Няръяна Ӈэрм
Сензувна илеваʼ помʼ мэтаваˮ
Тюку минда поваˮ Россиянаˮ ӈардавна Яваˮ лэтрамбадинаˮ поӈэ толы. Ямалхананаˮ «Год героев» нюбеˮӈа. Тамнаʼ тяхакуйхаюнаˮ Мядʼ терˮ няби Ӈацекыˮ еˮэмня ӈаханзь.
Тад тованда 2026 поваˮ Россияʼ терˮ тодоˮ тэнзˮ ненэциеˮ Ӈобнзерʼ ӈэва по ӈэӈгу. Маняˮ округхананаˮ Сензувна илева помʼ мэтаваˮ. Нюртей вадамʼ Россияʼ ӈэвахана мэна ерваваˮ тодо тэнз ненэциеˮ поё тасламбаваʼ нямна ӈэда тасалковахана савуˮӈадась. Пыда яваˮ лэтрамбадинаˮ ӈобʼ ныхымʼ мэˮмамʼ хэтась. Вадавнанда мэбеˮмава янаˮ терˮ малʼ ӈобнзерˮ ӈэвахана ӈа. Нябиюмамʼ Ямалнаˮ нермбэртя Саляӈгардыхы неˮ лекарˮ мятʼ ядэрманда мальӈгана вадеˮӈадась. Таняна лекарахаˮна няби ню хованди нехэˮна лаханакурӈась:
— Сенз ӈэва ненэцяʼ илаӈгана саць тарана ӈамгэ. Хабцясяваʼ нямна ӈобӈгэвʼ ибедорць сероˮӈа. Сенз ӈэва есяхана тэмдаваʼ пирˮ ни ӈаˮ. Тедаʼ маняˮ хурка серо ӈадимдеваваˮ тасламбиваˮ. Сертавандинаˮ янаˮ тер лекарабтамбаваʼ нямна ӈэӈгуˮ. Едэй лекарˮ мядо мимбаӈгуваˮ, лекарˮ мядоˮ мюйʼ савумдамбаӈгуваˮ, лекарˮ манзаяхана мэта мирета ӈамгэри тэмдабаӈгуваˮ, лекаранаˮ тохолковахаˮ ӈэдарамбаӈгуваˮ. Яляʼ няюʼ ӈэда проект минрена ӈаниʼ нядабаӈгунаˮ. Таддикахад округнаˮ терˮ харвабцудоʼ вадетаˮ. Ӈамгэмʼ сертававаˮ нядандаˮ переӈгу. Илмаˮ малʼ ӈобкана савумдамбахаваˮ.
Лекарахат, ню ховандахат хонаркусь. «Ямальской маме» мипда лабтэй хурка ӈэвамʼ, сиддоʼ ханзерˮ маниевамдоʼ намдарась. Едя ниня мэна неˮ хусувэй ӈамгэмʼ саваӈэ вадеˮӈаць. Ирыхына ӈопой мэва экскурсиямʼ сертаба таравамʼ хэтаць. Тедаʼ похона сидяриʼ мэва ядэрӈаˮ. Тандаяʼ Ямаланʼ илелмэхэʼ, манзара пэвэхэʼ хонрамбись. Пыдиʼ «Врачи, нужные Ямалу» программавна яханаˮ товэхэнзь. Таремʼ туртаˮ миллион есявна няˮмарпиˮ. Сиддоʼ тидˮ нядабавамдоʼ, Москваʼ няна тохолкованʼ харвабцомʼ хэтвэхэнзь. Ямалнаˮ ӈуданданаʼ вадавна ӈани похона стажировканʼ юрʼ мянʼ неˮ лекармʼ ӈэдараӈгуˮ.
Сензувна илева похона малʼ хабцясяхаваˮ, сензаваˮ ӈэхэваˮ. Нюнаˮ нюдя ӈэдахандоʼ тидˮ ӈэда илаʼ сехэрымʼ нёда тохоламбаханаˮ.
Анна Яптикʼ падвы
Авторы
Няръяна Нгэрм
Темы