Няръяна Ӈэрм
Сяхариʼ пыдоʼ илмаˮ несэймдамбаӈгуˮ
Наӈэдя сиˮив яляʼ ямбанʼ тодоˮ тэнзˮ илебейˮ ненэцяˮ Хабиˮ ёˮ няна тохолкурӈаць. «Школа общественной дипломатии» тохолкова сиддоʼ ӈобтʼ маˮлась. Тюку поʼ «Няръяна Ӈэрм» газетахананаˮ тикы сертоʼ ёльце ненадось. Поӈганандоʼ нянанаˮ манзарана Яптик Анна Владимировна мэсь. Нита серʼ ехэранаˮ теневабцодамда торомдамбись. Хусувэй яляʼ таняд илекаˮ илеˮмидоʼ нянаˮ вадецеты.
Тохолковамда ӈахакуд Сургутанʼ тованда нерцюна пядась. Мале сян ирыʼ мякнанда хуркари манзаи пэрӈась. Нюртехэвʼ ӈока ӈэвыˮ, пуна поӈгадандоʼ няхарˮ юдмʼ тэравыˮ. Пыда сита ваˮлёйˮ пондʼ ӈаниʼ ханавыˮ. Тикы сертʼ ӈулиˮ маймбись. Хэсь ялэта томзь, паромбариʼ ӈамгэрида маˮлахая, тиртя ӈанохона Саляӈгардахад Москвамʼ сюртехэя Сургут мартʼ тияць.
Пыда хавнанда Ямалхад тамна сидя янаˮ терхаʼ таняна тохолкурӈаханзь. Ӈопойюмʼ — Галина Косыгина (Ядне). Салехардахана тодоˮ тэнзˮ ненэциеˮ толаӈгулаваʼ хардахана манзара, тикэнда хавна общественной манзаямʼ минре, депутатӈэ тара. Нябиюмʼ — Иван Сандрин, ӈобтикы юнета илебей ненэцьʼ. Хабиˮ лаханако, невхыˮ илеˮми маˮламбадаӈэ теневаваˮ. Пыдоʼ малʼ няхарӈэ теневабцудоʼ ӈокамдаванзь, ӈэрмʼ терˮ едʼ ӈадиберта, таняна вато тохолаванзь, намдуванзь, нерняриʼ ӈэда ненэцие торомдаванзь ӈэдалёрӈаць.
Аннаʼ вадавна, Сургутанʼ тэвавандоʼ мальӈгана сиддоʼ мале тиртя ӈаноˮ ӈамдолавахана ӈатевыˮ, илесь яханандоʼ ёльце сававна мядолабтамбавыдоʼ. Пилюˮ ирыʼ няхаромдэй яляхана пэвсюмаʼ няна сиддоʼ ӈобтʼ маˮлавыˮ. Тикахад хаця нидоʼ торомлавандоʼ еˮэмня сянакурмыˮ. Хусувэдоʼ харта пыхыданда нямна няхарˮ сермʼ вадеˮмы, падраконʼ падыбавыда. Тикыʼ пуд ӈопой нядоʼ толабавыда, хибяʼ нямна падвамдоʼ ӈобнзерʼ хамэдабтоʼ таравы. Таддикахад хуркариˮ мунобцо сертабавыˮ, сёёдоʼ, мунодоʼ ӈобтʼ хаˮмормыˮ, музыкамʼ сертанаˮ тоˮолхаˮ ӈэвыˮ. Сянаковандоʼ серʼ нидоʼ хаця торомдавыдоʼ, нюбедоʼ тохолавыˮ.
Илебейˮ ненэцяˮ янаˮ ханярид товыˮ: Якутияʼ, Сахалинʼ, Алтайʼ, Красноярский крайʼ, тамна ӈани яˮ няд. Неновна Эфиопияхад Оджот Оджулу, Экспертной механизмʼ ООН по правам коренных народов ӈэвахана мэна марцьхы, ненадо мядондаӈэ, табекодаӈэ таравы.
Таремʼ тодоˮ яʼ терˮ илебейˮ ненэцяˮ нерняӈы ялэтоʼ ёльцяндʼ невхы иландоʼ саирмʼ лэтравандоʼʼ еˮэмня няхататоʼ тохолковыˮ. Харто яханатоʼ ханзерˮ илевамдоʼ вадеˮмыˮ, теневана серканатоʼ нидоʼ нерняʼ тидхалембавыˮ.
Галина Окотэттоʼ падвы
Сидяӈгˮ: Анна Яптикʼ тадтавыˮ
Авторы
Няръяна Нгэрм
Темы