Няръяна Ӈэрм
Сёдо’ хайнаць
Яна тиӈгывна сёётэй’’ ненэцие’’ пирдырма миӈась. Луца вадавна нюмда «Поющие голоса». Няхар’’ иры’ ямбан’ ненэй ненэця’’, хаби’’, тасу’ хаби’’, ӈысма’’ харто’ вадахато’ юнета сё тэврамбиць, падыбиць. Сие ниць иры’ юдимдей яляхана ва’’лёйдо’ намдаваць.
Интернет’ мутравна минда конкурс 2019 поход пэяць. Тад тикы’ пуд 2020 похона ӈась. Самляӈг по’ хэ’’мяхад ӈани’ серта тасладонзь. Теда’ сё мэта’’ Таймыр’, Республика Коми’, Ямал’ тераць. Ӈокханда юкад вата тет видеом’ ӈэдаравыць: ӈысма’’ — самляӈгм’, хаби’’ — сидям’, тасу’ хаби’’ — ӈопойм’, ненэй ненэця’’ — матадм’.
Тасу’ хаби’’ вадавна Виктория Айваседо хыно’’ӈась. Пыда «Дарите женщинам цветы» сём’ харта вадавнанда мэ’’ӈась. Сита нюртей ян’ мэць. Хабихит Саляӈгардыхы «Овас мувие» сё мэта’’ няби Питлярхана тохолкода Ярослав Сюртахов нерня’ ха’’мыдаць. Ӈысмахат Валентина Коваленком’, Яна Сажинам’, «Горань» группам’ тэраць. Мэ’’мы’’ сёдо’: «Ой, у вишневому саду», «Матушка-Земля», «Numb». Ненэй ненэцяӈгат Хальмер’’ седе’’э’ тер’’ «Тэта’’ не’’», Саттане Окотэтто, Таймыр’ тер Вячеслав Сигуней нито’ нерня’ еремяць. Мэ’’мы’’ сёдо’ Виктор Яр’ няби Лилия Ядне’ «Луна» сё, Олег Газманов няби Татьяна Куртукова’ «Озёра синие» сё, «Ты неси меня река» сё. Ӈацекэхэт Салемалхана тохолкода Лар Мариям’, Сёяха’ няна няхаромдэй классахана мэни Лаптандер Ираидам’, Вануйто Розалинам’, Окотэтто Миленам’ ненадумдаць. Варемдо’ мэ’’мы’’ мал’’ ӈуда’ тер ня’’маӈгу’’.
Сёётэй’’ е’’эмня ӈадимдембада пирдырмадо’ сава таром’ минре: ӈэрм’ тер’’ вадидо’ нерня’ пэрӈа’’, сёёта пир’’мамдо’ манэ’’лабтамби’’. Вада’ нямна тидхалеӈговэхэ’’на ӈани’ нюрцям’, нядаӈговандо’ хавна теневабцодо’ ӈокамдамби’’.
Хыноць пир’’мамдо’ няби сёто’ ханзер’’ хайнавам’ сёётэй не Ксения Кручинина (Айна) Эвенкия’ тер манэсаръядась. Проектм’ ня’’амбанадо’ — Елена Неркагы. Пыда Нядаӈгарад’ няд ӈа. Серо тасламбадито’ ӈэвахана «Ямал — ню’’на’’ я!» Ассоциация’ ӈудандана Эдуард Яунгад мэсь. Таремгав’ нядаӈговы ӈока, мал’’ етя няндо’ таславы серодо’ тид’’ минрейдонзь.
Автор: Анна Яптик’ падвы
Авторы
Няръяна Нгэрм
Темы