обновлено: 10:45, 15 ноября 2024
Няръяна Ӈэрм
Сянакова поёдо’ савумдамби
Ныланава’ яляхана марад’ тер’’ манэ’’мандадо’ ёльце ӈокась. Хусувэй мякана няхато’ маймбиць. Тарем’ «Геолог» нюбета хардахана тет ю’’ пир’’ тодо’’ тэнз’’ сёбар’’ «Турнир Дружбы» волейбол пирдырмахана ныхыдо’ хорпиць.
Ӈокханда юкад вата сидя команда ӈэвы. Пыдо’ мал’ Салехард’ ӈэвахана мэна ерв’ ненадумда’’мам’ ня’’маван’ харвавы’’, ӈадьбята мячм’ моёпа варемдо’ мэ’’мы’’. Небойнда тотрев’ ӈэрм’ терна’’ тикахана ӈани’ мэць. Тюку по’ мале сян не, мале сян хасавась. Нита ӈаркатаӈэ, нида тидхалембадаӈэ Владимир Морозов тарась:
— Тарця сянакубцм’ небой поход ӈадимдемба пядонзь. Пирдырмава’’ яӈгаркась, серм’ минрена’’ тамна ва’’лёйркавна манзаидо’ хамедавыдонзь. По’ ямбан’ янамбоковна хамекуваць, ӈобкаван’ ниваць тэвор’’, хибя ханзер’’ пир’’ӈада ет’ тарем’ хамекусь. Мале сян яля’ тяхана е’’эмняна’’ сянако ядва’’ таць, таняна мэсетыва’’. Пирдырманзь похо’’ сянакода’’ сёбар’’ ма’’лыць. Ӈояк’’ ӈобт’ тэвортаӈэ сидто’ пирувна ся’’на пир’’манава’’. Нерня’ хэсь я’’маваць, вудумаваць. Нянана’’ тэрихирт тикахана мэвава’’ сава. Ӈули’’ илека, пыхыдана’’ высылӈава’’, ялява’’ ханзоць мэ’’ӈава’’. Тадхав’ тованда похона ӈани’ ӈобт’ ма’’лё тасламбива’’.
Сиддо’ нерняку пэрманзь «Ямал-ню’’на’’ я» ассоциацияхана мэна’’ нидо’ товэць. Ӈопойдо’ Роза Ӈокэясь, пыда лаханась:
— Мань сюрбермам’, хуркари’’ тэнз’’ сянакубцха’’на мэвам’ мэнедм’, ӈадьбята няха’’ни сырманзь тодамзь. Мал’ варемдо’ мэ’’ӈа’’, хусувэйдо’ мэбе’’ӈа, нерня’ ӈа. Нянани мал’ ва’’лёй’’ то’’олхаць. Небойхадандо’ я’’авларка’’, ихинани ӈани похона тамна торомбэярка’’ ӈэва’ сер’ ӈа’’. Тодо’’ тэнз’’ ненэцие’’ помнандо’ пирдырма ёльце сава, нидо’ тохоламби’’. Пуна, маси’’, юрёсаӈэ ханда’’, нито’ мяк’’ ядэрта’’.
Нидо’ тарабтамбуванзь товы’’ ӈокаць, пыдо’ лески ябцыбиць. Тодо’’ тэнз’’ ненэця’’ нянё ябцыбава’ пирдырмахана мэць. Саляӈгарад’ «Ямал-ню’’на’’ я» ассоциацияхана мэна’’ вэя’ лески сертавыць. Ӈавудота ӈаврадо’ мядоманзь турта’’ сямянхат саву’’мыдо’, тикында няю’ сиддо’ нюртей ян’ мэвы’’. Ӈуданданадо’ Татьяна Сэротэтто нита ед’ сава вади ӈэдарамбись. Ма’’нисяв’’: «Хусувэва’’ таром’ ха’’аврась, нябинзеркав’’ сидна’’ ниць тэраӈгу’’».
Сянакоди’’ поӈгана нито’ нярня’ еремы’’ ти’’: «Русская дружина», «Народы Кавказа», «Центр Азии» (Тыва). Ненадумда’’ми ня’’амвы’’ маймба лаханаць: «Етри’ пыхыдана’’ тохоламбасетына’’. Ӈобанзер’’ ӈэвава’’, нина’’ муӈг’’ инзелевава’’ сидна’’ няда. Пилибт’’ помнана’’ нята илехэва’’».
Анна Яптик’ падвы
Сидяӈг’’: t.me/salekhard-yаmаlpotomkаm няд ханавы’’
