Няръяна Ӈэрм
Сямянхат ӈарка школа
Мань ӈарка пэвдей иры’ нюртей’’ яляха’’на Яр-Салян’ тэворӈадамзь. Таняна мядомани сер’ Василий Давыдов’ нюмам’ мэта едэй школан’ тюӈгадамзь. Таремгав’ хардаханандо’ сидя школадо’, сидябты’ няхар’’ яӈорэй’’ мивэхэ’. Ӈоб’’ хэвкохона ӈаха’. Нюртейхана нюдяко’’ ӈацекы’’, тетимдей класс’ ӈэсонд’ ӈэда’’ тохолку’’. Нядандо’ ӈаркарка’’ нидо’ тандаярка’ сертавэхэна мэ’’.
Мале сян по’ тяхана ӈопой сюдбяко школадонзь. Тамальӈгана тикэдо’ тыяромбасеты. Ханяӈы нюдяко’’ классаха’’на мэна ӈацекы интернатхана тохоламбасетыдо’, яля’ ер’ пуд тохолкодидо’ ӈани’ ӈока’’ ӈэсеты’’. Ӈацекы тохоламбадаха’’на та’ нисеты ӈа’’, тэтна манзарасеты’’. Ӈадьбята мал’’ едэй школа’ нэвам’ ӈатесеты’’.
Тыяромба манзара’’махадандо’ сямян тарана ӈамгэсавэй, мутрасавэй едэй школамдо’ нэць. Яр-Салян’ тэвормани сер’ ӈоб’’ манэ’’ман’ харвасетыв, тарем’ нисеты еребер’’. Теда’ ядэрмарихинани таня’ тюдамзь. 2021 похона нэвы мюйм’ няни ненэй вадам’ минрена не манэ’’лабтамбидась. Ирина Нюдяковна Вануйто’ ня’ хусувэй яӈорэймда, лохомда манэ’’ӈанинзь.
Тохолкулава’ мюмня ядвани сер’ сэвни тэри маймбиць. Кабинет’’ ӈарка’’, таӈго’’, яля’’, тамна мюняӈы сидерцавэй’’, паднана’’ тикавна ӈоб’’ ӈади’’, хибя ӈамгэм’ пэрӈа мал’’ манэтыд. Спортзал, ӈолова’ яхаюдо’ ёльце ӈаркаха’. Яӈга ныланава’’ ёдо’ танявы’’: хуркари’’ нюлак’’, пирця’’ ӈамдёрциеко’’, толь’’ ӈэдакы’’. Ӈацекэхэ’’на ёльце сава, пыдо’ таӈга нылана’’, мякы’’ манзаидо’ сертаби’’. Ядэлава’’ мюй’’ нёндо’ сихив’’ няръяна’’ мадавэхэ’’на падтавы’’. Тодо’’ этажаха’’на ӈамгэрито’, яёлато’ ӈэся’’ таня’’. Тарцяхана тохолковари то’’олха!
Подзаголовок: Ненэй вада’ урокахана
Мань яля’ ер’ пуд минда ненэця’ вада няби литература урокаха’’на мэдамзь. Мале сян класс’’ тер манэ’’ӈадамзь. Ӈацекы’’ тэтнаць, пэрта манзаядо’ ёльце ӈокась. Едэй по’ това’ нерцю’’ ма’’лёвы’’ серодо’ паромбари’ таславан’ харваць. Таддикахад юд’ мян’ ялэ’’ тяхана сиддо’ тохоламбададо’ Саляӈгардахана мэсь, теневабцода ӈокамдамбись. Хэвняна мэнаханда мэванда манзаядо’ саць ӈокамысь. Тохолкода’’ оценкадамдо’ нэкалпа варемдо’ мэ’’ӈаць, словарной манзаям’, творческой переводм’ сертабиць. Матдомдэй, сидндетимдейха’’на мэна’’ ӈопой минутахана сян вадам’ толаба пир’’мамдо’ манэ’’лабтамбтаць. Тикы’ хавна едэй пон’ хамекуць, падаркад мальцятна, панытана ненэциеко, сидер’’ син’ тадтаванда мадавы паркабиць.
