Няръяна Ӈэрм
Сыра хой’ ядувна едейкова
Ямалхана по’ ӈокаюм’ пеля сыра лехэбты. Маня’’ ӈэрм яхана иленаӈэ тецьда нумг’’ ханяцей маймбива’’. Пэрманда сер’’ма’’ тянё ӈани’ ни ӈа’’. Сыра’ ёльцяӈгана ӈацекы’’, ӈарка ненэця’’ пихина мэварин’ харва’’.
Тэхэ’’на мэна’’ нина’’ мяка’’нато’ тэри ни’’ ӈамдю’’. Хубтахана мер’ юркаӈгуд’’, таминда пихий’’ манзаяхато’ лабцеӈгуд’’. Сюри е’’эмняндо’ таславы ныланава’ ялясябто’ ӈод’’ ӈобтикы сянакобидо’ танясеты’’. Хасава’’ тыто’ хадом’ сюрте’’мяхадандо’ ныхыдырта’’, ярколаӈгу’’, санарта’’. Тарем’ янамбоковна Ты пэрти’’ ялян’ хамекода’’. Ӈацекэхэв’’ мяд’ хэвхы ядхана письридо’ соӈгу’’ — пыдо’ едейкурта’’.
Хардахана илена’’ сырэй’’ нуво ӈани’ мэнейдо’. Тев’ ёльцяӈгана ӈацекы’’ хуркари’’ тэнз’’ ханакохо’’на, «ватрушка», «ледянка», «тюбинг» нюбетаха’’на едейку’’. Марад’ помна ядэрманд сер’ етри’ сянакода манэ’’паӈгун.
Ламбитава няби конькаха’’на едейкурмаха’ хусувэй хибяхана нюрцямха’. Ялямд ханзоць мэтан, пэдабцор хэна’ то’’олха ӈэӈгу, пыхыдамд высылтан.
Тамна ӈани’ мэкад ӈамгэ — халбуй латам’, сноубордм’ мэ’’ма. Тикэхэвар сяхаӈгарт’ тарцям’ мэ’’эмдавэй ненэцяӈгана ёльце савава. Тандаярка’ тетӈэ тикы едэй серм’ хор’’ӈаваць. Хубтахана ӈули’’ мер’ юркынаць. Тад’ пуна Саляӈгардахад Си’’ив Харв’ ӈэсонд’ машинахана хаяваць. «Октябрьский» комплекс нюбета мале ӈаха’’на ӈэвысь, ханяхарт нись нулаӈгахая пэдара’ помна таня’ тэвынаць. Паромбарка’ ненэцие’’ нерня турць таравысь, теневана’’ ма’’нисям’’, тикарихина сыра’ нимня едейкось мэта’’ лата’’, ӈэ’’ мал’’, ламба’’, нерако сава’’, пэсэв’’ товорӈа’’, нябинзеркав’’ серуванда нянд ни томд’’, саць пон’ ӈатеӈгун.
Лакамбой’ мэ’’манда ӈамгэдани тэмдадм’, ембъяв’’, пин’ тарпыв’’. Сыра’ ни’ ӈамдахая мутратна латам’ ӈэхэ’’ни мэйрадм’. Янамбоковна нулъяв’’, ханяхарт манзада я’’мав, сян ӈэни тай’’ мэсетын, лата’’ями нерня миман’ ӈоб’’ ни харва’’. Нерцюркахав’’ ма’’нисядам’’, ламбитава тотрев’ ӈани нензел’’ ӈэӈгодакы. Теда’ мутратна лата ӈопой ян’ си’’ми ня’’ма, ханзер’’ ӈэбни сава ӈэбта?
Мара’’ ӈопой нява’’ торомбэрка ӈэвы, сита хонрамбиваць, пыда сидна’’ табедамбись. Нерня салмуй явна хор’’ӈаваць, пуна ядувна едейко пэйнаць. Сян мантэвава’’, юркавава’’, танабавна латна’’ мине ханабавана’’ нинась толабю’’, толаба пяб’’, ӈокаркаць. Хэвувнана’’ хайна, таӈга минда’’ хан’’ӈаць. Маня’’ ӈод’’ мерцясавэй ханта’’ пирувна миман’ харваваць, тикахад сидто’ тотрев’ я’’маваць. Сейна’’ пинбато’ ӈод’’ ӈопой я’’авладамбой ядувна хэхэва хаяваць, я’’амнава’’ яӈговысь!
Табаӈгавахартада тоенавы, тандая’ пэвыӈэ етри’ едейко миӈаваць, нулта тарабта лакри’ мантэӈгун, тарем’ мерета ӈамгэмд мацядтеӈгур. Тоенана сыра’ ни ӈамдё ха’’амва вэварка ӈэвысь, ӈадьбята ӈэ’’ ниня мэёвна нусь тара. Едейкурць мэта сехэрэдо’ ӈули’’ ямб, манзявана’’ сабе тю’’у’ ниваць танаӈг’’. Помнана’’ таславаць: сяхари’ ӈани’ тутава’’, теневабцона’’ мэйраӈгува’’, ва’’лёйӈэ хандава’’, ненэцие тэвабада ӈамгэ’ сер’ танаӈгуна’’, тю’’уд’ сноуборд мэць ха’’маӈгуна’’.
Ехэрана серм’ тохоламбава сидна’’ ёльце майбтась. Ӈодь’’ тоховась пявась, мякана’’ паромаваць. Нянахавани сидяри’ час тянёсь, яля’ ямбан’ таняна мэсь пиртавась! Пыдара’’ ӈод’’ нита’’ ня’, ӈацекыта’’ ня’ сноубордм’ мэць хор’’ӈара’’, харвабта мэнена сертанда’’ ханданакы.
Анна Яптик’ падвы
Авторы
Няръяна Нгэрм
Темы