Няръяна Ӈэрм
Сельбяʼ нувонаʼʼ сэванʼ ӈадимяʼʼ
Сельбяʼ нувонаʼʼ сэванʼ ӈадимяʼʼ, нероʼʼ вэбакоцяʼʼ тасехейӈэ няӈгадʼʼ поӈгана тэри юсидаʼʼ. Пиʼʼ тидӈэ пилиʼʼ хаяʼʼ, ханяӈэхэна тамна ханьʼʼ ӈэсетыʼʼ. Сарё ӈэбʼʼнанда тэри хурна. Янамбовна нумʼ ириваʼʼ ямда хадаби.
Тедаʼ вэбаʼ ирыʼ пудана яляʼʼ ӈэбатоʼ ӈодʼʼ нумда тамна ядемби. Хаерта тюʼʼуна ӈа. Ӈэрмʼ яʼ няна пиʼ серʼ ямʼ хань тондабида. Ханяӈы яхана сырада мале хаʼʼамвы, таремʼ ӈодʼʼ яляʼ явохона тикада таминда холкаӈга.
Тарця нумгана тэхэʼʼна ӈэдалёбʼʼ, саць хайнасеты. Няхарʼʼ хабтхана тэри нявоталаӈгуртанʼ. Тедаʼ ты пэртяʼʼ сярда мэʼʼӈаʼʼ. Пиʼ тидхана тыʼʼ сабе ниʼʼ ядэрʼʼ, ӈадьбятоʼ тэхэтоʼ хубтахана ханӈаʼʼ. Тикы поʼ пеля мянувнанда ӈаниʼ паской ӈэсеты. Хубтахана маʼʼлавы тыʼʼ мякандоʼ турпатоʼ тэри маниебцёʼʼ. Селвавыʼʼ, няръянаʼʼ нямдодоʼ ӈыхы янʼ ӈадьсетыʼʼ. Тадриʼ тамна помнандоʼ хораʼʼ тебелаӈгудʼʼ.
Сельбяʼ няна нувода ненэсянда сёнзяʼ мюймʼ маймламбиʼʼ. Ӈамгэри сарё, нумгад хаʼʼморта хад ӈэя иландʼ маябцо сяхаринда саʼʼӈа.
Марина Ярʼ падвы
Авторы
Няръяна Нгэрм
Темы