтавы
Авторы
Няръяна Нгэрм
Темы