Няръяна Ӈэрм
Сянакованзь хамеды’’
Ямалханана’’ Ты пэртя’’ сянакова’ яля’’ ӈули’’ паӈодо’. Ханяӈы’’ яха’’на мале ӈэрм’ тер’’ нидо’ ядабтамбидонзь. Ӈани’ тамна ӈатена’’. Тадри’ пирдырма’ ялэдо’ ӈодь пэваридо’ хаи’’. Я’ мал’ няна пирдырмандо’ нерня тыдо’ ӈахакуд мэць хорпидо’. Теда’ нензахалмы ты сэбинева’ ёльцяӈгана ненэцям’ нида пуня’ ха’’авраӈгу’’.
Пудана’’ по’’ ты пэртя’’ хардан’ ха’’амвандо’ нерня харто’ помнандо’ сянакурӈа’’. Выӈгана ӈахакуд таславы яхана нидо’ ядабтамбидо’. Хусувэдо’ тарця ненадо ялян’ ӈахакуд хамеку. Ты пэртя’’ помнандо’ тенева’’, сяха’, ханяна ӈобт’ ма’’лёда’’. Таславы яляхана тодо’’ выӈгат ӈэдалёда’’ ӈопой мя’’лин’ пэрӈадо’. Ӈэсыхына ӈод’’ сидто’ ӈате’’, мякана хорто’ якэ’’ тэри путра’’. Вэн’’ мад’’ ненэцие’’ това’ нямна хонаркодараха’’. Ӈоб’’ тарця нюрцьм’ ялям’ Ямальской районхана мэ’’ӈаць. Сер’’ тарцясь.
Сёяха’ хой’ няӈы ты пэртя’’ харто’ помнандо’ сянаковам’ мэ’’мыць. Виктор Ерменявич Сэротэтто’ мякана пивня ядэрта мале ӈокась. Тодо’’ выӈгат тэхэ’’на мерета еся’ ханха’’на ӈэдалёда’’ няндо’ мят’ паромбиць. Виктор Ерменявич нида ӈатейдась. Ӈадьбята хусувэмдо’ харта ядабтамбидась. Ӈокханда юкад вата ӈэдалёванда’’ ӈопой ӈэсын’ ма’’лёвыць. Пирдырманда’’ хасава’’ етя пахалавы’’ тыдо’ подермыць. Вымна тёрридо’ совыць. Няваталаӈгоди’’ пуд мерцяри’’, хадри’’ хан’’мыць. Тарця нюрцям’ ООО «Ямальское» серм’ нерня’ минреня’’ сертавыць. Тикахана манзарана Афанасий Окотэтто тарем’ мась:
— Ты пэртина’’ е’’эмня Сёяха хардахана ӈэванда сянакова’ нерцюна ӈахакуд пирдырми серта таславаць. Ханяӈы’’ ненэця’’ ӈани’’ хардаха’’ пирдырманзь ханаць ни’’ тэворцету’’. Теда’ товы’’ ӈокаюм’ пелядо’ общинаха’’на тыдо’ пэрӈа’’. Хахаярка илена’’ харто’ тыдо’ пэртя’’ ӈани’ тоць. Виктор Ерменявич Сэротэтто’ ӈэсыхына ма’’люрӈаваць. Тикахана таравы’’ нина’’ ӈули’’ сававна сидна’’ нядаць. Нерня’ ха’’амвэхэ’’ ненадумда’’ми, ӈуда’ тер ми’’ӈаваць. Харта ӈод’’ ненэй ненэциена’’ ӈобт’ тэвормам’ харвобтадо’. Тарця тарана юн вымна минханда хан’’ӈа.
Ханзер’’ сянаковандо’ хэвам’ ненэця’’ нивэдо’ хамеда’’. Ханя, выӈгана илена’’ хусувэй яля’ нидо’ ни’’ хомбю’’, тарем’ сянакова’ нянандо’ саць сава. Ханяӈы’’ мэць тохолавы’’ тыдо’ тамна Сёяха’ харад’ няю’ пирдырманзь подертыдо’.
Тандая’ Лариса Николаевна Вануйтахад ӈани’ ӈоб’’ юнм’ намдаваць. Ӈобтикы Сёяха’ выӈгана луци’’ яля’ падаркана не’’ хэбидя яляӈэ таславэхэна лаха ты пэртя’’ ма’’лёвыць. Пыдо’ Евгений няби Константин Вануйтаха’ ӈэсыхына мэвыць. Не’’ помнандо’ ныхыдырмыць. Ярколавыць. Хасава’’ ӈани’ варедо’ мэ’’мыць. Сата тыдо’ подеркая, няваталаӈговыць. Саць мере’’мы’’, мэбе’’мы’’ мал’ ӈудито’ терад, ненандумда’’ми ня’’амвыць.
Тарем’ помнандо’ сянако’’махадандо’ сямянхат ва’’лёйто’ юн ӈыхы ян’ тэваӈгу. Помнандо’ тикы няхандо’ тосаӈгу’’. Мэць вэварка’’ тыдо’ ӈарка ян’ ӈэдалавандо’ нерня сава няхато’ тадаӈгудо’.
Тюку по’ Сёяха’ хардахана ненадо ялям’ мэ’’манзь тасламби’’. Сие ниць ирыхына яндо’ тер’’ мат’’ ю’’ самлянзимдей сянаковахана ӈобт ма’’лёда’’. Ӈарка ялямдо’ мэ’’манзь я’ ханярид мядонда’’ тута’’. Тедари’ варемдо’ вы’ тер’’ хамеку’’. Ныхыдырманда’’ — ӈэсоӈодо’ высылпи’’, ярколаванда’ — тынзяӈодо’ вэнпи’’. Не’’ ӈобтикы тэри ни’’ ӈамдю’’. Пыдо’ серуванда’’ вар’’ мадавы’’ паныдо’, си’’ив падрота’’ пибидо’ сэдыби’’. Нюхуто’ сырэй’’ паской’’ панэци, мальци серибтеӈгу’’. Хардахана илена’’ нидо’ ядабтаванзь няркана’’. По’ ямбан’ нивы’’ манэпавы’’ няхато’ саць маймбаӈгу’’.
Автор: Руфина Окотэтто’ падвы
Авторы
Няръяна Нгэрм
Темы