Няръяна Ӈэрм
Сянаковаʼ яляʼ нямна
Ялэнаˮ ёльце мерʼ миӈаˮ. Ты пэртиˮ сянаковаʼ ялэ тандаяʼ мэта тоˮолхынаць. Тедаʼ мале ӈэрёваˮ ваераванзь пяда, сыранаˮ хаˮамвари хаи. Сыреˮмахаванда ӈаниʼ ӈобтʼ маˮлёдаваˮ, Нядаӈгарданʼ ӈэдалаӈгунаˮ.
Едэйвана нянаˮ юн тэвыць. Маˮнимˮ, таняна Сянаковаʼ яляндоʼ сяхаʼ ӈэвахад теневаˮ. Тад тованда 2025 похона февральʼ ирыʼ 22-23 яляхаˮна хэбидя ялямдоʼ мэтадоʼ. Серодоʼ тидˮ мимаʼ еˮэмня ӈахакуд хамеко пэӈгудˮ. Ӈани потоʼ тотревʼ сававна мэць тасламбидоʼ. Янаˮ тиӈгывна илена ненэцие мякˮ ӈатеӈгуˮ. Сёбарˮ еˮэмня ӈарка пирдырмамʼ ӈадимдеӈгуˮ. Тэри мядоманзь товыˮ ӈобтикы манэˮмандадоʼ тянё ни ӈэӈгуˮ.
Ӈаниˮ хардахаˮна сяхаʼ ты пэртяˮ маˮлёва тедариʼ пунси. Пуноманда серʼ няндаˮ ӈаниʼ вадетаваˮ. Таремʼ ерембата маняˮ юне падыбадаӈэ ӈаниʼ Нядэй яʼ няʼ тэвортаваˮ, юндаваˮ, сидяӈгадаваˮ маˮламбаӈгуваˮ.
Анна Яптикʼ падвы
Сидяӈг: М. Ярʼ тадтавы
Авторы
Няръяна Нгэрм
Темы