обновлено: 04:55, 02 декабря 2024
Няръяна Ӈэрм
Си’’ив я’ тер’’ ӈобт’ тэваӈгуд’’
Нара’ някуна сие ниць иры’ 28 яляхад ты’’ ниць иры’ 2 яля’ ёльцянд’ Москва маркана тодо’’ яхат мел’’ ненэця’’ ма’’лёда’’. Пыдо’ мале сидя юдимдей яӈорэй’ ӈарка ярмарка-выставкам’ мэта’’. Яна’’ тиӈгэвна илена’’ нина’’ ӈахакуд теневавандо’ е’’эмня тарця юнм’ падыбива’’.
Сямянхат ва’’лёй’’ ӈэрм’ тер’’ манзаидо’ манэ’’лабтамбаӈгу’’. Мел’’ нидо’ тасламбаӈгу’’. Самляӈг яля’ ямбан’ ӈопой мяд’ тердарев’ илеӈгу’’. Ненэй ненэця’’, хаби’’, ӈысма’’, мандо’’, санэр’’, тавыс’’, чукча’’, тамна ӈани’’ тэнз’’ мэта’’ нидо’ торомдаӈгу’’.
Хусувэй по’ тэврамбада манзаидо’ хуркари’’ ӈэсеты’’: я’ хора’ лэхэд, тивтей тибяхат, пяхад мивы’’. Мел’’ не’’ сэдъяхав’’ толава’ техэ’’: паны’’, мальця’’, пива’’, имбытад’’, падко’’, ӈухуко… Ӈобкарт ӈоб’’ толас’’ яӈгосеты’’.
Мядонда’’ сэвридо’ мэцеты’’, тохолкован харвана’’ тохолкосеты’’. Сэдорана’’, панорта’’, мирта’’ нибям’ ня’’амба’’, ӈодяко паӈгалпа, мирць сидто’ табедамбасеты’’. Хусувэй я’ тер’’ нидо’ ӈавыдота’’ ӈавраханато’ ӈавламбасеты’’.
Мел’’ нито’ хэвхана тарана’’, сёётэй’’ мэсеты’’. Сёхонато’ хуркари’’ муно ӈадимдесеты’’.
Тюку по’ тамна «Северный взор» нюбета тадтаӈгоди’’ пирдырма ӈэӈгу. Сэдорана’’ не’’ сэдъидо’ «Полярный стиль» фестивальхана манэ’’лабтаӈгудо’.
«Няръяна Ӈэрм» газетана’’ паднана’’ ӈани’ таняна мэӈгу’’. Таняд юне е’’эмнанда’’ ма’’ламбаӈгу’’.
Г. Окотэтто’ падвы
