Няръяна Ӈэрм
Соя’’ма’ ялянда ед’
Ямална’’ тиӈгывна санаторно-лесной школахана тохолковы’’ ӈацекы’’ ӈока’’. Пыдо’ тодо’’ яхат ӈэдаць, ӈэрм’ тер’’ ню’’. Хусувэдо’ таняна мэ’’мамда сава ихиня тензебтембида. Неноховавна сиддо’ тохоламбавы’’ ӈарка нидо’ ни’’ юрыбю’’.
Ӈоб’’ тарем’ ӈацекы илева’ тидхалембавы — Нина Геннадьевна Кельчина. Тохоламбавыда я’ ханярина иле’’, мале ӈарка ненэцяӈэ хэвы’’ хибяри’’ сидто’ табедамбавы нямдо’ нидо’ юрыбю’’. Сава вадахана ивхалпидо’. Нямэхэна яра иры’ 24 яляхана ӈарка соя’’ма’ яляда ӈась, си’’ив ю’’ поданда хаясь. Нина Геннадьевна тидхалембавыда мал’ ибе’’яда. Хурка ӈэвамдо’, ханзер’’ тохолковамдо’, ханяд ӈэвамдо’ мал’ вадець пиръяда. Тикы ӈацекыда ӈобт’ ма’’люрпнандо’, тензебтевандадо’ ӈока ӈэсеты. Теда’ Нина Геннадьевна Саляӈгардахана иле. Нюда, нюта ню манзая’’ӈа. Сяхаӈгарт’ тэри ӈамдё ехэра. Сяхари’ ядабтаб’’, иламда тарем’ вадецетыда.
Пыда ӈавнанда Ӈысми’’ яхана 1956 похона Тойма нюбета ӈэсыхына вадёданавысь. Школам’ мале’’мяхаданда Саляӈгардан’ тохолкованзь товысь. Ӈацекы тохоламбадаӈэ тоходанавысь. Пуна «Артек» нюбета лагерькана манзаравысь. Тарем’ вадамбой’ Саляӈгардахана ӈэда, тивакадо’ едена’’ ӈацекы’’ ед’ таславы школан’ тэввыць. Тет юкад вата по’’ ямбан’, хойхад турта’’ ненэцие’’ ню ехэрана илам’ торомдамба нядабись. Хусувэмдо’ харе’’ нюдрев’ пэрӈадась. Тикыта поӈгана ӈобкартамдо’ ни тэрабасету’’, вэваӈэ, саваӈэ ни тасламбасету’’, мал’ ӈэбато’ ӈоб’’ пирсувна мэнейдась. Хусувэй ехэрана серм’, илаӈгана тарана’’ ӈавэ Нина Геннадьевнахад намдасетыдо’, манэ’’цетыдо’. Ӈадьбята ӈод’’ тяхасовна манзаямда минреванда няю’ хуркари’’ ненадумда’’мида таня’’. Маниевы, тидхалембавы ӈацекыда сидта тамна тене’’. Ӈямэхэна интернетувна лаханась. Тарем мась:
— Мань тохоламбавы ӈацекыни’’ тенеян. Пыдо’ си’’ми нива юрыбава ихиняни ӈули’’ сава. Сяхари’ телефонувна, падна лаханако няцетын’. Няндо’ тарем’ ма’’ман’ харвадм’: «Етри’ нерняри’ ӈада’’. Минрена’’ серода’’ тидхалё миӈая’’».
Мань ӈод’’ Нина Геннадьевнам’ етри’ сава ихиня тенесетыв. Сибимдей классхана мэдамзь. Ӈобанзер’ сидна’’ табедамбасеты. Хибяхартм’ ни тэрабасету’’. Савари вадам’ няна’’ хэтыбасеты. Та’ мальӈгана нюдяко хардахат товэӈэ марадм’ ехэраваць. Ханяӈэхэна тарана’’ ӈаводикы мякданда тэволасеты. Вадахана, ӈани ӈамгэхэна нядаӈгосеты.
Сёяха’ хардыхы школахана тохолковы Илья Сэротэттом’ хонрамбидамзь. Теда’ я’ тебтм’ нэкалпава манзаям’ пэрӈа. Яр-Саляхана иле. Тензебтемба’’мида тарем’ ваде’’ядась:
— Мань школахана тохолковани мальӈгана «санаторкахана» мэдамзь. 2007 похона сибимдей классм’ пэрӈадамзь. Нина Геннадьевна матдомдей классхана мэни’’ воспитательӈэ тарась. Ханяӈэхэ’’на маня’’ группаханана’’ тарасеты. Ӈули’’ сававна тенев. Сидна’’ харта нюдрев’ табедамбасеты. Няданда сяхаӈгарт’ вэва вадам’ нива’’ намдасету’’.
Маня’’ «Няръяна Ӈэрм» газетахана манзаранаӈэ нянда соя’’ма’ ялянда няю’ сава вади мэ’’ӈава’’, сенз ӈэя, таӈга илея. Нюда, нюта ню’’ сита етри’ майбтамбая’’.
Автор: Руфина Окотэтто’ падвы
Авторы
Няръяна Нгэрм
Темы