Няръяна Ӈэрм
Сидя хабарталва ӈадимя
Округхананаˮ тыдоʼ хабарпа вэбаʼ ирыʼ нюртей яляхана пэйдаць. Таʼ мальӈгана Приуральской районхы «Паюта» хабарталванʼ тыдоʼ тэврамба пяйдонзь. Тикыдоʼ ненэциеˮ мюсьлаваˮ ниня ӈаˮ.
Тедаʼ носиндалаваʼ ирыʼ нердена яляхана тандаяʼ сававна хабарта пэйдаць. Таʼ мальӈгана Ямальской районхы Яр-Саляхана, Юрибей факторияхана хабарталыдаць. Тадриʼ Сёяхаʼ харадʼ няна тыдоʼ тэврамба пяӈгуˮ. Тасуʼ явʼ няна няхарˮ хабарталвадоʼ. Паютеˮэхэна, Ӈэдяӈгана, ӈобтоʼ Хальмерˮ Седеʼ харадʼ ядхана ӈа. Пуровской, Шурышкарской, Надымской районхана носиндалваʼ ирыхына яханаӈгуˮ. Таʼ ёльцяӈгана яхаˮ салабидоʼ сававна ханимдаˮ, таремʼ ненэцяˮ тыдоʼ таӈга хабарманзь тэврамбаӈгудоʼ.
Хусувэй хабарталвахана тыˮ лекарˮ манзараˮ. Ямалнаˮ тиӈгывна тыдоʼ юкад вата матˮ хабарталвахана хабарпаӈгудоʼ. Таняʼ хусувэй тарана ӈавэдоʼ тэвравыдонзь. Хибя сяхаʼ хабартаванзь товада мале ӈахакуд падаркана пады. Тюку поʼ 3500 тонна ӈамзамʼ ӈыдаванзь тасламбиˮ. Небоʼ 3281 тоннамʼ ӈыдавыць. Таӈок тымʼ тэвраваʼ няюʼ сидтоʼ хареˮ иленаˮ ненэцяˮ нядабиˮ. Пыдоʼ, ервоˮ вадавна, пудана няхарˮ поˮ серʼ ӈокавна тыдоʼ хабарталвахаˮ танабиˮ.
Тикыʼ хавна округхананаˮ тамна сидя едэй хабарталва манзара пэӈгухуʼ. Ӈопойдоʼ Тасу явʼ няна ӈа. Ӈэрёʼ серʼ юрˮ тонна тыˮ ӈамзамʼ ӈыдабаӈгуˮ. Тикадоʼ ненэциеˮ мюсьлаваʼ ниня ӈа. Мессо яхаʼ хэваркахана сертавэӈэ вадеˮӈадоʼ. Танямна Ӈэдяʼ терˮ, Хальмерˮ Седеʼ терˮ мюсерӈаˮ. Ӈокханда матˮ юдˮ мядʼ терˮ тыдоʼ тэврамба пиртыдоʼ. Няби хабарталвадоʼ Пуровской районхы Самбаркаʼ няна ӈа. Таняна сиˮив юˮ тонна ӈамзамʼ ӈыдабаӈгуˮ. Ӈопой яляхана тет тоннамʼ хабарпа пирӈаˮ. Тад нерняʼ тикахад ӈокамʼ хабарпаванʼ харваˮ.
Мянувнанда тевʼ ёльцяӈгана хабартава ӈаниʼ нензелˮ ни ӈаˮ. Ненэцяˮ саць тэтнасетыˮ. Тыдоʼ толавадоʼ, таславы хабарталванʼ тэвравадоʼ, тикытоʼ хавна мяканатоʼ ӈани манзаидоʼ танянакыˮ. Таремʼ ӈодˮ ты пэртинаˮ сяхаӈгартʼ иландоʼ тоенавамʼ нидоʼ вадецетуˮ. Мале пирдалевэдоʼ. Тикахад сава, тарана иламʼ ехэраˮ. Пилиˮ нерняʼ пэрӈадоʼ.
Марина Ярʼ падвы
Сидяӈг: Марина Ярʼ тадтавы
Авторы
Няръяна Нгэрм
Темы