Няръяна Ӈэрм
Сэр’’ явэхэт лэтрё тохолковы’’
Сэр’’ варк’’ илесь’ ёдо’ Итя ӈабтеня’ няна ӈа. Ханяӈы’’ Я’ мал’ тер’’ ӈахат танямна мюсерӈа’’. Невхы’’ похо’’на сэр’’ явым’ ханедаӈэ мэ’’мэдо’. Тарем’ яӈга явэнзь ядэрмы’’. Едэй илаӈгана тарця ни ӈа’’. Тикы я’ сармик закон’ вато’ сер’ лэтрамбада. Ненадо «Красная книга» нюбета падаркана пады. Ӈадьбята ханедаӈэ ни толю’’.
Варкм’ тунихина ядаб’’, хадаб’’, ненэць’ серт’ еремда. «Ӈэсы’ хэвхана ӈадимбата, ненэцяӈг’’ хавыдабта, тэри пиде тара. Сармикм’ хареба нядна’’ ня’’амвы’’ мирв мэ’’ӈада’’. Тикы’ пуд неноховавна хардан’ палытанаха’’ юнм’ ӈэдабтаида’’», — тарця’’ табекодамдо’ вы’ тер’’ «Медвежий патруль» тохолковам’ минренахат намдавы’’.
Ямальской районхана мат’’ ю’’ пир’’ мюсерта ненэця’’ тохолкурмы’’. Теневабцудо’ тад нерня’ няд’’маӈэ мэтыдо’, мято’ тер, тыдо’ пинкабтада сармикахад лэтра пиртыдо’. Сиддо’ тохоламбадидо’ няць хусувэй ӈамгэм’ харакута сер’ таславы’’: мят’ товы сармикм’ ханзер’’ вэнолтамбаӈгудо’, тэхэто’ тэввы’’ ӈэбта, ӈани’ ханзер’’ пидебаӈгудо’.
Палытанахат мирвдандо’ ӈока ӈамгэм’ ня’’амвы’’: ӈарка’’явана мунота’’, пендерта’’ граната’’, ракета’’, фальшфейер’’ (ямбалюй’’, табцамбада’’, лэёмбада’’ серакабт’’), ӈарка фонарь’’. Тикыдо’ мяк’’ товы явым’ пидеба мэтыдо’. Тэри ӈапрамба хубта ян’ танаӈгудо’.
Хасава’’ хавна не’’ ӈобтикы таняна мэвы’’. Пыдо’ яв’ варк хареба мэта мирв мэць ӈани’ теневаӈгу’’. Выӈгана хасевто’ тэхэ’’на мэб’’, ӈани серото’ нямна ӈэдалёрпато’, не’’ харто’ хаюрць ереберцеты’’. Ӈадьбято’ сармикахат ӈацекыдо’, мядодо’ лэтрамба ӈани’ тохолкурмы’’. Сяхари’ мая’ хадкэб’’, ракетам’ мэць, серакабт табцамба харто’ пиртадо’.
Яӈга ненэцяӈг’’ ваде’’мэдо’: ханзер’’ палытанаха’’ юнм’ ӈэдарамбаӈгу’’. Хадёлевы таняб’’, лекар’’ това’ нерцюна лекарабтаӈго тохолкурмы’’. Тикы’ е’’эмня таславы терсавэй пардонто’ ӈэся’’ таняӈгу’’.
Пудана по’’ сэр’’ явэ’’ нямна вэва юн’’ етри’ танясеты’’. Тунисяда’’ ненэцяӈга’’на ёльце тосакабты’’. Ӈадьбята теда’ ӈэвы тохолкова ӈули’’ ӈарка таром’ минре. Тарем’ Ямалханана’’ «Медвежий патруль» проектм’ няд’’мяць мюсерта’’ ненэцие нядаби’’. Тикы’ хавна сянда сармикм’ лэтрамби’’.
Автор: Галина Кинчина падвы
Авторы
Няръяна Нгэрм
Темы