Няръяна Ӈэрм
Та' ер' яляхана
Таʼ ерʼ яляхана Пэˮ терˮ «Хадаʼ пэ»ʼ ядхана маˮлёвыдаць. Хэбидя ялямдоʼ Василий Тайбери' ӈэсыхына мэˮмэдонзь. Самляӈг ӈарка мяканандоʼ мядомыˮ. Ӈока нюʼ небя Антонина Тайбери яляʼ ямбанʼ мякананда ненэцие ядембада сяйхана, ӈавыдотаˮ ӈаврахаˮна ӈавламбавыда. Тикыта помна тамна харта пирдырмахаˮна таравы.
Тодоˮ ӈэсыхыт товыˮ ты пэртяˮ ненадо яляхандоʼ ӈахакуд хамековыˮ. Сямянхат илека сертоʼ — тэхэˮна нертеӈгось ӈэдалёрмадоʼ. Ныхыдоʼ хорпа ӈаниˮ хуркариˮ пирдырми сертабавыˮ. Ярколавахана, санарˮмахана, ныхыдырˮмахана мэбетидоʼ танявыˮ. Нюдя ӈацекэхэртˮ сянакурмыˮ.
Окотэтто Константин харта ӈэсыда Пэ хадаʼ няд сидя ӈэдалаваʼ пиркана ӈа. Таʼ ерʼ ялянʼ мядʼ терсавэйˮ товы. Нямбо Лаптандер тыда ёльце мереˮмыˮ. Пухуцяда ӈаниʼ нида нертевы. Ӈуданда терӈэ посабтамбада ӈаномʼ, тамна бензогенератормʼ няˮамвы.
«Ямал-нюˮнаˮ я!» Ассоциацияʼ ӈэвахана мэна Эдуард Яунгад марцьхыда няць ӈэрмʼ терˮ няхата сава ӈудаʼ тердамдоʼ тэвравы. Тикыдоʼ нерняʼ хаˮамвыˮ нитоʼ помна тярмыдоʼ. Иландоʼ саирмʼ тяхасовна теневанахат мале сян ненэцямʼ ненадумдавыˮ. Нюбедоʼ тиˮ — Окотэтто Константин, Нямбо Лаптандер, Антонина Тайбери, Лаптандер Аркадий, Тайшина Мария, Вылко.
Аксаркахад товы нядоʼ Гавриил Лаптандер юнетаˮ сёбарˮ сидяӈг маˮлавы, таняна манэˮлабтамбавыда.
Лаптандер Леонид Ильич сидндет поˮ ямбанʼ тарця пирдырмахаˮ тэвормада яӈгу. Тедаʼ тэхэна ӈэдалёрӈась, ярколась, тикыта еˮэмня ненадо падартамда ӈаниʼ няˮмась.
Хардахад товыˮ ерводоʼ мюсерта ненэциеˮ едʼ ӈадимдембада нядˮмиˮ нямна лаханавыˮ.
Таʼ ерˮ пуд ненэця'' янамбовна сырэйˮ мэлваˮ ётоʼ няюʼ ямданаӈгуˮ.
Пилюˮ ирыʼ нябимдей яляхад нумда сельбяʼ няюʼ сюрхалтыˮ. Яда янамбовна тасехэйӈэ ханда.
Хэбидя яляхана ӈарка нинаˮ невхы илаӈгад теневанаˮ табекудоʼ тензебтесетыˮ: «Яляʼ ерʼ пуд поваˮ ӈэрёйнда няюʼ пяӈгуда. Ӈадьбята яляʼ еркана тольмʼ ӈабта тара. Нядэнаˮ ненэцяˮ тандаяʼ ватавы халямʼ хыраӈгуˮ. Ӈодяндоʼ танябˮ — хуркариˮ тэнзˮ ӈэӈгуˮ. Ты пэртяˮ тыʼ ӈаябадмʼ сертаӈгуˮ. Сава ӈаврадоʼ малʼ тольʼ ниʼ мэӈгудоʼ. Ӈамзаʼ евэй, пиревы ӈамза, халяʼ евэй, тиребяˮ, мыдˮ, пиревыˮ, талтавыˮ халяˮ, ябцвыˮ лескаˮ, няньˮ ӈэдакыˮ, хардахад тэмдавыˮ ӈамняладаˮ ӈаварˮ. Тикахаˮна хэхэдоʼ ӈавлаӈгуˮ. Нумʼ иридоʼ иландоʼ таслаӈгу. Маӈгбавамдоʼ, сававна илевамдоʼ харта манэтада».
Тикыʼ хавна ӈани ӈопой вададоʼ тарця ӈэсеты: «Ненэй манзаи хэбидя яляхана сертаба ни тараˮ. Не ни сэдораӈгуˮ, хасава ниˮ сябартˮ, ябтаравы тынзянда хоба танябˮ, нида маторпаӈгуˮ, ӈарка манзаямда хуняӈы ёльцяндʼ хаеӈгуда, яёлˮ серода пяӈгу».
Яʼ малʼ няна иленаˮ ты пэртяˮ тарця ялямʼ сабе ехэрадоʼ. Пэдариˮ някуна иленахавˮ невхыˮ похот мэˮӈадоʼ. Ихинатоʼ хаця таӈгворӈаˮ. Ӈылекархаˮ неняӈгадоʼ сусаˮ. Епдяˮ паӈо ланома. Ӈэрмʼ няд товы мерця ныхыдамдоʼ тэвранаʼ тоˮолха. Паранана ямʼ хабтабададаревʼ сарё нумӈэ хая. Тюˮуд сиднаˮ нумʼ ириваˮ ненэсянда маниенараха.
Сидяӈгˮ: Алексей Салиндерʼ ӈэдабтавыˮ
Авторы
Няръяна Нгэрм
Темы