Няръяна Ӈэрм
Тарана серм’ минре
Ямална’’ ӈэвахана мэна ервана’’ табековна тюку пова’’ «Сензувна илева’ поӈэ» таславы. Тикы’ сер’ ӈэрм яна’’ тер’’ сенз’’ ӈэва’’ е’’эмня хуркари’’ тарана’’ ӈаводикы сертаби’’. Марка’’на, нюдяко хардаха’’на едэй’’ лекар’’ мядо, сёбар’’ ненэцие’’ мэлвад нэмби’’. Маня’’ ӈод паднанаӈэ ненэцие’’ хабцяӈо савумдамбадаӈэ манзарана’’ нина’’ нямна паднава’’. Вадами Елена Араповна Лаптэй’ нямна ӈэӈгу. Ӈавнанда Салехардахана лекараӈэ тохолкурти’’ училище»м’ малевысь.
Салехардаханана’’ пудана’’ по’’ сер’ ӈэрм’ тер’’ ӈока’’ма’’. Ихиня ёльце сава. Нина’’ сяхари’ ханяримна ядэрпана’’ ядабтамбина’’. Теневана нянд ӈэб’’ ӈоб’’, сидя вадахана нямд няндаӈгур’’. Ненэй вадавна тороватаӈгун. Ханяӈэхэна тарця няр’’ сит тотрев’ иланда саирм’ выӈгад минреӈгуда, тохолковамда, манзаямда ӈобтикы варемда мэць тидхалембида.
Ӈоб’’ яля’ ӈацекы’’ лекар’’ мяд’ хэвувна ядвани’ сер’ Елена Араповна Лаптэйм’ ядабтадамзь. Сехэрэми’ ӈобт’ ха’’мыць, ядэлававна ялъянинзь. Лаханако няни ваде’’мандада ӈокась. Пыда иламда, тохолко’’мамда тарем’ ваде’’ӈадась:
— Мань ӈавнани Панаевск’ харад’ школахана тохолкудамзь. Сэв’’ни’’ ӈыхы сыла’’ма’ мальӈгэхэд нисяхаюни’-небяхаюни’ ня’ тэхэна мэваць. Мюсер’’ӈаваць. Мюсе Итя ӈабтеня’ ёльцянд’ тэворцетыва’’. Тикы пони’’ сёнзяни мюня тамна пои’’. Пыди’ хынёси’’ ю’’ нюм’ вадаӈаханзь. Мань няхатани ӈаркадм’. Тали’’ похо’’на нюдяко хасава няни’ соя’’махад нисями хаӈгулыць. Тад пуна нини’’ ха’’мыдаць, пили’’ харад’ иланд’ илелъядаць. Тедахав’ пебянани’’ ӈарка’’ма’’. Хусувэдо’ мяд’ терсавэй. Харто’ сермняндо’ сяхаӈгарт’ тэри ӈопой яхана ни’’ ӈамдёсету’’. Ёнэй нями тюку по’ армияхад тось.
Мале ӈаркаркаӈэ хэ’’мяхадани, пудана по’ школахана тохолкурмани мальӈгана ӈамгэ’ то’’олха манзаям’ тэравами мале сававна таславась. Ненэцие хабцяӈгад сибдамбавам’ тарана серӈэ пили’’ тасламбасетыв. Илни серӈэ тарця манзаям’ тэрадамзь. Саляӈгарад’ тохолкулван’ тэв’’махадани ненэцие’’ савумдамбадаӈэ тоходадамзь. Та’ мальӈгана «Салехардское медицинское училище»м’ нюбе’’ӈась.
Та’ хой мякни ханцетыдм’. Ӈацяв маймба манзеты: «Вэй, лекарава’’ товы». Си’’ми лекараӈэ вадецеты. Небями, нюдяко’’ нини’’ си’’ми ӈатевы’’ ӈэсеты’’. Тохолковами ёльце’’мяхадани сидя ю’’ сидя по хая. Тамини Салехардан’ илелъяваць. Хаюпа си’’ми’’ хаӈаць. Хар’’н мяд’ терсавэядм’. Вэсакони’ ня’ сидя хасава нюм’ вадабини’. Ӈаркаюм’ армияхана мэ. Нюдяюм’ юкад вата самляӈг пода, школахана тохолку.
Тедалахана ӈацекы’’ лекар’’ мякана манзарадм’. Ӈэсоӈо’’, лы’’ хабцяӈо манэсарта лекар’ нядаӈгодаӈэ тарадм’. Мале юд’ по’’ тарця тарана манзаям’ тидхалембив. Нерня палаӈгана хабцяӈо тасламбава’ мякана ненэцие савумдамбидамзь. Теневана’’ нини’’ табековна сёбар’’ ненэцие манэсарма’ мят’ хаядамзь. Хасава юд’ по’ тикы пэртями ня’’амбивась. Пуна таняд хаядамзь. По’ пеля мякнани’ ӈамдыдамзь хар’’н нянани’ тарана’’ ӈаводикы пэрӈадамзь. Мале сян по’ ӈацекы’’ сэв’’ лекараӈэ тарадамзь, ӈули’’ савась. Тикы’ пуд теда’ минреня манзаями ходамзь, таня’ хэсь таславась. Тюку’ тенат тидхалембив.
Лахарёми’ мале’’мяхадани’ нями мяканда паромась. Хэванда нерня тарця’’ вади хэтась: «Саляӈгардахана илевами илаӈгани’ падвы’ то’’олха. Тюкохона таравами ихиняни’ пои. Яханана’’ ӈаркамбой’’, илебей’’ ненэця’’, ӈацекы’’ сензувна илея’’. Едя’’ сиддо’ хэрабтамбая’’».
Таддикахад Елена Араповна тамна ӈани’’ хуркари’’ серка’’на мэсеты. Няд’’мадамда пюна таняб’’, сита хонраб’’, сяхаӈгарт’ пуня’ ни ӈэсету’’. Тяхасовна манзаямда мэне минреда.
Автор: Руфина Окотэтто’ падвы
Авторы
Няръяна Нгэрм
Темы