Няръяна Ӈэрм
Сяӈок халям’ ватавамдо’ таславэдо’
Округханана’’ небо’ сяӈок халям’ ватавамдо’ таславэдо’. Яханана’’ пыри, нёя, карась хадабада’’ ӈокамы’’.
Небо’ ю’’ ёнар’’ тонна халям’ ватавы’’. Тикадо’ невхыто’ пир’’ ӈэвы. Ненэйвана сававна няхар’’ районхана халям’ ватавы’’. Сямянхат ӈокам’ Тазовской районхана — 1892 тонна халям’ нэкалмы’’. Нянда пуд Приуральской районхана — 1 855 тоннам’ ватавы’’, няхаромдэйдо’ Шурышкарской район’ тер’’ ӈэвы. Пыдо’ яханандо’ — 1761 тонна халям’ ӈыдавы’’.
Небо’ нара’ итя ӈокась, ӈадьбята поӈгадо’ пон’ терсиць. Тарем’ ӈод’’ предприятийха’’нато’ планадо’ томдавыдо’. Ненэйвана теда’ пырим’ хадабада’’ ӈока’’мы’’. Пыририхина 845 тоннам’ ватавыць. Тикадо’ тамна 2024 поход ӈока ӈэвы. Харта ӈод’’ пыри’ ӈамзам’ яханана’’ харвобтадо’. Тарабата тамна округна’’ тяха’ мирдапидо’. Нёям’ си’’ив ю’’ самляӈг тонна’ пирувна ӈани’ ӈокамдавэдо’. Тикы халям’ ненэця’’ мыданда е’’эмня харвобтадо’.
Пудана по’’ яханана’’ ватабада халяхат хуркари’’ ӈавыдота’’ ӈавар сертаби’’. Самляӈг по’ тяхана ватавы халяхат яланда няхар’’ ю’’ процентримдо’ сертабиць. Теда’ предприятий’’ ӈавыдота ӈавраӈэ сертавы’’ халэдо’ интернет’ мутрам’ няд’’мяць мирдапа пиръядо’. Ӈанидо’ яна’’ терха’’ тэмдарамбидо’.
Автор: Марина Ярой’ падвы
Авторы
Няръяна Нгэрм
Темы