Няръяна Ӈэрм
Тэмбойнда выврё ӈахаʼʼ со
Ӈэрёй тецьдаʼʼ товари хаи. Ненэцяʼʼ таʼ мэтаʼʼ ӈамгэридоʼ ецеръядоʼ, янамбокована ёряʼʼ ембдяродоʼ тюхулпа пяʼʼ. Пэвсюмаʼ няна, хубтахана мерцяда сятʼ япа теберӈа. Ӈобасипойʼʼ ядэроʼʼмахад ӈудаʼ таркаʼʼ лекаӈга пэядʼʼ. Мюсертаʼʼ неʼʼ мальцитоʼ, панытоʼ ӈобад, сисяд, пибитоʼ ӈылдад сэдабиʼʼ. Сырэй нувоʼʼ товаʼ нерцюʼʼ паромба сэдораʼʼ.
Хардахана ӈобтикы серʼʼ, неʼʼ ӈаниʼ тэри ниʼʼ ӈамдюʼʼ, сэдъидоʼ няʼʼамбиʼʼ. Яр-Саляʼ тер Алёна Ачембоевна Окотэтто хусувэхэт манзара, выӈгана мэниʼʼ еʼʼэмня тарана ӈаво сэдыби. 2018 поход «Община Мир» нерняʼ минре. Нямэхэна грантʼ еси няʼʼмась. Янда тер нядаби, варючи ненэцие недвалемби. Ӈобкана «Чумовой капитал» программанʼ ӈу, ея, хано сертабиʼʼ. Мядоманзь туртаʼʼ нядандоʼ сямян мядонзэй тэмдабиʼʼ.
Алёна Ачембоевна ӈопой яхана ӈобʼʼ ни мыʼʼ. Сяхариʼ теневабцода ӈокамдамби, хуркариʼʼ хардаʼʼмана ӈэдалёрӈа. Вэбаʼ ирыʼ нюртей сиʼʼив яляхана Москванʼ «Интерткань-2023. Осень» выставканʼ ханʼʼӈась:
— Россиянаʼʼ 800 пирʼʼ предприятияʼʼ, фабрикаʼʼ, таддикахад хахаядаркаʼʼ ёхот ӈэдаʼʼ ӈобтʼ маʼʼлыць. Ӈокханда 12 яхад ӈаць: Белоруссия, Индия, Узбекистан, Турция, Китай, тамна ӈаниʼʼ. Малʼʼ хартоʼ сертабада ӈамгэридоʼ тэвраць. Сэдоравамʼ мэненаʼʼ ӈокаць. Хуркари тэнз тохоци, сэдора мэта машинки, ниткиʼʼ мандалʼʼ манэсарӈадамзь, тохолковахаʼʼ ядэрӈадамзь. Мярёймʼ вадетахаʼʼ ханʼʼӈадамзь. Мань ӈодʼʼ ӈаниʼ мярёйʼ нямна лаханадамзь. Ханзерʼʼ пидабававаʼʼ, хурка хоб тэрабававаʼʼ хонрамбиць, ты таро хаӈаць. Ӈэдалёроʼʼмани пуд едэй ини ядэрабцоʼʼ ӈадимяʼʼ. Масиʼʼ, тамна ӈани проект падаӈгудмʼ. Манзаяханани тарана ӈаво, ненэцие ходамзь.
Тад нерняна пявандада ӈока. Сита Китаянʼ мякʼʼ хамыʼʼ, пыда сиддоʼ Ямаланʼ тось табадавы. Таняд ӈэдаʼʼ ненэцяʼʼ ихинда поя хаʼʼамвыдʼʼ. «Ялэнаʼʼ мерʼ миӈаʼʼ, илмаʼʼ лакриʼ несэйворӈа. Тюку яляʼ мэсь пирта ӈамгэмʼ таминда сертаба тара», — Алёна Ачембоевна таремʼ ибедорӈа.
Анна Яптикʼ падвы
Авторы
Няръяна Нгэрм
Темы