Няръяна Ӈэрм
Тябихутвахад ехэра
Неняӈгˮ ирыхына Ямалʼ терˮ ӈацекыˮ малʼ ныланаˮ. Ханяӈыˮ Пякуˮ яхана илена хасава ӈацекыʼ тотревʼ тэхэˮна мэˮ. Ӈанидоʼ ехэрана явна, ядембада яʼ нямна ӈэдалёрӈаˮ. Ханярина мэбтоʼ ӈодˮ тамдоʼ сававна мэˮӈадоʼ.
Тюку поʼ Мирон нюртей классмʼ малесь. Нараʼ мяканда ӈулиˮ паромбись. Пэдараʼ няна сита мята терˮ, тыда, вэнекуда ӈатець. Поʼ ямбанʼ школамʼ, интернатмʼ сававна тохолавэхэюдась. Пыда тикыʼ нямна таремʼ лаханась:
— Школанʼ ядэрмамʼ ӈулиˮ харвабтав, нянани 5 няби 4 няˮмарпава сава ӈэсеты, 3 няби 2 сяхаӈгартʼ нисетыдмʼ няˮмарпюˮ. Сямянхат мэненами — математика. Интернатхана ӈопой поʼ иледмʼ, ӈаниʼ мале тохолавась. Нерня таняʼ тэвбани вэваркась. Хибяхартмʼ ехэрадамзь. Пуна янамбовна няхананиˮ лаханако, сянако пэйваць. Мань ваˮлёй сёбарӈэ хэванʼ харвадмʼ, ӈадьбята сюрберӈадмʼ, санарӈадмʼ, тароˮӈадмʼ, футболанʼ ядэрӈадмʼ. Тябихутваӈгадани лабканʼ ханцетыдмʼ. Небяни тавыˮ есяхаˮна ӈавудота ӈаврако тэмдасетыдмʼ. Сянако нята няханиˮ хамбетки мицетыдмʼ. Мяни терхаˮ телефонувна лаханасетыдмʼ.
— Тедахавʼ пэдарахана мэва нянанд ёльце сава ни ӈаˮ? Ӈамгэмʼ пэрцетын?
— Небями нядабасетыдмʼ. Папакони няʼ идмʼ хосаясетыниʼ. Пи пэпасетыниʼ, хасуй пэˮмы пя мятʼ тэвасетыниʼ. Тюкохона туʼ пяӈэ харв, хо мэˮӈаваˮ. Вэва нумгана паднасетыниʼ. Хаерˮ, мерця яляхана пихина сянакосетыниʼ. Ӈувоцяхат пидя сертасетыниʼ. Тиртя сармик таре, вэбакоци мюнда мэсетыниʼ. Пяхат нёˮлёко ӈанокоци, ӈамдёрцие, ӈын, муӈго мимбасетыдмʼ.
— Тёняӈы ӈацекыˮ няʼ ӈобкана сянакосетыдаˮ?
— Тёняӈы ниниˮ 2, 4, 6, 8 классахаˮна мэˮ. Ӈопойдоʼ тюку поʼ нюртей поʼ тохолкованзь
ханда. Нюдякондоʼ тет пода. Ханяӈэхэˮна палатка, мядико сертабиваˮ. Тоʼ нямна манябэ
пюрць ядэрӈаваˮ. Мэкад, сомбой манябэ маˮламбиваˮ. Ядэрманаˮ серʼ пидя, хойрёко
хомбасетываˮ.
— Малкованзь, поӈгамʼ пядуванзь, ӈодиманзь ханцетын?
— Тэхэˮна мэхэвабˮ ёльце сава ӈэˮ нивʼ. Таддикахад тедариʼ неняӈгˮ, ниберёˮ ӈокаˮ. Малкодинаˮ тэтнаˮ, пурмʼ сертабиˮ. Тыдоʼ нюдяко мядикохона маниейдоʼ, маняˮ ӈопой яхана илеваˮ. Халямʼ хадабава нянани нюрцямʼ. Халямʼ хадаванзь сянако ниниˮ няʼ хэсетываˮ, хареˮ сертавы удочкинаˮ ханасетываˮ. Ӈобаӈгуна удочкахани ӈамгэхэв лакриʼ тебась, еремясь. Ӈэдарабтаˮнивавˮ! Ӈодимамʼ ӈаниʼ харвабтав. Неняӈгахат, ниберёхот тоса мякад сабе нидмʼ тарпорˮ. Тикыʼ хавна хареˮ пэдараʼ помна ӈахаˮ ханаць вэва. Хуркариˮ пилкабтёдаˮ сармикˮ таняˮ.
Мирон вадеˮмандада ӈулиˮ ӈокась. Телефонувна небянда вабц солыць, сита нядаӈгованзь хамондась. Лахарёнда пуд нюдя ӈэˮмями тензибтедамзь, сяхаӈгавʼ сита тотревʼ ӈаниʼ сянакосетываˮ.
Анна Яптикʼ падвы
Сидяӈгˮ: Юлия Сэротэттоʼ тадтавыˮ
Сидяӈг: Марина Ярʼ тадтавы
Авторы
Няръяна Нгэрм
Темы