Няръяна Ӈэрм
Тарана няд’’ма
Мале танякуй похона мюсерта’’ илебей’’ мяд’ терха’’ ӈоб’’ тарана няд’’мам’ ӈадимдець. Пыдо’ ея’ мяд капиталм’ ня’’марпа пяць. Тикахана хусувэй ӈамгэ таня. Ӈу, тарецейха’, парасин’ есям’, лата, хорм’, сидя ханм’ тер’’ӈа. Округна’’ тиӈгывна капиталм’ няд’’мяць мале ӈока’’ мяд’ тер’’ харе’’ иламдо’ нёда пяць. Мал’ ӈэбто’ тодо’’ яха’’на иле’’.
Ты’’ саполана иры’ пудана яляхана Тасу’ яв’ няю’ ӈэдалёрӈаваць. Мале сян яля’ сер’ хуркари ехэрана ненэцие торамдаваць. Таняна илена’’ ӈобтикы та’ тяха’’мандо’ нерня’ хусувэй ӈавэдо’ ӈахакуд ӈанэдамби’’. «Чумовой капитал»м’ ня’’амвахартар саць тарана сер’’ӈэ толы.
Та’ мальӈгана ӈэрм’ тер’’ серо минрена управленияндо’ ӈэвахана мэна Прокопий Чакович Тэсида ӈоб’’ мяд’ теран’ мядм’ ми’’ӈась. Салиндер Владимир Васильевич пухуцянда Анастасия Ивановна’ ня’ тет хасава ӈацекым’ вадабихи’. Теда’ самлянзимдей нюмди’ ӈатеӈаха’. Ӈобкана СПК «Тазовский» предприятийхана манзараӈаха’. Ты пэрӈаха’. Ниди’ ӈацекы ӈэдахаданди’ теневыди’. Ӈавнанди’ ӈод’’ нисянади’ тэхэ’’на мюсермы’’. Владимир Васильевич ма’’нисяв: «Ёльце тарана няд’’ма. Ӈамгэ вэванда таняб’’, хар’’н тидхалеӈгун. Ӈудо’ саць няӈо’’ӈа’’, туросота тараӈгу’’. Хандо’ ӈод’’ техэ яхандо’ тэвра тараӈгу’’. Няӈота’’ ӈу’’ мюсеб’’, саӈговота’’. Тэри нум’ ед’ тавы вэвада яӈгу.
Пухуцяда Анастасия ея’ мэядирм’, сэдоӈодо манэядась. Ма’’нисяв, мэядирквадавэва ни ӈа’’. Сэдаӈохобидо’ помнандо’ ӈоб’’ ӈэдалава’ пир’’. Балок’ еяӈэ сертаӈгуда, яханандо’ мале танякуй похот ея’ мядо сыра’ ни’’ мэс’’. Балок’ еяӈэ серта’’махад ӈани’ сава ӈэӈгу. Корхавамда саву’’ӈадась.
Тюку по’ Тазовской районхана мале си’’ив мяд’ капиталм’ мяд’ терха’’ ми’’мыць. Ты’ пэрти’’ сянакова’ яляхана тамна самляӈг мяд’ тер’’ мяцавэйӈэ хэвыць. Ӈокханда сяни’’ по’’ ямбан’ сидндет ю’’ мяд’ тер’’ харто’ ея’ мяцавэйӈэ хэвыць.
Тандарка’ округна’’ ӈэвахана мэна’’ ерв’’ вато’ сер’ ненэциена’’ е’’эмня ӈадимдембада няд’’мам’ хаця яӈгамдавэдо’. Тад нерня’ яна’’ тер’’ ня’’муванда «чумовой капитал»ндо’ мюня ӈэда’’ ӈавори’’ ханярина илебто’ ӈод’’ ӈобто’’лас’’ ӈэӈгу’’. Тикы табеком’ округна’’ нермбэртя пидте’’мяхананда мале мэйравэдась.
Тарем’ яӈгамдавы «чумовой капитал»’ тер’’ тарця’’: 35 мяд’ ӈу, сидя 30 ты’’ хобахат сэдвы сырэй ея, сидя таӈы парасин ея, хор (кор), ӈопой кубометр’ пир’’ мяд’ лата’’, ӈобкарт еся тебсипой’’ мивы сидя хан.
Есявна манэць ея’ мяд’ капитал’ миртя — самляӈг юр’’ ёнар’’ пир’’. Ӈэрм’ тер’’ е’’эмня округна’’ есь’’ пэнёсяӈгад ӈадимдембидо’ Терда — ӈу’’, ея’’, хор’’, хан’’. Ня’’марпадидо’ ӈэрм яна’’ мел’ ненэця’’ сэдыбада’’, мимбада’’. Пыдо’ нянандо’ тарця сер’’ манзаядандо’ тара. Ӈадьбята несэймдавы ватом’ ӈани’ теневабто’ серо’’ӈа. Таняна падвы’’ табеко’’ сер’ сэдораӈгу’’, хано мимбаӈгу’’.
Автор: Марина Яр’ падвы
Авторы
Няръяна Нгэрм
Темы