обновлено: 10:30, 15 ноября 2024
Няръяна Ӈэрм
Сёда сита ӈыхы ян’ тэвра
Мале ӈока’’ ялэ’’ тяхана редакцияхана’’ сё мэта илебей ненэць’ тюӈгась. Пыда несэй ян’, Ямалхадна’’ хахаяда ян’ хэванзь ятнась. Инда ядэрабцо ваде’’манда сер’ маймбадарка, тарси’’ соя’’ма’ яхаданда хаця хэван’ ниня харванарка то’’олхась.
Ӈобаӈгуна интернет мутравна «Хаяр» ансамбльм’ еде’’ӈадм’. «Су’’ляко» сём’ мэ’’мы’’. Хыноти’’ поӈгана тандая’ турмы нява’’ манэ’’ӈадм’: Евгений Худи Нярьян-Мар хардан’ тэвавы’’. Пуна ма’’нидам’’, хонрахарцяв, ханзер’’ няби ӈамгэ таня’ хэсь таславэкэда?
— Нярьян-Март’ сававна тэвсян? Ӈамгэхэна минсан? Сит нядабадар таняса?
— Марад’ ӈэсонд’ таӈга тэвываць. Ӈэдалавани нерцю’’ ӈахакуд хонаркудамзь, си’’ми ӈатенини ӈод’’ табекуць. Нерня’ и’’имня ту ӈанохона Саляӈгардан’ хаядамзь. Пуна еся сехэры’ сер’, тиртя ӈанохона миӈадм’. Ёхова’ пир ни ӈа’’, сяхаринда интернет мутрам’ няд’’маӈэ мэ’’ӈадм’.
— «Хаяр» ансамбль’ тер’’ сит ханса’’? Ханзер’’ няндо’ хэсь тасласар?
— Хар’’н хэсь таславась. Нямэхэна сё мэта ненэцядамдо’ пюрӈаць. Тарця юн ихини сававна ха’’мыць. Мань ненэй вадавна ӈэда сё, луци’’ сё мэ’’мам’ мэнедм’. Ӈадьбята няндо’ тарабцом’ ха’’авра пир’’мами хамэдамбивась. Таддикахад хусувэй ненэцьм’, харта инда сер’ хынотам’ ханабада ансамбль’’ ӈояк’’ ӈадиберцеты’’. Таӈгун ян’ хэва си’’ми пуня’ нись мы’’. Ӈамгэхэртан’ табцями яӈгодадрев’ ихинани пойда сер’’ми нерня’ минреванзь хаядамзь. Си’’ми тидхалембададани -Тамара Выучейская тара. «Хаяр» тер’’ ӈобтикы нядаӈгу’’.
— «Сияние тундры» концертхана хыно’’ма хурка ӈэвы?
— Ет’ вэвада яӈгу, тоенахава тоенаркавы. Саць пон’ нидамзь хамеку’’, тарем’ ӈод’’ тид’’ сёётадамзь. Концерт’ пуд нядани хонаркуць: «Ханяд тосан? Хибян?» Марад’ тер’’ хар’’н падвы сёни намдаван’ харвавамдо’ хэтаць. Ханяӈы’’ харад’ помна ядэртахани си’’ми манэпато’, си’’ми пуномдамби’’.
— Ехэрана яхана едэй ила’ сехэрым’ ханавар нянанд хурка?
— Илангана сяхаӈгарт’ нензел’’ сер’’ яӈгу. Ханяӈэхэ’’на ӈамгэхэвм’ ӈули’’ тасламбаӈгур. Пуна манэць таравы нивы ӈэӈгу’’. Ӈани няби серм’ мер’, паромбарка’ пяӈгур, саць нин ибедорт’’, тикэр иланд сехэрэӈэ ханда. Теда’ ти, лакри’ тюкон’ тодм’. Тюкохона иланда ӈани’ тарця, тецива, ненэй вадавна лаханакуда’’ таня’’ма, вынд’ харбилабни ненэй мят’ хэсь пир’’ӈавава. Несэй я’ тер’’ илам’ манэтадм’, юнета тарани’’ няби сё мэти’’ нямна намдаӈгудм’.
Евгений инда сер’ хыно’’ӈа, яӈга тохолко’’мада яӈгу. Варемда мэць нерняри ӈа. Теда’ мале концертханда хамеку. Сёта мун’’ Ненецкой автономной округ’ тиӈгывна ӈэда’’ харда’’амна ханда’’.
Автор: А. Яптик’ падвы
