Няръяна Ӈэрм
Таӈы’’ мэлвахато’ пядо’
Ты’’ ниць ирыва’’ ерканда тэвы’’. Яханана’’ нумда саць ӈарковна ибе’’мада яӈгу. Пыв мерця яля’ сятора, сада пи’ ханьхана нянзико салаба тондабида. Холкаван’ харвавы сыра пи’ тяха’ мэё парандэйӈэ хан’’ӈа’’. Я’ хоба ёльце падвэӈэ хая. Варё’’ ӈокворӈа’’. Салабам’ наволпада мерця минда сахавор’’ӈа. Тарця’’ помна сэр’’ сыра’ нимня нянзико’’ тобато’ ниня паридена’’ су’’ляко’’ нявотарць варемдо’ мэ’’ӈа’’.
Тюку нини’’ ӈыхы похона торомдэйнась. Нюна’’, нюна’’ нюсавэй’’ теневына’’. Сава юрёни’’. Сава ня ӈэхэваб’’, нина’’ теневабцова’’ ненэця’ вадырӈэ хая. Мякандо’ по’ сидя вэкна сохо таняб’’, тэворцетыдм’. Помнана’’ ваде’’мандава’’ ӈока ӈэсеты. Теда’ ӈод’’ таславы яляхана мято’ няю’ нэкал’’ӈаваць. Саляӈгардахад Саля явм’ тяха’ няю’ мада’’махадана’’ мале пон’ ӈэдалываць. Машина таславы ян’ сидна’’ тэврась. Таняд сидна’’ хосаяванда нява’’ сенасяда нумгана сехэры’ ядхана ӈатеваць. Пон’ ниваць ядэр’’, ӈамгэ’ пиркана еся хан’ хырнам’ намдаваць. Малкось’ вэнекомда пэмба нява’’ тикавна писянзь ӈадимясь. Таняд Лаптандер’’ мяд’ няю’ нэкал’’ӈаваць. Ӈамгэ’ пират ӈэдалё’’махадана’’ ӈоб’’ ӈарка мяд нерна’’ няд ӈадимясь.
Николай Егорович Лаптандер мята ядхана сидна’’ ядабтась. Пыда ӈыхы сэвта сыла’’махад ӈавкыда мание. Теда’ «Салехардагро» предприятийхана мале сян по’’ ямбан’ ты пэртяӈэ тара. Хабте’’ таркосавэй’’ ня мякнандо’ ванвыць. Ӈавор’’мана’’ сер’ маня’’ помнана’’ иландо’, тыто’ нямна лаханакурӈаваць.
Тована’’ мальӈгана ты’’ ниць иры’ хасаваюдимдей ялясь. Нердена’’ вадина’’ саю мардавы’’ иринана’’, нисянана’’ нямна хаяць. Мани’ Николай Егорович’ ня’ нисянани’ хэбидя’’ похо’’на манзараӈаханзь. Халям’ пэрӈаханзь. Хусувэди’ харта яхананда ӈарка таром’ ха’’аврамбись. Тамальӈгы’’ манзара’’ма’’ подо’ ӈобкана тензебтейнаць. Маня’’ ненэй ненэцяӈэ ӈани’ ӈарка хэбидя таром’ ха’’авраваць. Мале сенз похона нисяда, Егор Тимофеевич, хасава нюмда ты’’ илам’ мэне табедамбавэдась. Тикы ватом’, нисянда табеко тамна нёдэйда.
Харта ӈод’’ Николай Егорович вы’ илам’ техэ паӈгхаданда теневавэда. Лахарёва’’ тарцясь:
— Тюку предприятийхана ӈока соходо’ ӈысма’’ манзара’’. Ненэй ненэцяӈэ маньрина’’. Нянана’’ харе’’ мяна’’ терри’’ мэ’’. Ӈэсыхынана’’ сидя ёнар’’ тэва’’. Тюкона хабтона’’ ва’’ны’’. Ӈысма’’ я’ ӈэхэртабта недармидо’ нюртей тована’’ мальӈгэхэд нина’’ нюракус’’. Ӈабцата нива’’. Хар’’на’’ недармина’’ таминна’’ пяваць. Ӈысма’ ӈэдалёва’ мюмня ненэй ненэць’ хэсь я’’маӈгуда. Пыдо’ ӈопой яривна ӈэдалы’’, сехэрэда ӈамгэри пензя’ ваӈгӈэ хэя, сяхаӈгарт’ хэвнямна ни’’ ӈэдалёд’’. Тикаримдо’ нёдаӈгу’’.
Автор: Марина Яр падвы
Авторы
Няръяна Нгэрм
Темы