Няръяна Ӈэрм
Тамна яӈганаˮ
Тыˮ лекарˮ тамна хойхана манзараˮ. Тевʼ ёльцяӈгана саць яӈганасетыˮ, тиртя ӈаноˮ тодоˮ вымна тэри тирӈаˮ. Мюсерта ненэцяˮ тикы нидоʼ хусувэй яляʼ ӈатейдоʼ.
Тюку яляʼ пиркана юкад вата матˮ лекарˮ бригадаʼ терˮ яӈганаˮ. Сиˮив — Ямальской няби Тазовской районхана манзараˮ, сидя — Надымской районхана тэтнаˮ. Яӈганавадоʼ мале сян янʼ тярмы. Пилиˮ нюртеˮэʼ тыˮ лекарˮ ӈэсыʼ тер нядˮмяць ваˮадмʼ палпиˮ. Пунаʼ таняʼ тыдоʼ танабиˮ. Вакана малаˮмахадандоʼ посаʼ хабцяӈгад яӈгабидоʼ, биркы ӈабтамбиˮ.
Няби таӈы яӈганаваханандоʼ округхананаˮ 382 423 тымʼ посаʼ хабцяӈгад яӈгавыˮ, 666 501 тэнʼ биркы ӈабтавыˮ. Тамна 29 419 тэхэд вэямʼ ханавыць. Тикахана бруцеллёз хабцяндоʼ танявам, яӈговамʼ тасламбаӈгуˮ. Тыʼ лекарˮ малкось вэнеко ӈаниʼ нидоʼ юрыбюˮ. 3160 вэнмʼ пардонтавыць. Тикыд хабцяӈотоʼ танябˮ, тамнаʼ тяхаʼ тэхэˮ тэвра пиръядоʼ, тыʼ ӈамзамʼ ненэцяʼ ӈамбата хабцяʼ нянда палаӈгу.
Ӈахат тыˮ лекарˮ мюсертаˮ тэтнаваʼ паӈохона манзараць. Тальцюна манзаямдоʼ сидя янʼ тярӈадонзь. Нюртеˮэʼ нараʼ ялянда сэвʼ тюˮуна хэˮмяхад, тыˮ саполана ирыʼ пиркана ӈэсыхыˮ тэворӈаˮ. Яӈгавдавэйˮ ты хабарталванʼ нидоʼ няˮмарпаӈгуˮ. Тикыʼ нямна ты пэртяˮ сававна теневаˮ, ӈадьбятоʼ ӈобкартадоʼ пуня ни ӈаˮ.
Тикыʼ хавна тедаʼ тэхэˮна мэнаˮ ненэцяˮ пардонˮ лабтэй няˮмарпиˮ. Тикыдоʼ небой поход няндоʼ тамбидоʼ. Нердена поʼ мэсоˮмахадандоʼ ты пэртяˮ терамда яӈгамдаваʼ нямна ервахаˮ лаханаць. Маˮнисямˮ, лабтэйʼ мюня ты пэртяхаˮна тарана пардонда тянё. Тюку поход лабтэйтоʼ тердоʼ едэй ӈэвыць. Округнаˮ тиӈгывна 1500 пардонʼ лабтэймʼ тодоˮ районвана мюсертаˮ ненэцяˮ еˮэйтаˮ.
Поʼ сидя вэкна тэхэˮна мэнаˮ пилиˮ тэтнаˮ. Ты пэрма нензелˮ серˮ ни ӈаˮ. Хусувэй хибяри, лэк ненэцяʼ ты пэраць нида пирасˮ. Сава, мэё вырамдоʼ мэтариˮ, яляʼ едʼ миндаˮ ненэй ненэцялиˮ невхы иринатоʼ илаʼ саирмʼ нёда пирӈадоʼ.
Марина Ярʼ падвы
Сидяӈг: Марина Ярʼ тадтавы
Авторы
Няръяна Нгэрм
Темы