не используйте | «Красный Север»
0°C

обновлено: 10:15, 09 февраля 2023

Няръяна Ӈэрм

Ӈарка я юн

не используйте

Яхананаʼʼ манзаидоʼ сававна теневанаʼʼ хибярихиʼʼ на сава ӈэсетыʼʼ. Красной ӈэсыхына ӈопойдоʼ Надежда Николаевна Выучейской, маняʼʼ янаʼʼ тер, Ӈарка выӈгана соявы некоця.


Нисяда, небяда илевандиʼ ямбанʼ тэхэʼʼ на манзаравэхэнзь. Небяда — Вера Павловна Ледкова, мядʼ пэртяӈэ таравысь.

Фото: vk.com/nn.yanao
Фото: vk.com/nn.yanao

– Небявʼ , нисявʼ хойхана мюсерӈаханзь, маняʼʼ , ӈацекэӈэ, интернатхана илеваць, Красной ӈэсыхы школахана тоходанаваць. Таʼ небянанаʼʼ , нисянанаʼʼ нядабасетываʼʼ , таремʼ хойʼ илмʼ торомдамбиваць, — ӈацекы ӈэвы подаʼ Надежда Николаевна тензебтесь. – Небянʼ хэвхана мядʼ манзаи пэрцетыдмʼ. Пениʼʼ , хобʼʼ напась сиʼʼ ми тохоламбись, мядʼ еяʼʼ сэдыба нядаӈгосетыдмʼ.

Школами ёльцеʼʼ махаданиʼ мань хаюпа хаядамзь. Тикыʼ пуд вэсакони Осип Егорович Выучейскойʼ няʼ Варандейской хойхана мюсерӈанинзь. Вэсакоми тедаʼ хойхана мэ, «Ерв» СПКа нюртей ӈэсыхына манзара.

Надежда Николаевна тедаʼ хардахана иле, мале ӈахакуд хойхана мюсерма илевамда хаедась, Краснойхана иле.

– Нюкциниʼ нюдяко ӈэваʼ мальӈгана хариʼʼ хардаваʼʼ яӈгусь, небяни мякана няхарʼʼ нюкциниʼ ня сыʼʼ ӈадёсетываʼʼ. Поʼ тяхана хардадами таць, нюниʼʼ мале ӈармаʼʼ , малʼ мякдандоʼ хаяць, — вадамда нерняʼ лаханась нявʼ минреда. — Ӈаркаюмʼ хасава нюмиʼ зоотехникӈэ «Ервхана» манзара. Павел — нюдякомиʼ НАЭТхана тоходана, пыда повар-кондитер ӈэӈгу. Не нюмиʼ Юлия Няръяна маркана педколледжхана тоходана, системный администраторӈэ манзараванда. Тедаʼ хардахананʼ ӈопойӈэ иледмʼ , нюниʼʼ мякандоʼ ӈатесетыдмʼ , хамякось ядабтамбасетын. Ӈобкана маʼʼ лабнанаʼʼ сейми маймбасеты…

Сэдорава мякана

– Нердеʼ сэдоранаӈэʼ тарадамзь, ервотаӈэʼ тетимдей поʼ манзарадмʼ. Маньʼ хэвхананиʼ тюкохона Виктория Петровна Вылка, Елена Ивановна Вылка, Октябрина Витальевна Выучейской манзараʼʼ , — Надежда Николаевна мась. — Хурка манзаи сертабиваʼʼ ? Хуркари тэхэʼʼ на мэнаʼʼ хибярихиʼʼ на тарана ӈавори сэдыбиваʼʼ : пиваʼʼ , тобакʼʼ , мальцяʼʼ , савакʼʼ , мальцяʼʼ таӈгаʼʼ ӈэдакыʼʼ , либтадʼʼ , парасинʼʼ еяʼʼ. Неняӈгʼʼ ёльцяӈгана мякана есерʼʼ тарасеты, есерʼʼ сэдабасетываʼʼ.

– Хойхана несьдаʼʼ хасаваʼʼ ӈокаʼʼ , пыдоʼ нямнандоʼ ӈаниʼʼ ибедорцетываʼʼ. Нянандоʼ тарана ӈавори ӈаниʼ сэдыбасетываʼʼ , — Надежда мась. — Мань тюконʼ манзараванзь тобнаниʼ , ӈока тадрадʼʼ яӈгосеты. Мальцяʼʼ , тобакʼʼ нисетываʼʼ сэдыбюʼʼ. Тыбэртяʼʼ ӈодʼʼ ненэциеʼʼ ембдяродоʼ нисетыʼʼ мэсʼʼ. Пудана самляӈг похона ӈаниʼ серʼ сюрхалъйʼʼ : хибяриʼʼ хартоʼ ембдяродоʼ мэць харвабцодоʼ ӈадимя. Паской, сава, иба, — вадамда нерняʼ Надежда минреда. Хобахад сэдвы ембдярʼʼ , лавкахана тэмдавы ембдярʼʼ тоʼʼ олха вуниʼʼ ӈаʼʼ. Мальцямʼ мэць нин ханьтаӈгуʼʼ.

– Сидя поʼ тяхана сэдоралаваʼ мякнандо сувенир сертабада ненэцямаʼʼ ӈадимясь. Тикы ӈудаʼ теркоци турта мядондаʼʼ сававна тэмдабасетыдоʼ , — мелʼʼ няваʼʼ вадеʼʼ ӈада. — Маняʼʼ сэдвыʼʼ манзаинаʼʼ маниебʼʼ нанаʼʼ ихинанаʼʼ сава ӈэсеты. Паны, пиби, хусувэй сэдъяваʼʼ ихид пэрцетываʼʼ. Ӈадьбятоʼ янаʼʼ терхаʼʼ маймбабцомʼ тэврамбиʼʼ.

Автор: Юлия Талееваʼ падвы


3

0

0

0

0

0



обновлено: 10:15, 09 февраля 2023

Темы