Няръяна Ӈэрм
Сидя сава яля
Нямэхэна машина’’ талбэй сехэрэвна Няда’ харад’ няю’ тэри хайнаць. Сянакова’ ялэ ненэця’’ нидо’ ӈэдарамбю’’. Маня’’ ӈод’’ ӈани’ пяваць. Мале харад’ някуна ӈоб’’ мальцятна хасава сидна’’ нултась. Харе’’ тыда пэртя Илья Ябсивич Худи хубтахана мякаданда ӈэдалавыць. Нерцюбт’ хахаяда мякана ӈэдалё мэ’’манда’’ тыда хаевысь. Тикыда хосаяванзь мимысь. Ма’’нисяв, сянакова’ яляхана ненэцие ӈэдалёлтамбаван’ харва. Нява’’ нид ӈэдалё выӈгы иламда ваде’’ӈась. Таславы яхананда тарпыць, мяд’ няю’ яда пядась.
Хубтахана то’ салаба’ ниня хумна’’ я’’авлыць. Лаӈг’ ниня сидя юд’ мян’ мяд мярвысь. Мядо’’ ядхана сямянхат сомбой не’ ханм’ тэрабавыць. Тарця хумнахат подермы’’ ты’’ вэнолаӈгаць. Ӈобто’ Пуровской районхад товы Иван Пяк’ хан ӈэвысь. Пыда ма’’нисяв: «Маня’’ тына’’ машинахана тэврэйнаць. Танякуй по’’ тэдва’’ сававна теневана няхадана’’ ханаваць. Тарем’ ил’ сидя ӈэсь сяхаринда ням’ нядабава сава». Лаханако ня’’мы няни хан’ ниня мята тер’’ ӈухукодрев’ ӈамдыць.
Ханамда манэ’’лабтаванзь Тасу яв’ няд товы хасава Ядне Николай Хыльчевич тыда ӈобтикы машинахана тэвравыдась. Сиддо’ газм’ тарпрамбада’’ предприятий’’ нядавы’’. Яндо’ хубта ӈэб’’ ӈод’’ сыв’ Ямбург’ хэвхана иле’’. Хад’’ ӈо’’ мел’ ненэця’ ӈэрха, тандая’ мивы ханда тэри тэбъя. Сянакова манэ’’манзь товы’’ сямянхат паской ханм’ харто’ тэрабидонзь. Хамзахалмыто’ няю’ падроко ӈэдарамбиць.
Тюку по’ Няда’ хардан’ тодо’’ выӈгат юкад вата си’’ив команда’’ товыць. Ӈокханда юркад вата си’’ив ю’’ сёбар’’ ӈэвысь. Яля’ еркана ерводо’ ненэцие’’ нерад вадамдо’ мэ’’ӈаць. Округна’’ ӈэвахы ерв ӈани’ таня’ тэворӈась.
Тикы яля лекар’’ няку’ хэван’ харвана’’ ӈани’ пыхыдадо’ манэ’’лабта пирӈаць. Хонравандандо’ таняб’’, сиддо’ тодо’’ яхат товы ерв’’ тидхале пирӈаць. Ӈэрм’ тер’’ серо минрена департаментана’’ манзарана’’ ӈани’ таняна мэць. Халядава’, ты пэрма’, ӈани ӈамгэ законо’’ нямна товы’’ ерво тидпой’’ хонрамбидонзь.
Автор: М.Яр’ падвы
Авторы
Няръяна Нгэрм
Темы