Няръяна Ӈэрм
Тедахав’ манэтава’’
Сидя по’ тяхана Ямалхана Пэ хоё’’ хэвхана илена’’ ты’’ пэрти’’ яхана кином’ сертабиць. Нюмда «Цинга». Тюку по’ яра иры’ сидя юдимдей яля’ Москвахана «Октябрь» нюбета кинотеатрхана нюртей ӈадимдевэдонзь.
Владимир Головнёв’ кином’ серта таславэдась. Тованда нерня илна’’ саирм’ теневана’’ ненэцие хонрамбись. Тад пуна 2024 по’ пиркана ненэцяндамдо’ ма’’лавыць. Маня’’ илна’’ нямна ӈэванда е’’эмня округва’’ кином’ тадтава’ яӈэ тэравыць. Си’’ив Харв харад’ техэ’’, Пэ хой’’ няна мэвыць. Мятамдо’, тэдамдо’, тамна ӈани’’ тарана’’ ӈавэдамдо’ ӈэрм тер’’ ненэциена’’ ми’’мыць. Пыдо’ сидто’ ӈод’’ таминдо’ кинохона тадтавыць.
Ӈамгэри серкана ила’ саирм’ техэ паӈгхаданда теневана’’ табекуртаӈэ тарасеты’’. Теда’ ӈод’’ ненэй ненэця’ нява’’ сюдбабц, ярабц, лаханако ма’’ламбада, мел’ хасава, Евгений Варьевич Худи нида тидхалембавысь. Ненэй вадахад луца вадан’ вади тэволанаӈэ манзаравысь, тамна ӈани’’ серка’’на табековысь. Нямэхэна редакцияхана мядоманзь турӈась. Ӈэдалёромита нямна лаханась, кино’ нямна инда ядэробцо ваде’’ӈась:
— Москвахана ма’’лёвы’’ ненэця’’ ӈокаць. Актёрӈэ таравы’’ ӈобтикы таняна мэвыць, пыдо’ тодо’’ яхат ӈэда’’ Россия яна’’ тер’’. Ӈани тарем’ кино сертабада’’ няндо’ манзаям’ манэ’’манзь товыць. Тикахана таравэӈэ маня’’ мале ӈокаваць. Хусувэва’’ тодо’’ ӈамгэхэ’’на тидхалеӈгусь. Нерня сцена’ ни’ сидна’’ хаӈаць. Мань тикы яля’ ӈарка соя’’ма’ ялями ӈась. Кинохона таравы Никита Ефремов, тамна ӈани’’ ненэця’’ е’’эмнани сейхад ӈэда’’ вадидо’ мэ’’ӈаць. Манэсо’’мана’’ пуд ненэця’’ помнандо’ тасалкурӈаць. Хусувэдо’ инда ядэробцом’ хэтась. Неноховавна Ямалхана’’ тэвормадавэй’’ хонравандадо’ ӈокась. Теда’ ихиняни тарця кино танявада ӈули’’ сава’ то’’олха. Ӈэрм яна’’ ты пэрти’’ илам’ манэ’’лабтамби. Тикы’ сер’ ӈани’’ я’’ тер’’ илна’’ саирм’ хамедаӈгу’’. Сертавэва’’ хаӈгулавы луца’ нямна ӈа. Ӈавхы’’ похо’’на сиӈгэ’’лараӈгавы’’ танявыць. Яхана’’ тэвормы’’ луцаха’’ тарця хабця’ ӈани’ палаӈгавысь. Саць хаӈгурта ненэць’ ханзели’’ хэсь пир’’ӈада. Ӈаводикы манэпи. Ханяӈэхэна хабця’ тэри ӈадибертя не’ мирабцахана турмы. Хаӈгурти ты’ вэяхана савумдамбавыдонзь. Вэям’ ӈэрпата — савумда. Маня’’ ӈэрм’ терӈэ ты’ ӈамза, вэя ӈаврадана’’ таславы. Тарем’ иринана’’ едяхат ехэравы’’. Кинохонана’’ тикы серм’ ӈадимдемби’’. Едэй’’ похо’’на ненэциена’’ тарцяхат ехэра’’.
Евгений Варьевич’ нямэхэна мат’’ ю’’ поданда хэвысь. Ӈарка ялянда няю’ нянда сава вади хэтыбива’’: сензӈэ илея. Нюда, нюта ню’’ сита нядабая’’, майбтамбая’’. Минреня серода тидхалё миӈая’’. Тамна хуркари’’ мэкад’’ серка’’на варемда мэ’’ӈая.
Саляӈгардахана ныланава’ яляхана тодо’’ тэнз’’ ненэцие’’ ила’ саирм’ лэтрамбава’ мякана кином’ ӈани’ манэ’’лабтамбавэдонзь. Тадри’ Ямална’’ тер’’ ӈани’ манэць пиртадо’. Хусувэй маркана ӈадимдембаӈгудо’.
Автор: Руфина Окотэтто’ падвы
Авторы
Няръяна Нгэрм
Темы