Лакамбой’ туртаӈэ ӈод’’ тэри нидамзь сыр’’, тохолкода’’ няни «Русанов няв, сава няв» стихотворениям’ толабиць. Ӈамгэ’ нямна падвы ӈа, хибя падвэда, мал’’ нядандо’ хонрамбинась. Ӈани’ ӈопой классахана «техника чтения» нюбета серм’ минредамзь. Ӈацекы’’ няни ханзер’’ толаӈго пир’’мамдо’ манэ’’лабтаць.
Ирина Нюдяковна’ кабинетамда сававна падтавэдась. Тю’’у’ сылыв’’, стенка’ ядувна мюсена мюд манэ’’ӈадм’. Книгы’’ ӈэся’’ хэвхана мядико палы. Тамна’ тяхакуна Мяд’ тер’’ по’ ед’ ӈэда’’ падта’’ма’’, сидяӈг’’ ӈыды’’. Саць «Выӈгана иленина’’ сырэй иламдо’ пяӈов’’» падта’’ми саву’’ӈадамзь, таддикахад невхы и’ ӈуд’’ тикахана падыць: «Мяд’ якэ нув’ няю’ палы — тецьхамда», «Харп’’ майлыд’’ — хадм’ пэрӈа’’», «Та’ нохо’ пися’’ ӈока ӈэб’’ — сыра’ нохо ӈока ӈэӈгу», «Хэтко хубтахана соб’’ — сата тецьда’’ пэӈгуд’’». Кабинетханандо’ ӈамгэм’ пэрма падарто’ нё’ сихинандо’ пады. Ӈацекы’’ иськабтё, сюрберць вэва ӈэвахад, пэдава ӈэсь таравахад тенева’’.
Подзаголовок: Экзаменха’’ хамеку’’
Ненэй вадавна ӈэда экзаменха’’ ӈахакуд хамекурӈа’’. Урок’’ мале’’мяхад хасава юдимдей классахана мэна’’ тоць. Сиддо’ тохоламбададо’ няндо’ книгы, сертаванда манзаядамдо’ ми’’ӈась. Пэдавако’’ падна лабцейдаць. Паднавахандо’ Ирина Нюдяковна ӈани’’ ӈацекыта манзаи манэ’’сарӈась, таминда лаханась:
— Ӈэрё’ вэба’ ирыхына хамеко пэсетына’’. Похо’’ тохоламбавыдо’ тензибтембасеты’’. Хусувэхэндо’ самлянзимдей хасава юдемдей класс’ ӈэсонд’ ӈэда ӈахат учебник мипасетыдм’. Тольндо’ ниня книгыдо’ ӈэсеты’’, тарем’ пыдо’ сямян тарана теневабцо’’ мюнандо’ сюрвам’ маниесеты’’. Тестм’ сертабавандо’ мальӈгана ӈарка няд’’мадандо’ мэ’’ядо’. Ӈобаӈгэв’ турмы ӈэбто’ сава ӈэӈгусь, тохоламбавыдо’ етри’ тенеӈгудонзь. Тедахав’ ет’ ялэхэ’’ вуни’’ тур’’, ваде’’мыд сяни’’ яӈорэй’’ вадет’’нидав’’. Тюку по’ ненэй вадам’ тэравы сидя ю’’ тет ненэць’. Небохов юкад вата матадонзь, ӈопойри класс’ тераць. Тамальӈгана сидяридо’ ненэй вадам’ нись тэра’’.
Школахана мале пон’ мэдамзь, тикахад нянани урок’’ мер’ малеӈгана то’’олхаць. Ненэця’’ ёльце тэтнаць, манзаяхатато’ лаво’’лаито’ яӈгуць, лаханакуркарта сабе ниваць лаханакур’’.
Анна Яптик’ падвы
Авторы
Няръяна Нгэрм
Темы