Тецьда” Ири” ма”лёвы”

Хусувэй по’ Едэй по’ това’ нерцю’’ Яр-Саляхана илена’’ ненэця’’, ӈацекы’’ ӈули’’ маймбасеты’’. Няндо’ Ямальской район’ тиӈгыхыд ӈэда’’ Тецьда’’ Ири’’ не нюто’ ня’ мядоманзь тосеты’’.

Тюку по’ мале самлянзимдей ма’’лёвадо’. Помнандо’ юкад вата мандал’’ пирдырмы’’. Тохолкода’’, ӈарка’’ ненэця’’ поӈганандо’ танявы’’. Тецьда Ири нядабадаӈэ яханана’’ сертавы’’ мультфильмха’’на мэнараха’’, лаханакохо’’на вадетарха’’ ӈамгэ’’ таравы’’. Нертеӈгурмамдо’ сямянхат ӈарка ядэлавандо’ мюня мэ’’мэдо’. Няндо’ сырманзь харад’ тер’’ мал’’ товы’’. Ханяӈыдо’ ханимоӈгадандо’ мальцята, паныта тарпавыд’’.

Мядондидо’ сиддо’ майбтамба таравы’’, хыно’’мы’’, хоровод мэ’’мы’’. Мэта’’ ӈамгэридо’ манэ’’лабтамбавы’’, лаханако ваде’’мы’’. Тикэхэбидо’ ёльце тодо’’ тэнз’’ ӈэвы’’, ӈобто’’лас ӈоб’’ яӈговы. Хар’’н таня’ тэвавы ӈэхэвабни саварка ӈэӈгусь, тадтаӈгунась, теда’ интернет’ мутравна манэ’’янась. Неноховавна ӈацекы’’ ӈули’’ маймбавы’’. Ӈопойдо’ тарем’ мамы:

— Лаханакон’ тэвана то’’олхадамзь, сянаковарива’’ мэ’’ӈаваць. Хуркари’’ ембдиро мэта’’ помнана’’ ядэрӈаць. Хусувэй ӈамгэ яберена’ то’’олхась. Тэкоцяхарт тэвравыць, ханяӈы’’ хан’ ни’ тиӈгаць. Мань таӈга пивна ядэсумбидамзь, ибе’’мани е’’эмня мальцями, пибини серадамзь.

Тамна ӈани’ ненадо мядондадо’ Ямал Ири ӈэвы. Пыда не нюнда ня’ Сёяха’ няд товэхэ’. Тиртя ӈанохона миндаханди’ ӈули’’ пэдавэхэ’. Тарця хэбидя ялян’ тэв’’махаданди’ тэри пэдёсялмэхэ’.

Харто’ ӈудаха’’нато’ сэдвыдо’, сертавыдо’ мирдапада’’ ӈани’ тикахана мэвыць. Харад’ тер’’ ненэй ембдяро, ӈавар’’, хуркари яёлако нито’ ӈуда’ терӈэ тэмда пир’’мыць. Ярмарка сидя ныланава’ яляха’ ямбан’ мимысь.

Тад хуняна «Яля’ сэвхана» ма’’люрмы’’. Таняна нерня’ хэвыто’ нюбе намдавы’’. Сямянхат Сёяхахад товы Тецьда Ирим’ саву’’мы’’. Сыра’ не ӈацекэхэт Новой Порт’ терм’ няхатата сядотаӈэ таславы’’.

Анна Яптик’ падвы

Авторы

Няръяна Нгэрм

04:04, 04 января 2025

Темы