Няръяна Ӈэрм
Тасуʼ явхана хабартаˮ
Ӈэрёй тыˮ хабарпава ӈулиˮ паӈода. Округнаˮ тиӈгывна ты пэртяˮ тэравыˮ тыдоʼ хабарталвахаˮ тэврамбидоʼ.
Тасуʼ явʼ няна тэхэˮна мэна ненэциедоʼ саць тэтнаˮ. Таняна носиндалаваʼ ирыʼ 13 яляхана едэй хабарталвахана манзара пэйдаць. Тикадоʼ Мессо яхаʼ няюна ӈа. Хэвы сиˮив яляхана тамна Паютеˮэʼ, Хальмерˮ Седеˮэʼ харадʼ няна хабарталыдаць. Сямянхат пуда Ӈэдяӈгана хахая иленаˮ ненэцяˮ харадʼ яданʼ тыдоʼ тэвраць.
Районандоʼ ервʼ вадавна тюку поʼ яханандоʼ 1200 тонна тыʼ ӈамзамʼ ӈыдаванзь тасламбиˮ. Тикадоʼ ӈаниʼ похотата юрˮ сиˮив юˮ тоннаʼ пирувна ӈока. Яханандоʼ тытоʼ хэваˮ саваркаˮ. Тедаʼ хабарталваханандоʼ хусувэй ялядоʼ таславы. Хибяˮ, сяхаʼ, сяӈок тымʼ тэвравада, малʼ падыˮ. Манзаядоʼ минханда минда, хибяхарт пуняʼ ни ӈаˮ. Ненэцяӈгана ӈодˮ тыдоʼ танабавандоʼ ёльцяӈгана сава ӈэӈгу.
Едэй хабарталвахана сидя юрˮ тонна тыʼ ӈамзамʼ ӈыдабаванзь тасламбиˮ. Тикахана едэйвана няхарˮ юˮ самляӈг ненэцяʼ манзаядамда хоӈгу. Манзаяндоʼ тидпойʼ мима еˮэмня хусувэй таранадоʼ таня. Ӈолаваʼ, хонё, мата мэта лоходоʼ хамедавыˮ.
Тёняӈы Воркутаʼ нямна мюсертаˮ ты пэртяˮ тыдоʼ ӈаниʼ яханаˮ тэврамбидоʼ. Хареˮ иленаˮ ӈыхыˮ похот янаˮ няюʼ тыдоʼ танабидоʼ. Ханяӈы тёняӈы Ненэциеˮ округанʼ тыдоʼ ханлэйдоʼ. Таремʼ пыдоʼ ӈани яхана тыдоʼ хабарпиˮ. Тикы нядˮмяць Приуральской районхана 267 тонна тыˮ ӈамзамʼ ӈыдавыˮ. «Паюта» — 223 тоннамʼ томдавы, «Салехардагро» — 44 тонна тыʼ ӈамзамʼ.
Тэхэˮнатоʼ ненеэциенаˮ ӈамгэʼ мянувна есядамдоʼ недвотаˮ. Тикахат тарана ӈамгэдамдоʼ тэмдабаӈгуˮ.
Марина Ярʼ падвы
Авторы
Няръяна Нгэрм
Темы