Няръяна Ӈэрм
Тадтаӈгурта не
Оксана Яр Нядаӈгарадʼ няна иле. Пыда Ямалʼ тиӈгывна мале юнета не. Ненадовна ненэй ненэциеˮ сидяӈгад сертаби, округнаˮ ханяримна ядэрманда серʼ етриʼ тадтаӈгурцеты. Тедаʼ похоˮ маˮламбавыˮ сидяӈгада ӈокамыˮ, ӈадимдеваʼ пирӈэ хэвыˮ. Нюртей выставкамда невхы илаʼ саирмʼ манэˮлабтамбада музейхана нэсь таславэда.
Тет юˮ пирˮ сидяӈгамда ӈыдаванда хавна ӈодякохот паӈгалмыда, полимерной глинахад сертавыда тэвравы. Хусувэй тадтаˮмахананда ӈэрмʼ терˮ ненэциеˮ иламʼ манэˮлабтамби. Ӈопойхана малкода хасавамʼ манэць пирӈаваˮ, ӈанихина ты пэртиˮ сянаковаʼ яляхана тарота ненэцяӈгʼ… Тыˮ, вэнекоˮ, ӈодяˮ — малʼ ваˮлёйвана тадтавыда, тамна иленаʼ тоˮолхаˮ. Выставканʼ товыˮ ненэцяˮ тарця манзаи манэˮмандоʼ серʼ тэри пысыӈгавыць, маймбавыць, савари вади хэтыбавыць.
Сёётэй не Любовь Бирюкова турмыˮ поӈгана мэсь, паской ӈамдэдода мипаванда серʼ таремʼ мась:
— Оксана ӈулиˮ мелˮ не, ӈамгэри манзаямʼ пябˮнанда ёльце варемда мэцеты. Сидяӈг сертабавамʼ ӈаниʼ сямянхат мэнеда. Таддикахад пыда ты пэртиˮ иламʼ вадецеты.
Тамна ӈаниʼ ӈопой не Антонина Салиндер тадтаӈгодаʼ еˮэмня ненэцяʼ вадавна ӈэда сёмʼ ханавысь.
Оксана маˮнисяв:
— Сяхариʼ тамна ӈаркамбой выставка сертабаванʼ харвадмʼ, таремʼ ненэцяˮ маняˮ илнаˮ нямна теневангуˮ. Тюку — нюртей сидяӈани манэˮлабтамбавами, товыˮ ненэцянгˮ сейхад ӈэдаˮ вади мэˮӈадмʼ, мань ихинани товараˮ ӈулиˮ сава. Самляӈг поˮ ямбанʼ тадтамбавыни ӈыдадамзь. Неноховавна мале юдʼ мянʼ поˮ ямбанʼ тадтаӈгудмʼ, тюку манзаиниˮ сямян тэнз конкурсхаˮ ӈэдарамбинась, ханярина савуцетыдоʼ, нерняʼ пэрцетыдоʼ. Тадтаӈговаʼ хавна ӈодяко паӈгалпасетыдмʼ, хуркари сомбой ӈавори сертабасетыдмʼ.
Ваˮлёй тадтаӈгоданʼ таремʼ маӈгаваˮ: «Нерняри ӈаˮ, варемд мэсˮ, манзаид тэмдабадаˮ ӈокаˮ ӈэяˮ».
Анна Яптикʼ падвы
Сидяӈгˮ: Оксана Ярʼ ӈэдабтавыˮ
Авторы
Няръяна Нгэрм
Темы