Няръяна Ӈэрм
Сюрамбадиˮ пирдырма
Меретяˮ нинаˮ ӈаниʼ маˮлюрӈаць. Саляӈгардахана «Полярный круг» нюбета сюрамбадиˮ пирдырма миӈась. Ямалнаˮ тодоˮ хардахат товыˮ ненэцяˮ ӈокаць.
Тарця пирдырмамʼ мале сян поʼ минредоʼ. Пилюˮ ирыʼ пудана яляхана ӈась. Марадʼ терˮ, мякˮ туртаˮ пыхыдадоʼ ӈахакуд интернетʼ серʼ падвыдонзь. Сян хунат сехэрымʼ пяванда ӈэвамдоʼ хусувэйдоʼ харта таславэдась. Ӈокханда тет сехэрэвна сюрамбиць. Хэбицяко сехэрыʼ серʼ нюдякоˮ, тохолкодаˮ ӈацекыˮ, ӈаромбойˮ ненэцяˮ миӈаць. Пыдоʼ нерня хаяць. Пуна няхарˮ ӈэдалавамʼ пэртяˮ нэкалӈадонзь. Тикахана миндяˮ ӈокаць. Тасуˮ яхад ӈэда Эдуард Яр няби Пэʼ тер Филипп Тайбери саць мереˮмэхэнзь. Нехэт Тасуˮ яхад товы Екатерина Тэсида няби Саляӈгарадʼ тер Ульяна Сэротэтто нитиˮ нерня тоӈаханзь. Хусувэдоʼ ӈуданда терад, медальдамда няˮмась. Тикы няхаˮната сюрамбавы не Надежда Салиндер таремʼ лаханась:
— Маниʼ хасава нюниʼ ня нюртей сюрамбавамиʼ. Небой поʼ харванинзь, таремʼ нись еревˮ. Повната нюдя, няхаромдэй классахана тохолкованда, ӈадьбята хэбицяко сехэрымʼ пирдалембись. Мань няхарˮ ӈэдалаванʼ миӈадамзь. Нянани тоенарка. Тэри тикы серкана мэвахарт сава ӈэˮнивˮ. Медаль няˮманинзь.
Тад пуна юˮ няби сидя юˮ ӈопой ӈэдалавамʼ пирдалембадаˮ хаяць. Сёхаʼ тер Владимир Тусида нита нерня ӈадимясь. Сидя юˮ ӈопоймʼ пэрмэхэт хабей не Нелли Куртямова няхаромдэйӈэ сюртедась. Тетимдейӈэ Хоˮ саляʼ тер Нина Лаптандер пирдаледась. Ӈудаʼ тер, есь ӈэсяӈо, медаль няˮмарӈаць.
Тюку поʼ пирдырмамдоʼ Саляӈгарданаˮ сояˮмаʼ яляʼ едʼ сертавэдонзь. 430 поданда вэбаʼ ирыхана ханда. Тикыʼ серʼ ямб сехэрэвна сюрамбавэхэт сидндетимдейӈэ товэхэˮ ӈаниʼ есьʼ ӈэсяӈо мипиць. Таремʼ мядонзэймʼ няˮма хибяхартандоʼ нивысь тосаˮ. Тиканда мале ӈока ненэцяндʼ ӈудиˮ тер миˮӈаць.
Руфина Окотэттоʼ падвы
Сидяӈгˮ: Руфина Окотэттоʼ тадтавыˮ
Авторы
Няръяна Нгэрм
Темы